ሰብኣይን ሰበይትን ሓዳሮም ብኸመይ የደልድሉ፧

ኣብርሃምን ሳራን ንሓድሕዶም ዚፋቐሩን ዚከባበሩን ሰብ ሓዳር እዮም ነይሮም፣ ንሰብ ሓዳር ከኣ ሰናይ ኣብነት ይዀንዎም እዮም። (ዘፍ 12:11-13፣ 1ጴጥ 3:6) ይኹን እምበር፡ ሓዳሮም ፍጹም ኣይነበረን፣ ኣብ ህይወቶም ፈተናታት ይጻወሩ ነይሮም እዮም። ሰብ ሓዳር ንኣብነት ኣብርሃምን ሳራን ብምምርማር እንታይ ኪምሃሩ ይኽእሉ፧

ንሓድሕድኩም ሓሳብ ንሓሳብ ተለዋወጡ። መጻምድትኻ ጕህዩ ወይ ተቘጢዑ ሕማቕ ዘረባ ምስ ዚዛረበካ፡ ኣብ ክንዲ እትሓርቕ ስለምንታይ ከምኡ ኸም ዝገበረ ኽትርድኣሉ ጽዓር። (ዘፍ 16:5, 6) ብሓንሳእ ግዜ ኸተሕልፉ ምድላዋት ግበሩ። ንመጻምድትኻ ኸም እተፍቅሮ ብቓልን ብግብርን ኣረጋግጸሉ። ልዕሊ ዅሉ፡ ብመጽናዕትን ብጸሎትን ሓቢርኩም ብምምላኽን ነቲ ምስ የሆዋ ዘሎኩም ርክብ ኣደልድልዎ። (መክ 4:12) ድልዱል ሓዳር፡ ነቲ መስራቲ እዚ ቕዱስ መሰናድዎ ዝዀነ የሆዋ ኽብሪ የምጽኣሉ እዩ።

ነታ ሓዳር ብኸመይ ይድልድል፧ ዘርእስታ ቪድዮ ርኣያ እሞ፡ ድሕሪኡ ነዚ ዚስዕብ ሕቶታት መልሶ፦

• ኣብቲ ድራማዊ ቪድዮ፡ ሻንን ኪያራን ይረሓሓቑ ኸም ዘለዉ ዜርኢ እንታይ ገለ ምልክታት ነይሩ፧

• ብቕንዕና ሓሳብ ንሓሳብ ምልውዋጥ ኣብ ሓዳር ኣገዳሲ ዝዀነ ስለምንታይ እዩ፧

• ኣብነት ኣብርሃምን ሳራን ንሻንን ኪያራን ዝሓገዞም ብኸመይ እዩ፧

• ሻንን ኪያራን ሓዳሮም ንምድልዳል እንታይ ስጕምትታት እዮም ወሲዶም፧

• ሰብኣይን ሰበይትን ካብ ሓዳሮም ፍጽምና ኺጽበዩ ዘይብሎም ስለምንታይ እዮም፧