“ባሮት ጐይታና ክርስቶስ ኩኑ”
ኣብ ምሉእ ታሪኽ: ብሚልዮናት ዝቝጸሩ ሰባት ናይ ባርነት ጾር ክስከሙ ጸኒሖም ኢዮም። ንኣብነት: እስራኤላውያን: ኣሽሓት ዓመታት ይገብር ኣብ ኢድ ግብጻውያን ጐይተት ብዙሕ ስቓይ ኣሕሊፎም ኢዮም። ከምቲ መጽሓፍ ቅዱስ ዝገልጾ: ብፍላይ ኣብ ምስራሕ ሕጡብ ‘ብብርቱዕ ዕዮ ምእንቲ ኼጽብቡሎም ኣዘዝቲ ሸሙሎም።’—ዘጸኣት 1:11
ኣብዘን ሎሚ ዘለዋ ብዙሓት ሃገራት: ሰባት ልክዕ ብኸምዚ ዓይነት መገዲ ባሮት ኣይኰኑን ይዀኑ: ብዙሓት ግን ኣብ ትሕቲ ኣድካሚ: ሓድሓደ ግዜ ድማ ዘይምቹእ: ኵነታት ንነዊሕ ሰዓታት ክሰርሑ ኣለዎም። ኣብ ትሕቲ ቁጠባዊ ባርነት ተባሂሉ ክጽዋዕ ዝኽእል ከቢድ ዓይነት ጾር ኢዮም ዘለዉ።
ይኹን እምበር: ጾር ዘይኰነ ሓደ ዓይነት ባርነት ኣሎ። ሃዋርያ ጳውሎስ ንኣመንቲ ብጾት ከምዚ ብምባል ተማሕጸኖም:- “ባሮት ጐይታና ክርስቶስ ኩኑ።” (ቈሎሴ 3:24 NW ) እቶም ባሮት ክርስቶስ ክዀኑ ዝመርጹ ሰባት ካብቲ ዘለዎም ከቢድ ጽዕነት ዕረፍቲ ይረኽቡ ኢዮም። የሱስ ባዕሉ ከምዚ በለ:- “ኣቱም ኵልኹም እትጽዕሩን ጾር ዝኸበደኩምን: ኣነ ኸዕርፈኩም ናባይ ንዑ። ኣነ ለዋህ እየ: ልበይ ትሑት: ኣርዑተይ ፈኵሽ: ጾረይውን ቀሊል እዩ እሞ: ኣርዑተይ ጹሩ ኻባይውን ተምሀሩ: ንነፍስኹም ከኣ ዕረፍቲ ኽትረኽቡ ኢኹም።”—ማቴዎስ 11:28-30
ኣርዑት ክርስቶስ ምቕባል ንሓደ ሰብ ካብቲ ንስድራቤቱ ብስጋ ዘድሊ ንኽቕርብ ዘለዎ ግዴታ ናጻ ኣይገብሮን ኢዩ። (1 ጢሞቴዎስ 5:8) ይኹን እምበር: ካብቲ ደድሕሪ ስጋዊ ነገራት ብምስዓብ ዝመጽእ ብዙሕ ሕልኽላኻት ናጻ ይገብር ኢዩ። ክርስትያናት ስጋዊ ምቾት ምርካብ ኣብ ህይወቶም እቲ ቐንዲ ነገር ኣብ ክንዲ ዝገብርዎ: በቲ መሰረታዊ ዝዀነ ነገራት ዕግበት ይረኽቡ።—1 ጢሞቴዎስ 6:6-10፣ ምስ 1 ቈረንቶስ 7:31 ኣረኣእዮ።
ክርስትያናት ነቲ “ብስራት” መንግስቲ ኣምላኽ ንምስባኽ ዘለዎም ሓላፍነት ክፍጽሙ ከለዉ እውን ዕረፍቲ ይስምዖም ኢዩ። (ማቴዎስ 24:14) እዚ ናይ ሓቂ ሓጐስን ዕግበትን ኢዩ ዘምጽእ!
“ባሮት ጐይታና ክርስቶስ” ክንከውን ብምኽኣልና መመስገንቲ ክንከውን ኣሎና!
[ኣብ ገጽ 32 ዘሎ ምንጪ ስእሊ]
Pictorial Archive (Near Eastern History) Est.