Luta hasoru buat neʼebé dada ita-nia atensaun

1-2. Oinsá mak buat neʼebé ita hanoin importante bele dada ita-nia atensaun?

IMAJINA toʼok Ita lori hela karreta no Ita-nia telefone lian. Ita hanoin katak ema ruma atu husu ajuda, maibé Ita mós hatene katak Ita tenke tau fokus ba dalan atu la hetan asidente. Tuir loloos iha situasaun barak iha ita-nia moris neʼebé Ita presiza deside ida-neʼebé mak importante liu atu halo.

² Ita hotu iha atividade oioin neʼebé importante. Ita mós hatene katak atividade espirituála mak importante tebes. (Mt 6:33) Tan neʼe, ita presiza hanoin didiʼak kona-ba buat neʼebé bele dada ita-nia atensaun no hanetik ita atu tau uluk Jeová iha ita-nia moris.—Prov 4:25; Mt 6:22.

3. Iha lisaun neʼe, ita sei buka-hatene kona-ba saida?

³ Ita hotu hakarak fokus ba ita-nia atividade espirituál. Maibé, ita hasoru beibeik situasaun oioin neʼebé bele dada ita-nia atensaun. (Lc 21:​34-36) Iha lisaun neʼe, ita sei buka-hatene (1) saida deʼit mak bele dada ita-nia atensaun, (2) saida mak Jesus halo atu la husik buat ida hapara nia atu kumpre Jeová nia hakarak, no (3) oinsá mak ita bele halo tuir Jesus nia ezemplu.

SAIDA DEʼIT MAK BELE DADA ITA-NIA ATENSAUN?

4-6. Buat saida deʼit mak bele dada ita-nia atensaun?

⁴ Ita hotu iha buat importante barak neʼebé ita presiza tau matan. Porezemplu, karik ita iha problema saúde ka presiza tau matan ba asuntu família ka pesoál. Klaru katak buat sira-neʼe importante no ita presiza tau atensaun. Maibé, neʼe bele hanetik ita atu tau uluk Jeová ka lae? Bele se ita komesa hanoin demais toʼo la iha tan tempu no forsa ba atividade espirituál nian.

⁵ Liután neʼe, ita mós hetan impaktu husi krize, problema ekonomia, pandemia, no konflitu iha mundu neʼe. (2 Tim 3:1) Situasaun sira-neʼe bele halo ita laran-susar tebes toʼo halo ita hanoin barak demais.

⁶ Karik ita hatene ema ruma neʼebé hetan impaktu boot husi situasaun sira-neʼe no ita komprende katak situasaun susar bele halo ema sente estrese tebes. Jeová la kria ema atu hasoru susar ka sente estrese hela deʼit. Tan neʼe, ema balu neʼebé sente labele tahan tan koko atu haluha sira-nia problema hodi fokus fali ba atividade halimar nian. Se ita hasoru situasaun hanesan neʼe, saida mak ita bele halo? Mai ita aprende kona-ba Jesus nia ezemplu hodi bele ajuda ita atu tau uluk Jeová iha ita-nia moris.

OINSÁ JESUS LUTA HASORU BUAT NEʼEBÉ DADA NINIA ATENSAUN?

7. Saida deʼit mak bele dada Jesus nia atensaun?

⁷ Buat barak bele deʼit dada Jesus nia atensaun, hanesan problema sosiál no polítiku. Iha ninia tempu, ema barak mak moris kiak no moras. (Mt 14:14; Mc 14:7) Sira mós hasoru situasaun la justisa husi ema Roma no maluk Judeu sira. Bainhira sira haree katak Jesus iha kbiit atu halo milagre oioin, sira hakarak hili nia atu sai liurai. (João 6:​14, 15) Liután neʼe, Satanás tenta Jesus no oferese ukun hotu iha mundu neʼe ba nia. Karik Jesus bele hanoin katak diʼak se nia mak ukun mundu neʼe. (Mt 4:​8, 9) No apóstolu Pedro neʼebé besik ho Jesus mós anima nia atu hili dalan neʼebé fasil liu, hodi dehan: “Naʼi, hatudu laran-sadiʼa ba Ita-nia an.”—Mt 16:​21, 22.

