“వృక్షాయుష్యమంత”

మూడు వేల సంవత్సరాల కంటే పూర్వం, మోషే ఈ విధంగా వ్రాశాడు: “మా ఆయుష్కాలము డెబ్బది సంవత్సరములు అధికబలమున్న యెడల ఎనుబది సంవత్సరములగును అయినను వాటి వైభవము ఆయాసమే దుఃఖమే.”—కీర్తన 90:10.

వైద్య రంగం పురోభివృద్ధి చెందినప్పటికీ, మానవుని సగటు ఆయుష్కాలం మోషేకాలములో ఎంత ఉందో ఇప్పటికీ అంతే ఉంది. అయినప్పటికీ, మానవులు అటువంటి క్షణభంగురమైన ఉనికిని కలిగివుండాలని ఎల్లప్పుడూ శపించబడరు. బైబిలులోని యెషయా గ్రంథంలో, దేవుడు ఈ విధంగా చెప్పాడు: “నా జనుల ఆయుష్యము వృక్షాయుష్యమంతయగును నేను ఏర్పరచుకొనినవారు తాము చేసికొనినదాని ఫలమును పూర్తిగా అనుభవింతురు.”—యెషయా 65:22.

బైబిలు దేశాల్లో దీర్ఘాయుష్షు గల వృక్షాల్లో ఒలీవ వృక్షం ఒకటి. ఇప్పటికీ గలిలయలో పెరుగుతున్న వెయ్యేండ్ల ఆయువు గల అనేక ఒలీవ వృక్షాల్లో పైన చిత్రించబడిన వృక్షము ఒకటి. మానవులు అంత దీర్ఘకాలం ఎప్పుడు జీవిస్తారు? దేవుడు “క్రొత్త ఆకాశమును క్రొత్త భూమిని” సృజించినప్పుడు అలా జరుగుతుందని అదే ప్రవచనం వివరిస్తుంది.—యెషయా 65:17.

దేవుడు ‘వారి కన్నుల ప్రతి బాష్పబిందువును తుడిచివేసి, మరణము ఇక ఉండని దుఃఖమైనను ఏడ్పైనను వేదనయైనను ఇక ఉండని’ “క్రొత్త ఆకాశమును క్రొత్త భూమిని”—ఒక క్రొత్త పరలోక ప్రభుత్వాన్ని, ఒక క్రొత్త మానవ సమాజాన్ని స్థాపించడాన్ని గూర్చి ప్రకటన గ్రంథం కూడా ప్రవచిస్తోంది.—ప్రకటన 21:1, 4.

ఈ దైవిక వాగ్దానము త్వరలోనే నెరవేర్చబడుతుంది. అప్పుడు, ఒలీవ వృక్షాయుష్షు కూడా కేవలం 24 గంటలు గల ఒక రోజులా అనిపిస్తుంది. మరియు మన చేతి పనులను పూర్తిగా అనుభవించేందుకు మనకు తగినంత సమయం లభిస్తుంది.