ንህይወት ዚጠቅም ጥበብ ኣምላኽ

የሆዋ ጥበበኛ ገዛኢ ድዩ፧ ነዛ ሕቶ እዚኣ መልሲ ኽንህበሉ እንኽእል ሓደ ወሳኒ መገዲ፡ ነቲ ንሱ ዚህቦ ምኽሪ ምምርማር እዩ። ምኽሩ ዚዓዪ ድዩ፧ ኣብ ግብሪ እንተ ኣውዒልናዮ፡ ንህይወትና ዝሓሸን ዝያዳ ትርጕም ዘለዎን ይገብሮ ድዩ፧ እቲ ጥበበኛ ንጉስ ሰሎሞን ብኣማእታት ዚቝጸር ምስላታት ጽሒፉ ነይሩ እዩ። እቲ ምስላታቱ፡ ዳርጋ ንዅሉ መዳይ ህይወት ዚትንክፍ እዩ። ገለ ኣብነታት እስከ ንርአ።

እምንቶኻ ኣብ ኣምላኽ ምግባር። ምስ የሆዋ ጽቡቕ ርክብ ኪህልወና እንተ ዀይኑ፡ ብእኡ ኽንእመን ኣሎና። ሰሎሞን፡ “ብምሉእ ልብኻ ብእግዚኣብሄር ተአመን፡ ኣብ ልቦናኻ ኣይትጸጋዕ፡ ኣብ ኵሉ መገድኻ ንእኡ ሕሰብ፡ ንሱ ኸኣ ኣኻይዳኻ ኬቕንዕ እዩ” ኢሉ ጸሓፈ። (ምሳሌ 3:5, 6) ካብ ኣምላኽ መምርሒታት ብምንዳይን ንዕኡ እዙዛት ብምዃንን ብእኡ ንእመን እንተ ዄንና፡ ህይወትና ዓሚቝ ትርጕም ይህልዎ እዩ። ሰብ በዚ ኸምዚ እንተ ተመላሊሱ፡ ንልቢ የሆዋ የሐጕሶ፡ የሆዋ ድማ ነቲ ተጻራሪኡ ሰይጣን ዚኸውን ምላሽ ይረክብ።—ምሳሌ 27:11።

ምስ ካልኦት ንዘሎካ ርክብ ብጥበብ ምሓዝ። እቲ ኣምላኽ ንሰብኡትን ኣንስትን ውሉዳትን ዝሃቦም ምኽሪ፡ ሎሚ ኻብ ቅድሚ ሕጂ ንላዕሊ ኣገዳስነት ኣለዎ። ኣምላኽ፡ ሰብኣይ ንሰበይቱ እሙን ኪኸውን ከም ዚግባእ መምርሒ ኺህብ ከሎ፡ “በታ ሰበይቲ ንእስነትካ ባህ ይበልካ” ዚብል ምኽሪ ሂቡ ኣሎ። (ምሳሌ 5:18-20) ብሰብኣያን ደቃን ብዛዕባ እትነኣድ ወሓለ ሰበይቲ ጽቡቕ ገይሩ ዚገልጽ ሓሳብ ኣብ መጽሓፍ ምሳሌ ስለ ዘሎ፡ ኣንስቲ ሓዳር ካብኡ ኺጥቀማ ይኽእላ እየን። (ምሳሌ፡ ምዕራፍ 31) ውሉዳት ከኣ ንወለዶም ኪእዘዙ መምርሒ ተዋሂብዎም ኣሎ። (ምሳሌ 6:20) እዛ መጽሓፍ እዚኣ፡ ንርእስኻ ምፍላይ ናብ ትምኒትካ ኸም እተተኵር ስለ ዚገብር፡ ዕርክነት ኣገዳሲ ምዃኑ ተጕልሕ። (ምሳሌ 18:1) ፈተውትና እንተ ንጽቡቕ እንተ ንሕማቕ ኪጸልዉና ስለ ዚኽእሉ፡ ተጠንቂቕና ኽንመርጾም ኣሎና።—ምሳሌ 13:20፣ 17:17።

ንርእስኻ ብጥበብ ምሓዝ። መጽሓፍ ምሳሌ፡ ኣልኮላዊ መስተ ብዛዕባ ዘይምብዛሕ፡ ብዛዕባ ጠቓምን ጐዳእን ስምዒታት፡ ከምኡውን ጻዕረኛ ብዛዕባ ምዃን፡ ብዋጋ ዘይሽነን ምኽሪ ሒዛ ኣላ። (ምሳሌ 6:6፣ 14:30፣ 20:1) በቲ ምስ ምኽሪ ኣምላኽ ዘይቃዶ ሰብኣዊ ምምዝዛን እንተ ተኣሚንና፡ ናብ ጥፍኣት ከም ዚመርሓና ተጠንቅቐና። (ምሳሌ 14:12) “ህይወት ካብኡ እያ እትፍልፍል” ድሕሪ ምባል እውን፡ ንውሽጣዊ እንታይነትና፡ ማለት ንልብና፡ ካብ ዜበላሹ ጽልዋታት ክንሕልዎ ትላበወና።—ምሳሌ 4:23።

ኣብ ብዘላ ዓለም ዚርከቡ ሚልዮናት ሰባት፡ በዚ ምኽሪ እዚ ብምምልላስ፡ ዝሓሸ ህይወት ኪህልዎም ክኢሉ እዩ። ከም ውጽኢቱ ድማ፡ ንየሆዋ ኸም ገዛኢኦም ገይሮም ንኪቕበልዎ እኹል ምኽንያት ኣለዎም።

—ኣብ መጽሓፍ ምሳሌ እተመስረተ።