ሕታም መጽናዕቲ

መወዳእታ እዚ እኩይ ስርዓት ሰይጣን ኣብ ዚቐርበሉ ዘሎ እዋን፡ ብመንፈሳዊ መዳይ ክንድቅስ የብልናን። እዛ ዓንቀጽ እዚኣ፡ ንጸሎት ንቑሕ ምዃን፡ ብመንፈሳዊ መዳይ ንቑሓት ንኽንከውን ብኸመይ ከም ዚሕግዘና ትገልጽ።

ኣብዛ ዓንቀጽ እዚኣ፡ ካብቲ ነብዪ ሚክያስ ዘርኣዮ ትዕግስቲ እንታይ ክንመሃር ከም እንኽእል ክንምርምር ኢና። የሆዋ ነዚ እኩይ ስርዓት እዚ ዜጥፍኣሉ እዋን ከም ዝቐረበ ዚሕብር ፍጻመታት እንታይ ምዃኑ መርምር። ብዘይካዚ፡ ንትዕግስቲ ኣምላኽ ዘሎና ሞሳ ኸነርኢ እንኽእል ብኸመይ ምዃኑ ርአ።

እቲ ሰናክሬብ ኣብ ልዕሊ የሩሳሌም ብዛዕባ ዘውረዶ መጥቃዕቲ ዚገልጽ ጸብጻብ፡ ንዓና ዚኸውን ግብራዊ ትምህርቲ ዝሓዘ እዩ። ኣብዛ ዓንቀጽ እዚኣ ዚርከብ ትምህርቲ፡ ነቶም ንክርስትያናዊት ጉባኤ ኺጓስዩ ሓላፍነት እተዋህቦም ኣሕዋት ፍሉይ ኣገዳስነት ኣለዎ።

እታ ናይ መጀመርታ ዓንቀጽ፡ ብዛዕባ እቲ የሆዋን የሱስን ሎሚ ንምድራዊ መጓሰኦም ዚጓስዩሉ ዘለዉ መገድን እተን ኣባጊዕ ነቲ ዚጓሰያሉ መገዲ እንታይ ምላሽ ኪህባ ኸም ዘለወንን ትገልጽ። እታ ኻልአይቲ ዓንቀጽ ድማ፡ ሽማግለታት ከም ንኡሳን ጓሶት ኰይኖም ኪዓይዩ ኸለዉ፡ እንታይ ዓይነት ኣመለኻኽታ ኺህልዎም ከም ዚግባእ ትሕብር።