8. Oinsá mak Jesus luta hasoru buat neʼebé bele dada ninia atensaun?

⁸ Oinsá mak Jesus luta hasoru buat neʼebé bele dada ninia atensaun? Iha buat tolu. Primeiru, nia hanoin tuir Jeová nia hanoin. (João 8:28; 14:9) Segundu, nia kontinua okupadu ho atividade espirituál nian. (Mt 9:35) No terseiru, nia komprende ho klaru saida mak importante liu. (João 4:34) Nia la simu Satanás nia tentasaun no nia hatene katak maski Pedro hakarak ajuda nia, maibé buat neʼebé Pedro hatete mak la tuir Jeová nia hakarak. (Mt 4:10; 16:23) Jesus la husik ema nia hanoin, liafuan, no hahalok atu dada ninia atensaun husi Maromak nia hakarak. Klaru, ita hasoru situasaun neʼebé diferente ho Jesus nian. Maibé ita bele halo buat tolu neʼebé Jesus halo hodi bele tau uluk Jeová iha ita-nia moris.

OINSÁ MAK ITA KONTINUA TAU ULUK JEOVÁ?

9. Tuir Éfeso 5:​17, ita presiza halo saida?

⁹ Aprende atu hanoin tuir Jeová nia hanoin. Neʼe bele ajuda Ita atu ‘kontinua buka-hatene saida mak Jeová hakarak Ita atu halo’. (Lee Éfeso 5:17.) Ita bele buka-hatene Jeová nia hanoin hodi lee ninia Liafuan no hanoin kleʼan kona-ba neʼe. Maski Bíblia la temi kona-ba ita-nia situasaun espesífiku, ita bele aprende kona-ba Jeová nia hakarak. Oinsá? Hodi estuda didiʼak Jeová nia dalan atu hanoin no prontu atu aplika ida-neʼe iha ita-nia moris.

10. Oinsá mak ita bele aprende Jeová nia dalan atu hanoin?

¹⁰ Ita bele aprende kona-ba Jeová nia dalan atu hanoin hodi estuda Bíblia no buka-hatene oinsá Jeová trata ema. (Jer 45:5) Kuandu ita lee istória ruma husi Bíblia, husu ita-nia an: ‘Neʼe hanorin saida mai haʼu kona-ba Jeová? Mudansa saida mak haʼu bele halo atu bele hanoin tuir Jeová nia hanoin?’ Klaru katak Jeová nia hanoin mak aas liu fali ita-nian. (Isa 55:9) Tan neʼe, ita presiza husu Jeová atu hanorin ita halo tuir ninia hakarak. (Sal 143:10) No ita mós halo orasaun hodi husu ajuda atu komprende ninia hanoin no halo ida-neʼe sai fali ita rasik nia hanoin.—1 João 5:14.

11. Jeová hakarak ita atu halo saida?

¹¹ Kuandu ita aprende atu hanoin tuir Jeová nia hanoin, ita komprende katak Jeová hakarak ita atu sempre prepara an ba mundu aat nia rohan hodi la husik buat ida dada ita-nia atensaun. (Mt 24:44) Nia lakohi ita atu hanoin demais kona-ba moris loroloron nian. (Mt 6:​31, 32) Tan neʼe, bainhira ita komesa hanoin barak kona-ba ita-nia saúde, serbisu, hela-fatin, ka problema pesoál ka família, Jeová prontu atu ajuda ita. Nia konvida ita atu sadere ba nia, no nia sei fó ita matenek no kbiit atu tahan hasoru situasaun susar.—Sal 55:22; Prov 3:​5-7.

