Aumenta Ita-nia “matenek atu hanorin”

1. Ita presiza aprende atu halo saida, no tanbasá? (2 Timóteo 4:2) (Haree mós dezeñu.)

JESUS hatete ba ninia dixípulu sira: “Hanorin ema . . . atu sai haʼu-nia dixípulu . . . Hanorin sira atu halo tuir mandamentu hotu neʼebé haʼu fó ona ba imi.” (Mt 28:​19, 20) Mandamentu neʼe hatudu katak ema Kristaun hotu tenke hanorin ho didiʼak. Klaru katak Jeová mak dada ema neʼebé “prontu atu simu lia-loos” no anju sira mós ajuda ita atu buka ema hanesan neʼe. (Após 13:48; João 6:44; Apok 14:6) Maski nuneʼe, ita presiza halo ita-nia parte. Haree toʼok Apóstolu Paulo no Barnabé nia ezemplu. Bainhira sira haklaken iha sinagoga iha Ikónio, sira “koʼalia ho matenek toʼo ema-lubun husi ema Judeu no ema Gregu sai fiar-naʼin”. (Após 14:1) Paulo no Barnabé aprende oinsá atu hanorin ema seluk ho didiʼak. (Lee 2 Timóteo 4:2.) Nuʼudar ema Kristaun, ita hotu presiza aprende atu halo nuneʼe.

2. Tanbasá ema balu sente katak sira labele aumenta sira-nia matenek atu hanorin?

² Ema balu sente katak sira labele aumenta sira-nia matenek atu hanorin tanba la hetan edukasaun boot ka la iha abilidade. Ema balu neʼebé temi iha Bíblia mós sente hanesan neʼe. (Éx 4:10; Jer 1:6) Balu fali sente katak sira la iha matenek atu hanorin tanba la hetan rezultadu diʼak hanesan ema seluk kuandu haklaken. Klaru katak laʼós ema hotu neʼebé ita hasoru mak kontente atu simu liafuan diʼak. Tan neʼe, dala barak ita hakaʼas an mós la hetan rezultadu diʼak. Hanesan temi ona, Jeová no anju sira mak ajuda ema laran-moos atu hetan lia-loos. Maibé ita mós hakarak hakaʼas an atu fahe liafuan diʼak iha dalan neʼebé book ema nia laran. Iha lisaun neʼe, ita sei koʼalia kona-ba dalan tolu oinsá ita bele aumenta ita-nia matenek atu hanorin.

HATUDU KATAK ITA HANOIN SIRA

3. Tanbasá mak Jesus bele book ema nia laran?

³ Bíblia hatete katak Jesus “hatene saida mak iha ema nia laran”. (João 2:25) Jesus hatene ema nia hanoin no motivu. Nia hatene oinsá atu book rona-naʼin nia laran tanba nia komprende sira-nia presiza. Jesus rekoñese katak sira presiza hetan kmaan no matadalan tanba ulun-naʼin relijiaun sira halo sira-nia moris susar ho tradisaun no regra barak. (Mt 9:36; 23:4) Tan neʼe, bainhira Jesus hatoʼo diskursu iha foho, nia hanorin ema kona-ba buat neʼebé ajuda sira atu moris kontente. Ema barak sente kmaan tanba Jesus koʼalia tópiku neʼebé kona sira-nia situasaun.

4. Oinsá ita bele hatudu katak ita hanoin ema seluk? (Haree mós foto.)

⁴ Ita bele hatudu katak ita hanoin ema seluk nia diʼak hodi koko atu komprende sira-nia situasaun. Ema hotu hetan influénsia husi buat aat oioin neʼebé akontese iha Satanás nia mundu. Hodi hanoin kona-ba neʼe sei book ita atu hakarak ajuda sira. Porezemplu iha ita-nia área, iha ka lae akontesimentu ruma neʼebé halo ema laran-susar? Inan-aman sira hanoin barak ka lae kona-ba buat aat neʼebé bele akontese iha oan sira-nia eskola? Susar atu hetan serbisu ka lae? Imajina toʼok susar neʼebé ema barak hasoru liuliu tanba sira la hatene esperansa husi Bíblia.—2 Tim 3:1; Isa 65:​13, 14.

