ముందుమాట

ఇది నిజమైన కథల పుస్తకము. ఇందులోని కథలు ప్రపంచంలోని అతి గొప్ప పుస్తకమైన బైబిలు నుండి తీసుకోబడ్డాయి. అవి దేవుడు సృష్టిని ప్రారంభించినప్పటినుండి నేటివరకున్న లోకం చరిత్రను తెలియజేస్తాయి. దేవుడు భవిష్యత్తులో ఏమి చేస్తానని వాగ్దానం చేశాడో కూడా చెబుతాయి.

ఈ పుస్తకము మీకు బైబిలు గురించి సమగ్రంగా తెలియజేస్తుంది. బైబిలులోని ప్రజల గురించి వాళ్లు చేసిన పనుల గురించి చెబుతుంది. మానవులు పరదైసు భూమిపై నిరంతరం జీవిస్తారని దేవుడు ఇచ్చిన గొప్ప నిరీక్షణ గురించి కూడా చెబుతుంది.

ఈ పుస్తకములో 116 కథలున్నాయి. అవి ఎనిమిది భాగాలుగా చేయబడ్డాయి. ప్రతి భాగానికి ముందున్న పేజీ ఆ భాగంలో ఏముందో క్లుప్తంగా చెబుతుంది. చరిత్రలో సంఘటనలు జరిగిన క్రమాన్ని బట్టే కథలు కూర్చబడ్డాయి. ఇతర సంఘటనలకు సంబంధించి ఆయా విషయాలు చరిత్రలో ఎప్పుడెప్పుడు జరిగాయో తెలుసుకోవడానికి అది మీకు సహాయపడుతుంది.

ఈ కథలు సులభమైన భాషలో చెప్పబడ్డాయి. చిన్నపిల్లలు చాలామంది తమకై తామే వాటిని చదువుకోగలుగుతారు. తమ పిల్లలు వాటిని పదేపదే చదివించుకోవడానికి ఎంతో ఇష్టపడుతున్నారని తల్లిదండ్రులు గమనిస్తారు. ఈ పుస్తకములో పిల్లలకు అలాగే పెద్దలకు ఎంతో ఆసక్తికరమైన విషయాలున్నట్లు మీరు కనుగొంటారు.

ప్రతి కథకు చివర్లో బైబిలు లేఖనాలు ఇవ్వబడ్డాయి. ఆ కథలు తీసుకోబడిన ఆయా బైబిలు భాగాలను చదవాలని మిమ్మల్ని ప్రోత్సహిస్తున్నాం. మీరు ఒక కథ చదవడం ముగించాక, ఆ కథకు సంబంధించి 116వ కథ తర్వాత ఉన్న ప్రశ్నలను కూడా పరిశీలించి సమాధానాలు గుర్తుతెచ్చుకోవడానికి ప్రయత్నించండి.