Rede atu kaer ikan

Jesus nia dixípulu balu halaʼo serbisu nuʼudar peskadór. (Mc 1:​16-20) Sira uza rede atu kaer ikan iha Tasi Galileia.

Atu halo rede, ema uza tali neʼebé baibain halo husi liñu no kesi ba malu. Rede balu ho kuak kiʼik no balu kuak boot, depende ba ikan neʼebé peskadór hakarak kaer. Baibain rede neʼebé kiʼik kesi ho riti ka fatuk atu bele tun ba tasi okos, no rede neʼebé boot iha buat todan iha parte kraik no mós iha palampu neʼebé halo husi ai iha parte leten.

Rede mak karun iha tempu neʼebá. Rede bele sai aat tanba kona fatuk iha tasi okos, ka bele naklees kuandu kaer ikan barak demais. (Lc 5:6) Bíblia konta katak Tiago no João “hadiʼa hela sira-nia rede”, karik hodi uza daun no tali neʼebé halo husi liñu. (Mt 4:21) Karik peskadór sira sempre hadiʼa sira-nia rede kuandu sira uza tiha atu kaer ikan. Lucas mós koʼalia kona-ba peskadór sira neʼebé ‘fase sira-nia rede’ atu hasai tahu ka foʼer. (Lc 5:2) Depois neʼe, peskadór sira habai rede halo maran, karik atu rede la sai dodok.—Eze 47:10.

Jesus konvida mane neʼebé toman atu uza rede hodi bele sai “peskadór ba ema”.