ንስእላዊ ቓላት መጽሓፍ ቅዱስ ተረድኣዮ

ኣብ መጽሓፍ ቅዱስ፡ ብኣማእታት ዚቝጸር ስእላዊ ቓላት ኣሎ። ብዙሓት ኣንበብቲ መጽሓፍ ቅዱስ ግና ምርዳኡ የጸግሞም እዩ። (ማቴ. 13:13) እሞ ደኣ ኣብ መጽሓፍ ቅዱስ ንዚርከብ ስእላዊ ቓላት ብልክዕ ምእንቲ ኽትርድኦ፡ እንታይ ኪሕግዘካ ይኽእል፧ ነዚ ዚስዕብ ስጕምትታት እስከ ፈትኖ፦

• ነቲ ርእሰ ነገርን ነቲ ስእልን ኣለልዮ። ስእላዊ ቓላት ንሓደ ርእሰ ነገር ምስ ሓደ ስእሊ እዩ ዜነጻጽር። ንኣብነት፡ ኣብ ራእይ 3:3፡ ምምጻእ የሱስ (ርእሰ ነገር) ምስ ሰራቒ (ስእሊ) ተነጻጺሩ ኣሎ።

• እቲ ርእሰ ነገር ምስቲ ስእሊ ብኸመይ ከም ዚመሳሰል ሕሰብ። ነቲ ርእሰ ነገር ምስቲ ስእሊ ዜመሳስሎ ነገራትን ባህርያትን ክትፈልጥ ጽዓር።

• ኣብ ቅኑዕ መደምደምታ ብጻሕ። ኣብ መንጎ ርእሰ ነገርን ስእልን ዘሎ ገሊኡ ምስስላት ናብ ግጉይ መደምደምታ ኸም እትበጽሕ ኪገብረካ ይኽእል እዩ። ንኣብነት፡ ኣብቲ ኣብ ላዕሊ ዝረኣናዮ ምሳሌ፡ የሱስ ኪሰርቕ ኣይኰነን ዚመጽእ። ኣብ ክንዳኡስ፡ ከም ሰራቒ ይመጽእ ኪብሃል ከሎ፡ ትጽቢት ከይተገብረሉ ብድንገት ከም ዚመጽእ እዩ ዜመልክት።