የሱስ ዓብዪ ጽልዋ ዘለዎ ትንቢት ተነበየ

የሱስ ኣብቲ ንየሩሳሌምን ንቤተ መቕደሳን ከተማዕድወሉ እትኽእል ደብረ ዘይቲ ተቐሚጡ ኸሎ፡ ኣርባዕተ ኻብ ደቀ መዛሙርቱ ኣቐዲሙ ብዛዕባ እተዛረቦ ነገር ሓተትዎ። ቀቅድሚ እቲ ዝቐረበሉ ሕቶ፡ እታ ኣብ የሩሳሌም ዝነበረት ቤተ መቕደስ ከም እትዓኑ ተዛሪቡ ነይሩ እዩ። ኣቐዲሙ ኸኣ፡ ብዛዕባ “መወዳእታ ዓለም፡” ማለት ብዛዕባ መደምደምታ እዚ ስርዓት እዚ፡ ነጊርዎም ነይሩ እዩ። (ማቴዎስ 13:40, 49) ስለዚ እቶም ሃዋርያቱ፡ “ትእምርቲ ምምጻእካን መወዳእታ ዓለምንከ እንታይ እዩ፧” ኢሎም ሓተትዎ።—ማቴዎስ 24:3።

የሱስ ኪምልሰሎም ከሎ፡ ቀቅድሚ ጥፍኣት የሩሳሌም ብዛዕባ ዚኸውን ነገራት ነገሮም። እቲ ቓላቱ ግን፡ ካልእ ዝሰፍሐ ትርጕም እውን ነይርዎ እዩ። ሽዑ እተነበዮ ትንቢት፡ ኣብ ብዘላ ዓለም ብዝዓበየ መገዲ ኺፍጸም ነበሮ። የሱስ ብዛዕባ እቲ ኸም ትእምርቲ ወይ ምልክት ዚኸውን እተፈላለየ ፍጻመታትን ኵነታትን ተነበየ። እቲ ምልክት፡ ነቶም ኣብ ምድሪ ዚነብሩ ሰባት፡ የሱስ ኣብ ሰማይ ንጉስ ኰይኑ ይገዝእ ከም ዘሎ ዚሕብር እዩ። ብኻልእ ኣበሃህላ፡ የሆዋ ኣምላኽ ንየሱስ፡ ንጉስ እታ ቕድሚ ነዊሕ እዋን መብጽዓ እተገብረላ መሲሓዊት መንግስቲ ኸም ዝገበሮ ዜመልክት እዩ። እዚ ድማ፡ እታ መንግስቲ ንእከይ እተወግደሉን ንደቂ ሰብ ናይ ሓቂ ሰላም እተምጽኣሉን ግዜ ኸም ዝቐረበ ዚሕብር እዩ። ስለዚ፡ እቲ የሱስ እተነበዮ ትንቢት፡ ዳሕሮት መዓልትታት እዚ ሕጂ ዘሎ ኣረጊት ሃይማኖታውን ፖለቲካውን ማሕበራውን ስርዓት ኣብቂዑ፡ ሓድሽ ስርዓት ድማ ዚጅምር ዚሕብር እዩ።

የሱስ ንጉስ ኰይኑ ኣብ ሰማይ ኪገዝእ ከሎ፡ ኣብ ምድሪ ውግእን ጥሜትን ዓብዪ ምንቅጥቃጥ ምድርን ፌራን ከም ዚኸውን ሓበረ። ዓመጻ ኸም ዚበዝሕ ገለጸ። ናይ ሓቂ ደቀ መዛሙርቱ፡ ብስራት መንግስቲ ኣምላኽ ኣብ ብዘላ ምድሪ ኸም ዚሰብኩ ነገረ። እዚ ዅሉ፡ ኣብቲ ኸምኡ ዝበለ ዀይኑ ዘይፈልጥ “መከራ” ኼብቅዕ እዩ።—ማቴዎስ 24:21።

ሰዓብቲ የሱስ እቲ መከራ መዓስ ከም ዚጅምር ብኸመይ ኪፈልጡ ይኽእሉ፧ የሱስ፡ “ካብ ኦም በለስ ተምሀሩ” በለ። (ማቴዎስ 24:32) ጨናፍራ ኺጥጥዕ ከሎ፡ ክረምቲ ኸም ዝቐረበ ይሕብር። ብተመሳሳሊ፡ ኵሉ እቲ የሱስ እተነበዮ ትእምርቲ ወይ ምልክት፡ ኣብ ሓደ እዋን ኪፍጽም ከሎ፡ መወዳእታ ኸም ዝቐረበ ኺፍለጥ ይከኣል። እታ መዓልቲ እቲኣን እታ ሰዓት እቲኣን ግን፡ ኣቦ ጥራይ ከም ዚፈልጣ፡ የሱስ ገለጸ። ስለዚ፡ ንደቀ መዛሙርቱ፡ “እቲ ጊዜኡ መኣዝ ምዃኑ ኣይትፈልጥዎን ኢኹም እሞ፡ ተጠንቀቑ፡ ንቕሑ” በሎም።—ማርቆስ 13:33።

—ኣብ ማቴዎስ ምዕራፍ 24ን 25ን፣ ማርቆስ ምዕራፍ 13፣ ሉቃስ ምዕራፍ 21 እተመስረተ።