12. Saida mak bele ajuda ita atu la hanoin demais kona-ba akontesimentu iha mundu? (Mateus 5:3)

¹² Kontinua okupadu ho atividade espirituál nian. Ita hotu sente laran-susar kona-ba buat aat neʼebé akontese iha mundu neʼe. Maibé ita labele hapara buat aat sira, tan neʼe diʼak liu atu okupadu ho serbisu ba Jeová duké hanoin demais kona-ba akontesimentu oioin iha mundu. Ita bele sente haksolok se ita hakaʼas an atu halo tuir Maromak nia matadalan, tanba Jeová kria ita hanesan neʼe. (Lee Mateus 5:3.) Tan neʼe, ita presiza estuda Bíblia no halo buat hotu neʼebé ita bele atu halo serbisu naran deʼit ba Jeová. Hodi halo nuneʼe, ita bele uza ita-nia tempu ho matenek, no neʼe halo Jeová kontente.—Prov 23:15.

13. Oinsá mak ita bele ‘uza didiʼak ita-nia tempu’?

¹³ Nuʼudar ema Kristaun, ita hakarak duni atu ‘uza didiʼak ita-nia tempu’. (Éf 5:​15, 16) Bíblia anima ita laʼós deʼit atu uza didiʼak ita-nia tempu atu kumpre serbisu loroloron nian, maibé husu ita atu hanoin kona-ba oinsá ita uza ita-nia tempu antes mundu nia rohan toʼo mai. Oinsá mak ita bele uza didiʼak ita-nia tempu? Se ita gasta tempu barak demais atu haree ka rona notísias aat oioin, neʼe bele halo ita laran-kraik no la iha forsa atu serbí Jeová. Tan neʼe, diʼak atu tau limite ba tempu neʼebé ita uza atu haree, rona, ka lee notísias! Neʼe sei ajuda ita atu iha tempu no forsa hodi halo buat ruma ba Jeová. Ita mós bele hanoin kona-ba oinsá atu aumenta serbisu haklaken, porezemplu halo vizita fali ba ema barak liután. Sin, importante tebes atu aproveita oportunidade hotu hodi ajuda ema “hetan salvasaun no hetan koñesimentu neʼebé loos kona-ba lia-loos”.—1 Tim 2:4.

14. Kuandu ita okupadu ho serbisu ba Jeová, oinsá neʼe ajuda ita? (Haree mós foto.)

¹⁴ Kuandu ita okupadu ho serbisu ba Jeová, ita bele mantein hanoin neʼebé loos kona-ba akontesimentu iha mundu neʼe. Porezemplu kuandu akontese krize, problema ekonomia, ka pandemia, ita hatene neʼe mak prova katak profesia husi Bíblia sai loos daudaun. Duké hanoin barak ka sai taʼuk, ita fiar metin katak lakleur tan Jeová sei halakon buat sira-neʼe hotu no halo mundu neʼe sai Paraízu. Nuʼudar ita hein ba tempu neʼe, ita tau fiar ba Jeová nia ajuda atu bele tahan no kalma nafatin.—Sal 16:8; 112:​1, 6-8.

15. Se ita “iha hanoin neʼebé loos”, neʼe sei ajuda ita atu halo saida? (1 Pedro 4:7)

¹⁵ Keta haluha buat neʼebé importante liu. Ema barak ohin loron hanoin beibeik kona-ba oinsá atu goza moris, laʼós kona-ba mundu nia rohan besik atu mai. La sala atu iha tempu hodi goza moris, maibé ita presiza “iha hanoin neʼebé loos” hodi la husik mundu nia hanoin mak fó influénsia ba ita. (Lee 1 Pedro 4:7.) Se ita iha hanoin neʼebé loos, neʼe sei ajuda ita atu halo desizaun neʼebé matenek no la gasta demais ita-nia tempu no forsa ba atividade halimar nian. Hodi halo nuneʼe, ita hatudu katak ita hanoin tuir Jeová nia hanoin no komprende saida mak importante liu no ladún importante.—2 Tim 1:7.

16. Oras balu antes Jesus mate, nia fokus liu kona-ba saida?

¹⁶ Jesus sempre hanoin kona-ba buat neʼebé importante liu. Iha oras balu antes Jesus mate, nia laran-susar tebes, maibé nia tau fokus atu laran-metin nafatin no kumpre Maromak nia hakarak. Tan neʼe, nia halo orasaun ho laran tomak. Maibé Jesus nia dixípulu sira la halo hanesan neʼe. Sira toba deʼit tanba “sira-nia laran-triste halo sira kole”.—Lc 22:​39-46; João 19:30.