5. Oinsá mak Jesus la hanesan ho ema Farizeu? (Mateus 11:​28-30)

⁵ Jesus hanoin ninia rona-naʼin sira, no sira bele haree ida-neʼe liuhusi ninia hahalok. Nia la hanesan duni ho ema Farizeu sira neʼebé hatún no trata aat povu baibain. (Mt 23:13; João 7:49) Jesus hatudu laran-diʼak no respeitu ba ema. Nia “laran-maus no haraik an”, no neʼe ajuda nia atu sai mestre neʼebé diʼak. (Lee Mateus 11:​28-30.) Ita mós presiza hatudu laran-diʼak no respeitu ba ema neʼebé ita haklaken.

6. Oinsá mak ita bele hatudu laran-diʼak no respeitu ba ema neʼebé lakohi simu ka kontra ita?

⁶ Ema balu lakohi simu ka kontra ita. Ita presiza halo saida? Jesus hanorin ita atu la selu aat ba sira. Maibé laʼós neʼe deʼit, nia hanorin ita atu ‘halo diʼak ba ema neʼebé odi ita’, ‘haraik bensaun ba sira neʼebé fó-malisan ba ita’, no ‘harohan ba sira neʼebé koʼalia aat ita’. (Lc 6:​27, 28) Fasil ba ita atu halo buat sira-neʼe se ita hanoin kona-ba razaun tanbasá sira trata aat ita. Klaru katak ema balu hakarak duni atu hapara ita-nia haklaken. Maibé balu fali trata aat ita tan deʼit hasoru hela problema iha família laran ka hanoin barak kona-ba sira-nia situasaun. Karik ita vizita sira iha tempu neʼebé la diʼak. Iha situasaun hotu, ita presiza halo tuir konsellu atu ‘sempre koʼalia ho laran-diʼak hodi tau masin uitoan, atu nuneʼe ita bele hatene oinsá ita tenke hatán ba ema ida-idak’. (Kol 4:6) Se ita hanoin ema seluk no koko komprende sira-nia situasaun, neʼe sei ajuda ita atu kalma nafatin no buka tópiku ruma neʼebé bele ajuda sira.

SADERE BA MAROMAK NIA LIAFUAN

7. Oinsá mak Jesus hatudu katak nia sadere ba Maromak nia Liafuan? (João 7:​14-16)

⁷ Jesus la sadere ba ninia matenek rasik. Nia hanorin hodi bazeia ba Maromak nia Liafuan hodi esplika ho simples atu rona-naʼin sira komprende no hanoin-hetan. Bíblia fó sai katak Jesus “koʼalia ho kbiit, laʼós hanesan eskriba sira”. Neʼe halo ema “hakfodak”. (Mc 1:​22, nota) Eskriba sira iha Jesus nia tempu hanorin deʼit liafuan husi mestre relijiaun sira neʼebé naran-boot. Maibé Jesus sempre temi Maromak nia Liafuan. Nuʼudar Maromak nia Oan-Mane neʼebé uluk iha lalehan, nia bele deʼit fó sai ninia matenek boot hodi halo rona-naʼin admira ka halo sira sente la matenek. Maibé duké halo nuneʼe, Jesus dada sira-nia atensaun ba Eskritura sira no Maromak nia hakarak. (Lee João 7:​14-16.) Neʼe mak ezemplu diʼak tebes mai ita hotu.

