ትሕዝቶ

ኣብ ህይወትና ብዙሕ ጸቕጢ ኼጋጥመና ኸሎ፡ እንታይ ኢና እንገብር፧ እዛ ዓንቀጽ እዚኣ፡ ብዛዕባ ዓመት ጥቕሲ 2018 ትገልጽ። የሆዋ ኼበርትዓና ስለምንታይ ክንፈቕደሉ ኸም ዘሎናን ብኸመይ ኬበርትዓና ኸም ዚኽእልን እውን ትገልጽ።

እቲ በብዓመቱ ዚብዓል በዓል ዝኽሪ ሞት ክርስቶስ፡ ቀዳም፡ 31 መጋቢት 2018 ኪውዕል እዩ። ካብ ሕጂ ኣትሒዝና ነዚ በዓል እዚ ኽንዳሎን ኣብኡ ብምእካብና ኽንጥቀምን እንኽእል ብኸመይ ኢና፧ እዚ ዓመታዊ ፍጻመ እዚ፡ ንሓድነት ህዝቢ ኣምላኽ ዜደልድሎኸ ብኸመይ እዩ፧ ንመልሲ እዚ ሕቶታት እዚ፡ ኣብዛ ዓንቀጽ እዚኣ ኽትረኽቦ ኢኻ።

ዘሎና ዘበለ ዅሉ ኻብ የሆዋ ዝረኸብናዮ እዩ። ይኹን እምበር፡ ብገንዘብና ንዕዮ ውድቡ ኽንድግፍ ይደልየና እዩ። እዛ ዓንቀጽ እዚኣ፡ ንየሆዋ ብጥሪትና ኸነኽብሮ ዜድልየና ስለምንታይ ከም ዝዀነን ከምኡ ብምግባርና ብኸመይ ከም እንጥቀምን ክትገልጽ እያ።

ካብዘን ዓንቀጻት እዚአን እታ ቐዳመይቲ፡ ናይ ሓቂ ሓጐስ ንኣምላኽ ብምፍቃር ደኣ እምበር፡ ነቲ ኣብዘን “ዳሕሮት መዓልትታት” ኣስፋሕፊሑ ዘሎ ጥቕሚ ርእሳ እትደሊ ዓይነት ፍቕሪ ብምምዕባል ከም ዘይርከብ ክትገልጽ እያ። (2 ጢሞ. 3:1) እታ ኻልአይቲ ዓንቀጽ ከኣ፡ እቲ ኣብዘን ዳሕሮት መዓልትታት ዚነብሩ ሰባት ዜንጸባርቕዎ ባህርያት ካብቲ ህዝቢ ኣምላኽ ዜንጸባርቕዎ ባህርያት ብኸመይ ኣዝዩ ኸም ዚፍለ ኽትገልጽ እያ።