Mundu tomak sei iha dame

Ema hotu hakarak moris iha mundu neʼebé nakonu ho dame. Ba tinan barak, ukun-naʼin sira hakaʼas an atu hapara konflitu sira iha mundu neʼe. Dala ruma, sira-nia hakaʼas an lori rezultadu diʼak ba tempu balu. Maibé dala barak, triste mak problema akontese fali. Entaun, mundu sei iha duni dame ka lae? Sin! Mai ita haree saida mak ita bele aprende husi Jesus.

Saida mak Jesus sei halo?

Bíblia fó sai kona-ba saida mak Jesus sei halo la kleur tan atu lori dame ba mundu.

• “[Jesus] sei bolu nuʼudar . . . Ulun-Naʼin Dame nian. Ninia ukun sei aumenta ba nafatin no dame sei la iha rohan.” (Isaias 9:6, 7) Nuʼudar Ukun-Naʼin ba Maromak nia Ukun, Jesus sei lori dame neʼebé la iha rohan ba mundu tomak.

• “Nia sei salva ema kiak neʼebé halerik atu husu ajuda . . . no mós sira hotu neʼebé la iha ema atu ajuda sira.” (Salmo 72:12-14) Jesus sei uza ninia podér atu lori mai justisa neʼebé loos, no rezultadu mak sei la iha tan funu, violénsia no susar.

• “Nasaun sei la foti tan surik hasoru nasaun seluk, no sira mós sei la aprende tan funu.” (Isaias 2:4) Bainhira Jesus ukun mundu tomak, ema hotu sei la aprende tan atu halo funu maibé sira sei aprende oinsá atu halo dame.

Atu aprende oinsá Jesus sei lori dame ba mundu tomak iha futuru no oinsá ita bele moris iha mundu hanesan neʼe, haree vídeo badak Saida mak Maromak nia Ukun?

Saida mak Jesus hanorin?

Jesus nia hanorin sira ajuda ona ema barak ohin loron atu moris iha dame laran. Iha Jesus nia diskursu iha Foho, nia hanorin prinsípiu sira neʼebé bele ajuda ema atu moris hamutuk ho dame. Mai ita haree ezemplu balu.

• “Ksolok ba sira neʼebé buka dame.” (Mateus 5:9) Jesus anima ninia dixípulu sira atu laʼós deʼit hasees an husi problema maibé mós atu halo dame.

• “Halo dame uluk ho ó-nia maun-alin. Tuirmai, kuandu ó fila fali, ó bele hasaʼe ó-nia prezente neʼe.” (Mateus 5:23, 24) Jesus anima ninia rona-naʼin sira atu lalais rezolve problema. Nia hanorin katak atu bele iha relasaun diʼak ho Maromak, importante tebes ba sira atu hadame malu.

• “Keta tesi-lia ba ema, atu nuneʼe imi mós la hetan tesi-lia.” (Mateus 7:1) Jesus fó-hanoin ita atu la tesi-lia makaʼas ba ema seluk ka obriga ema atu halo buat neʼebé ita rasik labele halo, tanba neʼe bele hamosu konflitu. Jesus hanorin ninia dixípulu sira katak sira labele buka deʼit ema seluk nia sala maibé sira presiza “kontinua perdua ema seluk” nia sala.—Lucas 6:37.

Ema barak iha mundu tomak halo tuir ona Jesus nia hanorin sira. Maski sira hela iha área neʼebé nakonu ho violénsia ka konflitu, maibé sira aprende ona oinsá atu rezolve ida-neʼe ho kalma, prontu atu fó perdua, no hatudu domin maski ema seluk la halo nuneʼe.

Atu haree oinsá Jesus nia hanorin sira ajuda ona ema balu atu hetan dame, lee artigu “Hetan dame maski funu no konflitu akontese.”