17. Tanbasá ema barak uza internét, maibé neʼe bele lori rezultadu saida? (Haree mós foto.)

¹⁷ Hanesan ho Jesus nia dixípulu sira, ita mós dala ruma sente estrese no laran-susar tebes. Akontesimentu oioin iha loron ikus sira-neʼe bele halo ita hanoin barak. Ema barak ohin loron uza internét atu la hanoin demais kona-ba problema neʼebé sira hasoru. Sira uza média sosiál atu liga ho sira-nia kolega no família no mós atu fahe novidade, foto, no buat seluk. Sira mós uza internét atu haree vídeo ka halimar game. Ikusmai sira uza tempu no enerjia barak atu halimar deʼit internét. Atu la monu ba lasu neʼe, husu ba ita-nia an: ‘Dalan neʼebé haʼu uza internét ajuda haʼu atu sente kmaan, ka dada deʼit haʼu-nia atensaun husi buat neʼebé importante duni?’

18. Oinsá ita bele halo desizaun ho matenek kona-ba uza ita-nia tempu livre?

¹⁸ Diʼak atu iha tempu hodi bele sente kontente no kmaan hodi haree vídeo ka halimar game, maibé ita presiza halo desizaun ho matenek kona-ba buat neʼebé ita haree ka rona iha televizaun ka internét. Porezemplu, kuandu ita haree vídeo ida iha internét, sempre iha rekomendasaun kona-ba vídeo seluk neʼebé karik ita sei gosta, maibé vídeo sira-neʼe karik fó sai violénsia ka hahalok neʼebé la morál. Irmaun ida iha Ázia mós hasoru situasaun hanesan neʼe. Foufoun nia haree deʼit vídeo badak balu husi aplikasaun, no tuirmai nia haree vídeo seluk neʼebé mosu no fó sai buat neʼebé la morál. Ikusmai nia komesa haree pornografia. Maibé hodi simu ajuda husi katuas kongregasaun no belun sira, nia konsege para. Nia apaga aplikasaun ba filme sira no tau limite ba oras neʼebé nia uza telefone. Esperiénsia neʼe hanorin ita katak importante duni atu halo desizaun ho matenek kona-ba oinsá atu uza ita-nia tempu livre.

19. Saida mak bele akontese se ita fokus liu kona-ba halimar ka feriadu?

¹⁹ Ita mós presiza halo desizaun ho matenek kona-ba ita-nia feriadu ka atividade neʼebé ita halo atu sente kmaan. Ita hotu presiza deskansa no halimar atu ajuda ita iha saúde diʼak. Maibé se ita fokus liu ba buat sira-neʼe, neʼe bele hadau ita-nia tempu husi buat neʼebé importante liu. (Flp 1:10) Ita hotu presiza deside kona-ba buat neʼebé ita halo no tempu hira mak ita uza ba ida-neʼe. Bainhira halo desizaun, husu Ita-nia an: ‘Haʼu-nia desizaun kona-ba halimar ka feriadu hatudu katak haʼu tau uluk buat neʼebé importante liu ka lae? Haʼu-nia desizaun hatudu katak haʼu prepara an ba “buat hotu nia rohan” ka lae?’

20. Benefísiu saida mak ita hetan se ita la husik buat ida dada ita-nia atensaun?

²⁰ Ita sei hetan benefísiu se ita la husik buat ida dada ita-nia atensaun husi ita-nia atividade no toman espirituál. (Isa 48:17) Ho Jeová nia ajuda, ita bele tahan hasoru problema oioin iha ita-nia moris. Ita sei la hanoin demais kona-ba akontesimentu iha mundu neʼe. No ita mós la fokus demais ba atividade halimar nian. Tan neʼe, mai ita hakaʼas an atu hanoin tuir Jeová nia hanoin, okupadu ho atividade espirituál, no la haluha kona-ba buat neʼebé importante liu. Hodi halo nuneʼe, ita bele kontinua tau uluk Jeová iha ita-nia moris no “kaer metin ba moris neʼebé loloos”.—1 Tim 6:19.