“నేను భయపడను”

1. ధైర్యం గురించి మాట్లాడుకోవడానికి ఇంకేం లేదా?

ఈ పుస్తకం మొత్తం చదివేశాం, చాలామంది గురించి తెలుసుకున్నాం. ధైర్యం గురించి మాట్లాడుకోవడానికి ఇంకేం లేదా? మనలో ధైర్యాన్ని నింపే చాలామంది ఉదాహరణలు బైబిల్లో ఇంకా ఉన్నాయి. అవి ఒక్క పుస్తకంలో సరిపోయేవి కావు. అయితే ధైర్యం చూపించడానికి మనం ఏం చేయాలో, మనకు ఏం కావాలో ఇప్పుడు చూద్దాం.

2. యెహోవాకు నమ్మకంగా ఉంటూ ధైర్యం చూపించిన వాళ్లలో ఇంకెవరైనా మీకు గుర్తొస్తున్నారా?

² ఈ పుస్తకంలో చెప్పిన వాళ్లు కాకుండా, బైబిల్లో తిరుగులేని ధైర్యం చూపించిన వాళ్లు ఇంకెవరైనా మీకు గుర్తొస్తున్నారా? బహుశా మీకు యెషయా, యిర్మీయా, యెహెజ్కేలు, యోనా, మలాకీ లాంటి హీబ్రూ లేఖనాల్లో ఉన్న ప్రవక్తలు గుర్తొచ్చి ఉంటారు. అపొస్తలుడైన పౌలు చెప్పిన కొన్ని కష్టాల్ని వాళ్లు కూడా అనుభవించారు. కొంతమంది ‘ఎగతాళికి గురయ్యారు, కొరడా దెబ్బలు తిన్నారు, బంధించబడ్డారు, చెరసాల పాలయ్యారు.’ ఇంకొంతమంది “చాలీచాలని పరిస్థితుల్లో జీవించారు, శ్రమలు ఎదుర్కొన్నారు, ప్రజలు తమతో చెడుగా వ్యవహరించినప్పుడు సహించారు.” మరికొంతమందిని చంపేశారు. (హెబ్రీ. 11:36, 37) అయినా, వాళ్లంతా ధైర్యం చూపిస్తూ యెహోవా వైపు నిలబడ్డారు.

3-4. రాజైన దావీదు ప్రమాదంలో ఉన్నప్పుడు, బైబిల్లో పేర్లు లేని ఇద్దరు స్త్రీలు ఎలా సహాయం చేశారు?

³ ధైర్యం చూపించిన వాళ్లలో చాలామంది పేర్లు బైబిల్లో లేవు. ఉదాహరణకు, రాజైన దావీదు కాలంలో ఉన్న ఇద్దరు స్త్రీల గురించి ఆలోచించండి. అబ్షాలోము తన తండ్రైన దావీదును చంపాలని అనుకున్నప్పుడు ఆ స్త్రీలు దావీదుకు సహాయం చేశారు. క్రూరుడు, పొగరుబోతు అయిన అబ్షాలోము తన తండ్రి సింహాసనాన్ని చేజిక్కించుకోవాలని అనుకున్నాడు. అప్పుడు దావీదు యెరూషలేమును వదిలి పారిపోవాల్సి వచ్చింది. ఆయన సాదోకు అనే యాజకుడిని యెరూషలేముకు తిరిగి వెళ్లమని, అబ్షాలోము పన్నాగాల్ని తెలుసుకుని తనకు చేరవేయమని చెప్పాడు. సాదోకు తను తెలుసుకున్న సమాచారాన్ని దావీదు ఇద్దరు సేవకులకు చెప్పడానికి ‘ఒక సేవకురాలిని’ పంపించాడు. ఆమె తన ప్రాణాల్ని పణంగా పెట్టి వాళ్లకు విషయం చెప్పింది. ఆ ఇద్దరు సేవకులు దావీదు దగ్గరికి బయల్దేరినప్పుడు, ఒక యువకుడు వాళ్లను చూసి అబ్షాలోముకు చెప్పాడు. దాంతో ఆ సేవకులు తెలివిగా ఒక బావిలో దాక్కున్నారు. అప్పుడు ఆ బావి యజమాని భార్య, బావి మీద ఒక బట్టను కప్పి ధాన్యాన్ని ఆరబోసింది. అబ్షాలోము మనుషులు దావీదు సేవకుల్ని వెతుక్కుంటూ వచ్చినప్పుడు ఆమె వాళ్లను తప్పుదారి పట్టించింది. ఆ ఇద్దరు స్త్రీల పేర్లు బైబిల్లో లేవు. కానీ, వాళ్లు చూపించిన ధైర్యం వల్ల యెహోవా ఎంచుకున్న రాజు కాపాడబడ్డాడు!—2 సమూ. 15:23-37; 17:8-22.

