ብግዜ መጽሓፍ ቅዱስ ዝነበረ መግፈፍ ዓሳ

ገሊኦም ሰዓብቲ የሱስ ገፈፍቲ ዓሳ እዮም ነይሮም። (ማር. 1:16-20) ኣብ ባሕሪ ገሊላ ኺገፍፉ ኸለዉ፡ መርበብ እዮም ዚጥቀሙ ነይሮም።

መግፈፍ ዓሳ ብድባራ ጌርካ ዚስራሕ መርበብ እዩ ነይሩ። ስፍሓት እቲ ኣብቲ መርበብ ዘሎ ኸፋት፡ ኣብቲ ግዝፊ እቲ ኺሕዞ ዚድለ ዓሳታት ተመስሪቱ እዩ ዚስራሕ ነይሩ። ንእሽቶ መርበብ ናብ ውሽጢ ምእንቲ ኺሰምጥ ተባሂሉ ዓረር ወይ እምኒ ይእሰረሉ ነይሩ እዩ። ዓብዪ መርበብ ግና ብታሕተዋይ ሸነኹ ምእንቲ ኺሰምጥ ከበድቲ ነገራት ኪእሰረሉ ኸሎ፡ ብላዕለዋይ ሸነኹ ኸኣ ጸምበለል ምእንቲ ኺብል ከም ዕንጨይቲ ወይ ከምኡ ዝኣመሰለ ነገራት ይእሰረሉ ነይሩ።

መግፈፍ ዓሳ ኽቡር እዩ ነይሩ። በቲ ኣብ ውሽጢ ባሕሪ ዚርከብ ኣኻውሕ ወይ ብኽብደት እቶም ዚትሓዙ ብዙሓት ዓሳታት ይቕደድ ነይሩ እዩ። (ሉቃ. 5:6) ያእቆብን ዮሃንስን ‘መርበቦም የዐርዩ’ ኸም ዝነበሩ ኣብ መጽሓፍ ቅዱስ ተጠቒሱ ኣሎ፣ መርበቦም ዜዐርዩ ዝነበሩ ድማ ብመርፍእን ብድባራን ገይሮም ከይኰነ ኣይተርፍን እዩ። (ማቴ. 4:21) ገፈፍቲ ዓሳ ወወፊሮም ምስ ተመልሱ፡ መርበቦም የዐርዩ ነይሮም ኪዀኑ ይኽእሉ እዮም። ብዘይካዚ፡ ገፈፍቲ ዓሳ ነቲ ኣብ መርበቦም እተጠናነገ ጭቃን ጐሓፍን ንምውጋድ “መርበቦም ይሓጽቡ” ኸም ዝነበሩ ሉቃስ ጠቒሱ ኣሎ። (ሉቃ. 5:2) ድሕሪኡ፡ መርበቦም ምእንቲ ኺነቅጽ ይሰጥሕዎ ነበሩ፣ ከምኡ ዚገብሩ ዝነበሩ ድማ ምእንቲ ኸይበላሸዎም ኢሎም ኪዀኑ ኣለዎም።—ህዝ. 47:10።

ዝዀነ ዀይኑ፡ የሱስ ነቶም ኣጠቓቕማ መርበብ ዚፈልጡ ገፈፍቲ ዓሳ እዩ “ገፈፍቲ ሰብ” ኪዀኑ ጻውዒት ዘቕረበሎም።