ቀለቤት ወርቂ እተሰለሙ
ካብ ጥንቲ ኣትሒዙ: ስልማት ወርቂ ብዋጋኡን ጽባቔኡን ኣዝዩ ክቡር ኢዩ። ዮሴፍ ኣብ ግብጺ ቀዳማይ ሚኒስተር ኰይኑ ምስ ተሸመ: ፈርኦን ኣብ ክሳዱ ድሪ ወርቂ ገበረሉ። (ዘፍጥረት 41:42) ርብቃ በዚ ናይ ሎሚ ዋጋ ክግመት ከሎ ዳርጋ $1,400 (ናይ ኣመሪካ) ዘውጽእ ናይ ኣፍንጫ ቐለቤት ወርቅን ክልተ ኣምባር ወርቅን ተዋህባ። (ዘፍጥረት 24:22) ነዚ ኽቡር ህያባት እዚ ብምስጋና ከም እተቐበልዎን ተሓጒሶም ድማ ከም እተሰለምዎን ኣየጠራጥርን ኢዩ።
መጽሓፍ ቅዱስ ካብቲ ዮሴፍን ርብቃን እተሰልምዎ ንላዕሊ ዝያዳ ኽቡር ዝዀነ ምሳልያዊ ስልማት ከም ዘሎ ይዛረብ ኢዩ። ምሳሌ 25:12 ከምዚ ትብል:- “ንትሰምዕ እዝንስ ጥበበኛ ገሳጺ ኸም ቀለቤት ወርቅን ከም ስልማት ጽሩይ ወርቅን እዩ።” ሓደ ተግሳጽ ዝህብ ሰብ ኣብ ናይ ገዛእ ርእሱ ኣተሓሳስባ እተመርኰሰ ዘይኰነስ ኣብ ቃል ኣምላኽ እተመስረተ ምኽሪ ምስ ዝህብ ብሓቂ ክቡር ህያብ ኢዩ ዝውፊ ዘሎ። ስለምንታይ፧ ምኽንያቱ ከምዚ ዝበለ ምኽሪ ካብ የሆዋ ኢዩ ዝመጽእ። መጽሓፍ ቅዱስ ከምዚ ይብለና:- “ወደየ: ከምቲ ኣቦ ንዘፍቅሮ ውሉዱ ዚቐጽዖ: ከምኡ ኸኣ እግዚኣብሄር ንዘፍቀሮ ይቐጽዖ እዩ እሞ: ተግሳጽ እግዚኣብሄር ኣይትንዐቕ: እንተ ቐጽዓካ ኸኣ ኣይትመረር።” (ምሳሌ 3:11, 12) እቲ ሰማዒ ነቲ ምኽሪ ብትሕትና ተቐቢሉ ኣብ ግብሪ ምስ ዘውዕሎ: ንገዛእ ርእሱ ብቐለቤት ወርቂ ይስልማ ከም ዘሎ ኢዩ። ልክዕ ከምቲ መንፈስ ዝነፈሶ ናይ መጽሓፍ ቅዱስ ምስላ ዝብሎ ኢዩ:- “እቲ ጥበብ ዚረክብ: ኣእምሮውን ዜጥሪ ሰብ ብጹእ እዩ። ከመይሲ ኻብቲ ብሩር ዜጥሪ ንእኣ ዜጥሪ ይበልጽ: እቲ ብእኣ ዚርከብ ረብሓ ኸኣ ካብ ጽሩይ ወርቂ ይበልጽ እዩ።”—ምሳሌ 3:13, 14