⁴ బైబిల్లో ధైర్యం చూపించిన స్త్రీపురుషుల ఉదాహరణలు బోలెడన్ని ఉన్నాయి. వాళ్లలో కొంతమంది పేర్లు మనకు తెలుసు, ఇంకొంతమందివి తెలీవు. వాళ్లలో డబ్బున్నవాళ్లు-పేదవాళ్లు, అధికారంలో ఉన్నవాళ్లు-మామూలు మనుషులు ఉన్నారు. కానీ వాళ్లందరూ ధైర్యం చూపిస్తూ యెహోవా వైపు నిలబడ్డారు. వాళ్ల కథలు ఈరోజు మనందరిలో ధైర్యాన్ని నూరిపోస్తాయి.

ప్రార్థన చేసుకోండి

5-7. హింస వచ్చినప్పుడు పౌలు ఎలా ధైర్యం చూపించగలిగాడు?

⁵ బైబిల్లో ధైర్యం చూపించిన స్త్రీపురుషుల ఆదర్శాన్ని మనమెలా పాటించవచ్చు? ఒక విషయం గుర్తుంచుకోండి: వాళ్లు పుట్టుకతోనే ధైర్యవంతులు కాదు. అలాగని వాళ్లు తమ శక్తి-సామర్థ్యాలతో ధైర్యాన్ని పెంచుకుని యెహోవా సేవ చేశారా అంటే, అదీ కాదు. మరి వాళ్లకు ఏది సహాయం చేసింది?

⁶ అపొస్తలుడైన పౌలు ఉదాహరణే తీసుకోండి. ఫిలిప్పీలో ఉన్నప్పుడు ఒక గుంపు పౌలు, సీల మీద దాడి చేసి, వాళ్ల వస్త్రాల్ని చింపి, కర్రలతో చాలా దెబ్బలు కొట్టారు. ఆ తర్వాత వాళ్లను చెరసాలలోని చీకటి గదిలో వేసి, వాళ్ల కాళ్లను బొండలో బిగించారు. (అపొ. 16:12, 19-24) విడుదలయ్యాక పౌలు ప్రకటించడానికి భయపడ్డాడా? ఒకవేళ భయపడినా అందులో ఆశ్చర్యం ఏమీ లేదు. ఎందుకంటే, ఆయన కూడా మనలాంటి మామూలు మనిషే. అయితే, యెహోవా తన నుండి ఏం కోరుతున్నాడో పౌలుకు తెలుసు. కాబట్టి ఆయన థెస్సలొనీక నగరానికి వెళ్లి ప్రకటించాలి. అలా వెళ్లడానికి ఆయనకు చాలా ధైర్యం, బలం కావాలి. వాటిని ఎలా కూడగట్టుకున్నాడు?

⁷ పౌలు కొంతకాలానికి ఇలా రాశాడు: “మేము ఫిలిప్పీలో ఉండగా మొదట్లో బాధలు అనుభవించాం, అవమానాలపాలయ్యాం. ఈ విషయం మీకు కూడా తెలుసు. అయినాసరే, మన దేవుని సహాయంతో మేము ధైర్యం కూడగట్టుకుని, ఎంతో వ్యతిరేకత మధ్య మీకు దేవుని గురించిన మంచివార్తను ప్రకటించాం.” (1 థెస్స. 2:2) దేవుడు అప్పగించిన పని చేయడానికి తనకు ధైర్యం అవసరమని పౌలుకు తెలుసు. మరి ఆ ధైర్యం ఆయనకు ఎక్కడి నుండి వచ్చింది? అప్పటికప్పుడు పుట్టేసిందా, లేదా ఆయనలో ఉన్న ప్రత్యేకమైన సామర్థ్యం వల్ల ధైర్యం చూపించగలిగాడా? లేదు. ఆయన “దేవుని సహాయంతో” ధైర్యం కూడగట్టుకున్నాడని రాశాడు. అంటే, తనకు ధైర్యం ఇవ్వమని యెహోవాను ఆయన వినయంగా అడిగాడు. యెహోవా కూడా ఆయన ప్రార్థనకు జవాబిచ్చాడు.

