ብትብዓትዶ ትሰብኽ ኢኻ፧
1 ጴጥሮስን ዮሃንስን ድሕሪ ምእሳሮምን እቶም ተጻረርቶም ምስ ኣፈራርህዎምን ነቲ መልእኽቲ መንግስቲ ኣምላኽ ብትብዓት ካብ ምስባኽ ኣየቋረጹን። (ግብ. 4:17, 21, 31) ኣብዚ እዋን እዚ ብትብዓት ምስባኽ ክበሃል ከሎ እንታይ ማለት ኢዩ፧
2 ብትብዓት ምምስካር:- ምስታ “ተባዕ” እትብል ቃል እትመሳሰል እታ “ደፋር” እትብል ቃል ኢያ: እዚኣ ድማ “ድምብርጽ ዘይምባል: ጽንዓት: ከምኡውን ሓቦ” ዝብል ትርጕም ኣለዋ። ንሓቀኛታት ክርስትያናት ብትብዓት ምስባኽ ክበሃል ከሎ እቲ ብስራት ንኻልኦት ንምክፋል ጽቡቕ ኣጋጣሚ ክፍጠር ከሎ ንኽትዛረብ ዘይምፍራህ ማለት ኢዩ። (ግብ. 4:20፣ 1 ጴጥ. 3:15) ብኻልእ ኣዘራርባ በቲ ብስራት ኣይንሓፍርን ኢና ማለት ኢዩ። (መዝ. 119:46፣ ሮሜ 1:16፣ 2 ጢሞ. 1:8) ስለዚ እምበኣር ትብዓት ኣብዚ ግዜ መወዳእታ ነቲ ብስራት ክንሰብኽ እተዋህበና መዝነት ንምፍጻም ዘድሊ ባህሪ ኢዩ። ኣብ ዝዀነ ይኹን ቦታ ንዝርከቡ ሰባት እቲ ብስራት ንኸነካፍሎም ይድርኸና።—ግብ. 4:29፣ 1 ቈረ. 9:23
3 ኣብ ቤት ትምህርቲ ዝርአ ትብዓት:- ፍርሂ ወይ ሕንኪ ንመማህርትኻ ንኸይትሰብኽ ዕንቅፋት ይዀነካዶ ኢዩ፧ ንመማህርትኻ ምስባኽ ሓድሓደ ግዜ ከቢድ: አረ በዳሂ እውን ክኸውን ይኽእል ኢዩ። እንተዀነ ግን: ንኻልኦት ንምስባኽ ትብዓት ክህበካ ናብ የሆዋ እንተድኣ ጸሊኻ: ንሱ ከበርትዓካ ኢዩ። (መዝ. 138:3) ትብዓት ናይ የሆዋ ምስክር ምዃንካ ንኸተፍልጥን ዝመጽእ ላግጺ ንኽትጻወርን ክሕግዘካ ኢዩ። ኣብ ቤት ትምህርቲ እትገብሮ ስብከት ከኣ ነቶም ዝሰምዑኻ ከድሕን ይኽእል ኢዩ።—1 ጢሞ. 4:16
4 ኣብ ስራሕ ዝርአ ትብዓት:- ኣብ ስራሕካ ናይ የሆዋ ምስክር ከም ዝዀንካ ዲኻ እትፍለጥ፧ መሳርሕትኻ ነቲ ብስራት ክሰምዕሉ ዝኽእሉ እንኮ መገዲ ንስኻ እንተ ሰቢኽካሎም ክኸውን ይኽእል ኢዩ። ተባዕ እንተድኣ ዄንካ ኣብ ናይ ጉባኤን ዓበይትን ክርስትያናዊ ኣኼባታት ንኽትካፈል ፍቓድ ኣብ እትሓተሉ ግዜ እውን ክሕግዘካ ኢዩ።
5 ኣብ ትሕቲ ፈተና ተባዕ ምዃን:- ተቓውሞ ከጋጥመና ኸሎ ተባዓት ምዃን ኣዝዩ ኣድላዪ ኢዩ። (1 ተሰ. 2:1, 2) ትብዓት እንተሎና ምፍርራህ: ላግጺ: ወይ ብቐጥታ መስጐጕቲ ክወርደና ኸሎ እምነትና ኣጽኒዕና ንኽንሕዝ ይሕግዘና። (ፊል. 1:27, 28) ካብቲ ኣብ ስርዓታት የሆዋ ኣምላኽና ዘሎና ኣቕዋም ንኽንለማመጥ ጸቕጢ ክወርደና ኸሎ ጸኒዕና ንኽንቅጽል የኽእለና። ካልኦት ክጻረሩና ኸለዉ ሰላማውያን ኴንና ንኽንቅጽል የበርትዓና።—ሮሜ 12:18
6 ብብሕትና ዝዀነ ይኹን ጸገማት የጋጥመና ብዘየገድስ: ጸኒዕና ብትብዓት ነቲ ብስራት ንስበኽ።—ኤፌ. 6:18-20