8. Oinsá mak Pedro halo tuir Jesus nia ezemplu?

⁸ Jesus nia dixípulu sira mós sadere ba Maromak nia Liafuan bainhira hanorin. Porezemplu, iha loron Pentekostes 33 EC, Pedro esplika ba ema-lubun hodi uza Maromak nia Liafuan. Nia la eskola boot, maibé nia book rona-naʼin sira-nia laran hodi uza eskritura barak atu esplika profesia sira neʼebé Jesus kumpre ona. (Após 2:​14-37) Rezultadu mak “ema hotu neʼebé simu ninia liafuan ho laran hetan batizmu, no iha loron neʼe maizumenus ema naʼin-3.000 sai dixípulu”.—Após 2:41.

9. Bainhira hanorin, tanbasá ita presiza sadere ba Maromak nia Liafuan?

⁹ Maromak nia Liafuan deʼit mak iha kbiit atu ajuda ema halo mudansa. (Ebr 4:12) Tan neʼe, ita presiza uza Bíblia bainhira hanorin. Ita hakarak “haklaken Maromak nia liafuan”, laʼós ita-nia ideia rasik. (2 Tim 4:2) Provérbios 2:6 hatete: “Jeová rasik mak fó matenek; liafuan sira husi ninia ibun mak lori koñesimentu no kbiit atu tetu didiʼak.” Entaun kuandu ita hanorin husi Bíblia, neʼe hanesan ita husik Jeová mak koʼalia. (Mal 2:7) Ita hakarak ema hatene katak matadalan husi Bíblia mak diʼak liu fali ema nia matenek. Bíblia mak mai husi Kriadór, no neʼe ajuda ita atu halo nia kontente no ita mós bele moris kontente.—2 Tim 3:​16, 17.

10. Oinsá mak ita bele dada estudante nia atensaun ba Bíblia?

¹⁰ Bainhira Ita prepara atu halaʼo estudu Bíblia, hanoin kona-ba oinsá atu dada estudante nia atensaun ba Bíblia nia hanorin. Maski Ita uza dezeñu no vídeo sira atu hanorin pontu ida, maibé estudante presiza komprende katak nia estuda Bíblia. Tan neʼe durante estuda, lee eskritura neʼebé fó sai pontu importante, no ajuda estudante atu hanoin kleʼan kona-ba eskritura neʼe. Kuandu uza dezeñu ka vídeo, ajuda estudante atu haree lisaun saida mak nia bele aprende husi Bíblia. Atu kumpre ida-neʼe, Ita la presiza koʼalia barak ka lee eskritura barak. Fó tempu ba estudante atu komprende ho didiʼak eskritura ida-idak. Se presiza, lee fali eskritura sira-neʼe. Hodi halo nuneʼe, ita dada atensaun ba Bíblia nia hanorin, laʼós buat neʼebé livru, dezeñu, ka vídeo mak hanorin.—1 Kor 2:13.

11-12. (a) Oinsá mak ita bele hatudu pasiénsia ba estudante Bíblia? (Apóstolu 17:​1-4) (Haree mós foto.) (b) Ema balu presiza aprende saida kona-ba Bíblia, no oinsá mak ita bele ajuda sira?

¹¹ Se Ita-nia estudante sente susar atu simu hanorin ruma, hanoin-hetan katak Ita presiza “haklaken . . . ho pasiénsia”. Ema balu komprende lalais, maibé balu fali presiza tempu barak atu simu lia-loos neʼebé haree hanesan simples deʼit. Ema Judeu iha Tesalónika mós la komprende kedas buat neʼebé Paulo hanorin, tan neʼe Paulo presiza esplika dala balu hodi uza eskritura sira. Ikusmai sira balu komprende.—Lee Apóstolu 17:​1-4.

