ጽኑዕ ዕርድታት ነፍርስ ኣለና

¹ ሰይጣን ብናይ ሓሶት ትምህርትታትን ምትላላትን ኣቢሉ: ንዘመናት ዚኣክል ኣብ ልብን ኣእምሮን ሰባት ሓጹራት ሃኒጹ እዩ። ከም ስላሴ: ዘይትመውት ነፍሲ: ከምኡውን ገሃነም እሳት ዝኣመሰለ ሰረተ-እምነታት ከም ዜስፋሕፍሕ ገበረ። ብዛዕባ ህላወ ፈጣርን ሓቅነት መጽሓፍ ቅዱስን ምጥርጣር ዘርአ። ዓሌትነትን ሃገራውነትን እውን ሰባት ብርሃን ሓቂ ንኸይርእዩ ንምዕዋር ዚጥቀመሉ ሓጹር እዩ። (2 ቈረ. 4:4) ንኸምዚ ዝኣመሰለ ጽኑዕ ዕርድታት ብኸመይ ከነፍርሶ ንኽእል፧—2 ቈረ. 10:4, 5

² ምስ ስምዒት እተኣሳሰረ:- ሰባት: እቲ ንነዊሕ እዋን ዝኣመኑሉ ሃይማኖታዊ እምነታት ምስ ስምዒቶም ኣጸቢቑ ይተኣሳሰር እዩ። ገሊኦም ካብ ቍልዕነቶም ኣትሒዞም ጌጋ ዝዀነ ሃይማኖታዊ እምነታት ተማሂሮም እዮም። ንኸምዚኣቶም ዝኣመሰሉ ሰባት ምእንቲ ኽንሕግዞም: ንኣረኣእያኦም ብዜኽብር ኣገባብ ክንዛረብ የድልየና።—1 ጴጥ. 3:15

³ ንኸምዚኣቶም ዝኣመሰሉ ሰባት እንታይ ከም ዚኣምኑን ስለምንታይ ከምኡ ኢሎም ከም ዚኣምኑን ኪዛረቡ ብምፍቃድ ኣኽብሮት ከነርእዮም ንኽእል ኢና። (ያእ. 1:19) ገሊኦም ዜፍቅርዎ ሰብ ስለ ዝሞቶም እሞ እንደገና ኺርእይዎ ኻብ ዘለዎም ሃረርታ ተበጊሶም: ኣብቲ ነፍሲ ኣይትመውትን እያ ዚብል ትምህርቲ ይኣምኑ ይዀኑ። ወይ ምስ ስድራ ቤቶም ግዜ ምሕላፍ ባህ ስለ ዚብሎም: በዓላት የብዕሉ ይዀኑ። ነዚ ኺገልጹልና ኸለዉ ጽን ኢልካ ምስማዕ: ስምዒቶም ንኽንርዳእን ብውጽኢታዊ መገዲ ንኽንምልሰሎምን የኽእለና።—ምሳ. 16:23

⁴ ንየሱስ ምሰሎ:- የሱስ ንሕቶታት ሓደ ፈላጥ ሕጊ ኺምልስ ከሎ: ንዓና ዚኸውን ጽቡቕ ኣብነት ገዲፉ እዩ። የሱስ ቀጥታዊ መልሲ ኣይሃቦን። ከምኡ እንተ ዚገብር: እቲ ሰብኣይ እምነታቱ ኣብ ልቡ ኣጸቢቑ ሰሪቱ ስለ ዝነበረ ኣይምተቐበሎን ነይሩ ኪኸውን ይኽእል እዩ። ኣብ ክንዳኡ: ቅዱሳት ጽሑፋት ጠቒሱ ሓሳባቱ ኺገልጽ ዓደሞ፣ ምሳሌ ተጠቒሙ ድማ ኣረድኦ።—ሉቃ. 10:25-37

⁵ ሓቂ ቓል ኣምላኽ: ንጽኑዕ እምነታት ሓሶት ሃይማኖት ኬፍርስ ይኽእል እዩ። (እብ. 4:12) ንሓቂ ብዓቕሊ ብምግላጽ: ንሰማዕትና ነቲ ናይ ሓሶት እምነታት ነጺጎም ነቲ ሓራ ኼውጽኦም ዚኽእል ሓቂ ኸም ዚሕዙ ኽንገብሮም ንኽእል ኢና።—ዮሃ. 8:32