8. ధైర్యం చూపించడానికి పౌలులాగే మీరు కూడా ఏం చేయవచ్చు?

⁸ పౌలు చేసినట్టే మీరు కూడా చేయవచ్చు. ధైర్యం చూపించగలిగే ప్రత్యేక సామర్థ్యం మీలో లేదని మీకు అనిపిస్తుందా? అయినా దిగులు పడకండి. యెహోవాకు ప్రార్థించండి, ధైర్యం ఇవ్వమని ఆయన్ని బ్రతిమాలండి. ఆయన ఖచ్చితంగా మీకు సహాయం చేస్తాడు.—అపొ. 4:29.

9. విశ్వాసం పెంచుకునేలా సహాయం చేయమని యెహోవాను అడగడం ఎందుకు తెలివైన పని?

⁹ ధైర్యానికి విశ్వాసానికి చాలా దగ్గరి సంబంధం ఉంది. కాబట్టి, విశ్వాసం పెంచుకునేలా సహాయం చేయమని కూడా మీరు యెహోవాను అడగవచ్చు. ఎందుకంటే, అది పవిత్రశక్తి పుట్టించే లక్షణాల్లో ఒకటి. (గల. 5:22, 23) అంతేకాదు, ప్రతీ క్రైస్తవుడు ధరించాల్సిన ఆధ్యాత్మిక కవచంలో అదీ ఒక భాగం. (ఎఫె. 6:16) విశ్వాసానికి ఎంత శక్తి ఉందంటే, అది ఉన్న వ్యక్తి ‘లోకాన్ని జయించగలడు’ అని బైబిలు చెప్తుంది. (1 యోహా. 5:4) ధైర్యం చూపించాలంటే ముందు యెహోవా మీద విశ్వాసం ఉండాలి. కష్టాల్లో యెహోవా సహాయం చేస్తాడనే విశ్వాసం మీకు ఉంటే, ఏ పరిస్థితుల్లో అయినా ధైర్యం చూపించగలుగుతారు. కాబట్టి యేసు శిష్యులు ప్రార్థించినట్టే ప్రతీ క్రైస్తవుడు, ‘ఇంకా బలమైన విశ్వాసం కలిగివుండేలా సహాయం చేయి’ అని యెహోవాను అడగాలి.—లూకా 17:5.

“ధైర్యం తెచ్చుకోండి!”

10-11. క్రైస్తవులు ధైర్యం తెచ్చుకోవాల్సిన అవసరం ఎందుకు వచ్చింది?

¹⁰ యెరూషలేము, దాని చుట్టు పక్కల ప్రాంతాల్లో ఉంటున్న క్రైస్తవులు, త్వరలోనే కష్టమైన కాలాల్ని ఎదుర్కోవాల్సి వస్తుందని పౌలుకు తెలుసు. ఎందుకంటే, యెరూషలేము నగరం నాశనమౌతుంది అని యేసు ముందే చెప్పాడు. అందుకే, క్రైస్తవుల్లో ధైర్యం నింపుతూ పౌలు ఒక ఉత్తరం రాశాడు. (లూకా 19:41-44; 21:20-24) ఇంతకీ ఆయన ఏం రాశాడు? ఆయన వాళ్లకు యెహోవా ఇచ్చిన ఈ అభయాన్ని గుర్తుచేశాడు: “నిన్ను ఎప్పుడూ విడిచిపెట్టను, నిన్ను ఎన్నడూ వదిలేయను.” ఈ పుస్తకం పరిచయ మాటల్లో కూడా ఆ అభయాన్ని చూశాం. అది వాళ్లకు ఎలా సహాయం చేస్తుంది? పౌలు ఇంకా ఇలా రాశాడు: “అందుకే మనం మంచి ధైర్యంతో ఇలా అనగలం: ‘నాకు సహాయం చేసేది యెహోవాయే; నేను భయపడను. మనుషులు నన్నేమి చేయగలరు?’”—హెబ్రీ. 13:5, 6.

