ኦብድያ—ፍርሃት ኣምላኽ ኣማዕብል

ኦብድያ ኣመሓዳሪ ቤት ንጉስ ኣከኣብ እዩ ነይሩ። ኣከኣብ ከኣ ነታ ምድሪ ብኣምልኾ በዓል ዝመልኣ እኩይ ንጉስ እዩ ነይሩ። ኰይኑ ግና፡ ኦብድያ “ኻብ ንእስነቱ ኣትሒዙ” ፍርሃት የሆዋ ኣማዕበለ። (1 ነገ. 18:1-13) ስለዚ፡ ንግስቲ ኢዛቤል ንዅሎም ነብያት የሆዋ ኸተጥፍኦም ምስ ተላዕለት፡ ኦብድያ ንውዲታ ንምፍሻል ብትብዓት ስጕምቲ ወሰደ። ኣብቲ እዋን እቲ፡ ንሓደ ነብዪ ምሕባእ ሓደገኛ ተግባር እዩ ነይሩ። ኦብድያ ግና 100 ነብያት ሓብአ፣ ብርቱዕ ጥሜት ኣብ ዝነበረሉ እዋን ድማ ይቕልቦም ነበረ። እቶም ንንጉስን ንንግስትን ዜገልግሉ ዝነበሩ ኣማእታት ናይ ሓሶት ነብያት ከይርእይዎ እናተጠንቀቐ ነዚ ተግባር እዚ ምግባር ቀሊል ከም ዘይነበረ ኽንግምቶ ንኽእል ኢና።—1 ነገ. 18:19።

ካብዚ ፍርሃት ኣምላኽ ዝነበሮ ሰብ እዚ እንታይ ንምሃር፧ ኦብድያ ንኣከኣብ ይፈርሆ እኳ እንተ ነበረ፡ ንኣምላኽ ግና ብዝያዳ ይፈርሆ ነበረ። በዚ ኸምዚ ኸኣ ንኣሕዋቱ ንምዕቋብ ህይወቱ ኣብ ሓደጋ ኼእቱ ዜኽእሎ ትብዓት ረኸበ። ንሕና እውን ዋላ እኳ ናይ ሓቂ ኣምልኾ ኣብ እተኣገደሉ ዓዲ እናነበርና፡ ፍርሃት ኣምላኽ ከነማዕብል ንኽእል ኢና። እዚ ፍርሃት እዚ ድማ፡ ኣብ ትሕቲ ፈተና ንዘለዉ ኣሕዋትናን ኣሓትናን ንምድጋፍ ብርታዐ ይዀነና።