¹² Dalan ida tan atu hatudu pasiénsia mak hodi husu pergunta ba estudante no fó tempu ba nia atu hatán duké ita mak koʼalia barak. Rona didiʼak no koko komprende ninia hanoin. Tuirmai, lee eskritura no ajuda nia atu komprende Maromak nia hanoin kona-ba neʼe. No mós, diʼak atu hanoin-hetan katak ema balu nunka haree Bíblia no la hatene Bíblia mak hanesan saida. Tan neʼe, karik diʼak liu atu hatudu Bíblia neʼebé print ona. Ita bele loke parte “Introdusaun kona-ba Maromak nia Liafuan” husi Bíblia Tradusaun Mundu Foun, no hatudu tópiku importante sira husi Bíblia. Tuirmai, Ita bele temi eskritura ida ka rua husi pergunta 15 no esplika oinsá mak Bíblia bele ajuda ita atu moris kontente. Se Ita ajuda sira komprende katak Maromak nia Liafuan iha kbiit, neʼe sei book sira atu aprende liután.

AJUDA SIRA ATU FOKUS BA JEOVÁ

13. Bainhira hanorin, ita hakarak ajuda ema atu fokus ba sé? Fó toʼok ezemplu.

¹³ Ita-nia objetivu mak atu ajuda ita-nia rona-naʼin atu koñese Jeová no hakbesik ba nia. (Tgo 4:8) Ita bele kompara ida-neʼe ho tékniku ba lampu iha konsertu. Durante programa, nia presiza leno lampu nia naroman ba kantadór iha palku, laʼós ba ninia an. Nuneʼe mós bainhira hanorin, ita hakarak rona-naʼin atu fokus ba Jeová, laʼós ba ita-nia an.

14. Oinsá mak ita bele ajuda estudante atu fokus ba Jeová?

¹⁴ Bainhira halaʼo estudu Bíblia, ajuda estudante atu hakarak halo Jeová kontente. (Prov 27:11) Ita hanorin nia laʼós deʼit atu halo buat neʼebé loos no hasees an husi buat neʼebé sala hodi nia bele sai Testemuña, maibé Ita hakarak nia halo mudansa tanba hadomi Jeová. Porezemplu, se Ita-nia estudante sente susar atu husik toman aat ruma, husu ba nia pergunta hanesan: “Tanbasá Jeová odi toman neʼe? Tanbasá Jeová hakarak Ita atu husik tiha buat neʼebé Ita gosta? Oinsá mak ida-neʼe hatudu katak Jeová hadomi Ita?” Se Ita ajuda nia atu hanoin kleʼan kona-ba Jeová, nia sei komprende liután Jeová nia domin, no neʼe sei book nia atu hakarak halo Jeová kontente.

AUMENTA LIUTÁN ITA-NIA MATENEK ATU HANORIN

15. Saida deʼit mak Ita bele halo atu aumenta Ita-nia matenek atu hanorin?

¹⁵ Liuhusi orasaun, Ita bele husu Jeová nia ajuda atu analiza Ita-nia dalan atu hanorin no oinsá atu aumenta Ita-nia matenek. (1 João 5:14) Depois halo tiha orasaun, Ita presiza tau atensaun no aplika treinu neʼebé Ita hetan liuhusi reuniaun sira. Ita mós bele husu ema ruma neʼebé iha ona esperiénsia atu akompaña Ita-nia estudu Bíblia. Tuirmai husu sira-nia sujestaun. Maski Ita hatene didiʼak informasaun, maibé neʼe buat foun ba estudante. Tan neʼe, koko atu komprende ninia sentimentu. Tuirmai, ajuda nia atu rekoñese katak buat neʼebé nia aprende mak liafuan diʼak. Neʼe bele ajuda nia atu sai Jeová nia belun no hetan kontente neʼebé loos.—Sal 1:​1-3.

16. Tanbasá diʼak atu aumenta ita-nia matenek atu hanorin?

¹⁶ Buat neʼebé halo ita kontente liu mak hanorin ema seluk kona-ba Jeová. No iha mundu foun, sei iha ema barak neʼebé presiza aprende kona-ba Jeová. Tan neʼe, bainhira haklaken, mai ita kontinua hanoin kona-ba rona-naʼin sira, sadere ba Maromak nia Liafuan, no ajuda sira atu fokus ba Jeová. Hodi halo nuneʼe, ita bele aumenta ita-nia matenek atu hanorin.