జూదమాడడం పాపమా?

బైబిలు ఇచ్చే జవాబు

జూదమాడడం గురించి బైబిలు ఎక్కువగా చెప్పడం లేదు, కానీ దానిలోని సూత్రాల్ని బట్టి, జూదం దేవుని దృష్టిలో పాపమని మనం అర్థం చేసుకోవచ్చు.—ఎఫెసీయులు 5:17.a

• జూదమాడేవాళ్లు పేరాశతోనే ఆ పని చేస్తారు. దేవుడు పేరాశను (లోభత్వాన్ని) ద్వేషిస్తాడు. (1 కొరింథీయులు 6:9, 10; ఎఫెసీయులు 5:3, 5) ఎదుటివాళ్లు నష్టపోగా వచ్చే డబ్బు కోసం వాళ్లు ఆశపడతారు. కానీ, ఇతరుల వస్తువులను లేదా డబ్బును ఆశించడం తప్పని బైబిలు చెప్తుంది.—నిర్గమకాండము 20:17; రోమీయులు 7:7; 13:9, 10.

• తక్కువ డబ్బు కోసమే జూదమాడినా, దానివల్ల మనలో డబ్బు మీద ప్రేమ కలుగుతుంది. అది చివరికి నాశనానికి నడిపిస్తుంది.—1 తిమోతి 6:9, 10.

• జూదమాడేవాళ్లు చాలావరకు మూఢనమ్మకాల మీద, అదృష్టం మీద ఆధారపడతారు. కానీ యెహోవా అలాంటివాటిని విగ్రహారాధనగా దృష్టిస్తాడు. అలాంటి విగ్రహారాధనకు దేవుని ఆరాధనతో పోటీపడే అర్హత లేదు.—యెషయా 65:11.

• ఏమాత్రం కష్టపడకుండా, తిని కూర్చోవడాన్ని బైబిలు సమర్థించడం లేదు, కష్టపడి పనిచేయమని అది మనల్ని ప్రోత్సహిస్తోంది. (ప్రసంగి 2:24; ఎఫెసీయులు 4:27, 28) ఆ సలహాను పాటించేవాళ్లు ‘సొంతగా సంపాదించుకున్న ఆహారం’ భుజించగలుగుతారు.—2 థెస్సలొనీకయులు 3:10, 12.

• జూదమాడడం వల్ల మనలో పోటీతత్వం పెరుగుతుంది. బైబిలు పోటీతత్వాన్ని ఖండిస్తోంది.—గలతీయులు 5:26.