መላእኽቲ ይሕግዙና ኣለዉ
1 “እንሆ ድማ: ኣነ ኽሳዕ መወዳእታ ዓለም ኵሉ መዓልቲ ምሳኻትኩም እየ።” እዘን ቃላት እዚኣተን ነቶም ‘ስለዚ ኺዱ ደቀ መዛሙርቲ ግበሩ’ እትብል ትእዛዝ ክርስቶስ ዚፍጽሙ ዘበሉ ብዙሕ እየን ዜተባብዓዖም። (ማቴ. 28:18-20) ሓደ ኻብቲ የሱስ ምስቶም ናይ ሓቂ ክርስትያናት ዚዀነሉ ኣገዳሲ መዳይ ብመላእኽቱ ኣቢሉ እዩ። (ማቴ. 13:36-43) ምስቶም እሙናት መንፈሳውያን ፍጥረታት ኴንና ነዚ “ናይ ዘለኣለም ወንጌል” ምእዋጅናስ ባህ ዜብልዶ ኸይኰነ!—ራእ. 14:6, 7
2 ኣብ ኣገልግሎትና:- መጽሓፍ ቅዱስ: መላእኽቲ “ነገልግሎት እቶም ምድሓን ኪወርሱ ዘለዎም ዚለአኹ” ምዃኖም ይነግረና። (እብ. 1:14) ኣብ ቀዳማይ ዘመን መላእኽቲ ንሰዓብቲ ክርስቶስ ናብቶም ብቑዓት ሰባት ይመርሕዎም ነይሮም። (ግብ. 8:26) ኣብዚ ግዜናውን ኣገልገልቲ ኣምላኽ ብመላእኽቲ ይምርሑ እዮም። ኣብ ሓያሎ ኣጋጣሚታት ኣብ ቤቶም ኬድና እንረኽቦም ሰባት ናይ የሆዋ መሰኻኽር ቀቅድሚ ምዅሕኳሖም ሓገዝ ንኺረኽቡ ናብ ኣምላኽ ይጽልዩ ኸም ዝነበሩ ይዛረቡ እዮም። ከምዚኣቶም ዝኣመሰሉ ሰባት ነቲ መልእኽቲ መንግስቲ ኣምላኽ ምስ ዚቕበሉስ ንሕናውን ምስቶም መላእኽቲ ኽንደይ ኰን ኢና እንሕጐስ!—ሉቃ. 15:10
3 ተቓውሞ ምስ ዜጓንፈና:- የሆዋ በቶም “ሓያላትን ስልጡናትን” መላእኽቱ ገይሩ ንዳንኤልን ነቶም ሰለስተ እብራውያን ኣዕሩኽቱን: ንሃዋርያ ጴጥሮስ: ከምኡውን ከቢድ ፈተናታት ንዘጓነፎም ኣገልገልቱ ኣዕቚብዎም እዩ። (መዝ. 103:20፣ ዳን. 3:28፣ 6:21, 22፣ ግብ. 12:11) ምጽራር ኬጋጥመና ኸሎ ሓጋዚ ዘይብልና ዀይኑ እኳ እንተ ተሰማዓና: ንጊልያ ኤልሳእ “ካብቶም ምሳታቶም ዘለዉስ ምሳና ዘለዉ ይበዝሑ እዮም” ከም እተባህለሉ ብምዝካር ክንተባባዕ ንኽእል ኢና። (2 ነገ. 6:15-17) ካብ ክርስትያን ኣሕዋትና ብግዲ እኳ እንተ ተፈለና: ተስፋ ኣይንቝረጽ። ቃል ኣምላኽ “መልኣኽ እግዚኣብሄር ኣብ ዙርያ እቶም ዚፈርህዎ ይሰፍር” ብምባል የተባብዓና።—መዝ. 34:7
4 ኣብዚ ቐረባ እዋን ናይ መላእኽቲ ሰራዊት ነቶም ንግስና ክርስቶስ ዚቃወሙ ብምሉኦም ኬጥፍእዎም እዮም። (ራእ. 19:11, 14, 15) ክሳዕ ሽዑ እምበኣር እቶም ኣብ ትሕቲ መሪሕነት ክርስቶስ ዘለዉ ሰማያውያን ሰራዊት ከም ዚድግፉና ምሉእ ብምሉእ ብምትእምማን: ንየሆዋ ብትብዓት ምውዳስ ንቐጽል።—1 ጴጥ. 3:22