¹¹ క్రీస్తు శకం 70లో యెరూషలేము ఎలా నాశనం అయిందో బైబిలు చెప్పట్లేదు. కానీ మనకు ఈ విషయం ఖచ్చితంగా తెలుసు: నమ్మకంగా ఉన్న క్రైస్తవులు పౌలు ఇచ్చిన సలహాను పాటించారు. వాళ్లు ధైర్యం తెచ్చుకుని యేసు చెప్పినట్టే సరైన సమయంలో ‘కొండలకు పారిపోవడం మొదలుపెట్టారు.’—లూకా 21:20, 21.

12. (ఎ) కష్టమైన కాలాలు వచ్చినప్పుడు మీరు ధైర్యంగా ఉండడానికి ఏ మాటలు సహాయం చేస్తాయి? (బి) ఈ చివరి రోజుల్లో కొంతమంది ఎలా తిరుగులేని ధైర్యం చూపించారు? మీరు ఎలా ఉండాలని నిర్ణయించుకున్నారు? (“వాళ్లలా ధైర్యం చూపించండి” అనే బాక్సు చూడండి.)

¹² ఇప్పుడు అలాగే భవిష్యత్తులో ఎలాంటి కష్టాలు వచ్చినా, యెహోవా మీకు కూడా ధైర్యాన్ని ఇస్తాడు. (యెహె. 38:1, 2, 10-12; మత్త. 24:21) కాబట్టి యెహోవా మనల్ని కాపాడతానని ఇచ్చిన మాటను మర్చిపోవద్దు. (యెహె. 38:19-23; 2 థెస్స. 3:3) తనను ప్రేమించేవాళ్లను, తన మీద విశ్వాసం ఉంచే వాళ్లను యెహోవా ఎప్పుడూ విడిచిపెట్టడు. ఒకప్పుడు యెహోవా యెహోషువతో చెప్పినట్టే మీతో కూడా ఇలా అంటున్నాడు: “ధైర్యంగా, ఎంతో నిబ్బరంగా ఉండు”! (యెహో. 1:7, 9, 18) అంతేకాదు, “ధైర్యం తెచ్చుకోండి!” అని యేసు చెప్పిన మాటల్ని ఎప్పుడూ మర్చిపోవద్దు. ఏ కష్టాన్నైనా తట్టుకుని, ధైర్యంగా నిలబడేలా మీకు సహాయం చేయడానికి పవిత్రశక్తిని ఇస్తానని యేసు మాటిచ్చాడు. ఆయన మాట తప్పడు. (యోహా. 14:26; 15:26, 27; 16:33) కాబట్టి మీరు భయపడకుండా ధైర్యంగా ఉండగలరు!

13. మీరు ఇప్పుడు ధైర్యం చూపించడానికి ఏది సహాయం చేస్తుంది?

¹³ మీరు కొత్త లోకాన్ని ఊహించుకోండి: భూమంతా శాంతి విలసిల్లుతుంది. యెహోవా జ్ఞాపకంలో ఉన్న వాళ్లందరూ బ్రతుకుతారు. అప్పుడు మీరు ఈ పుస్తకంలో ఉన్న వ్యక్తులనే కాదు, ధైర్యం చూపించిన ఇంకా చాలామందిని కలుస్తారు. వాళ్లందరూ ఈ సాతాను లోకంలో యెహోవాను నమ్మకంగా ఆరాధించడానికి ఎన్నో కష్టాలు పడ్డారు, ఆఖరికి తమ ప్రాణాల్ని కూడా పణంగా పెట్టారు. అలా చేసినందుకు, వాళ్లు కొత్త లోకంలో తిరిగి లేచాక బాధపడతారని మీకు అనిపిస్తుందా? ఖచ్చితంగా లేదు! మరి మీ సంగతేంటి? మీరు వాళ్లతో కలిసి ఈ భూమిని అందమైన పరదైసులా మారుస్తారు. ఆ కొత్త లోకంలో ఉన్నప్పుడు, చివరి రోజుల్లో యెహోవాను ఆరాధించి తప్పు చేశారని మీకు అనిపిస్తుందా? అసలు అలాంటి ఆలోచనే రాదు! కాబట్టి, చివరి శ్వాస వరకు ధైర్యం చూపిస్తూ, యెహోవాకు నమ్మకంగా ఉండాలని గట్టిగా నిర్ణయించుకోండి. ఇప్పుడు మీరు తీసుకునే నిర్ణయం బట్టి శాశ్వతకాలం సంతోషిస్తారు!