HAKBESIK BA MAROMAK
‘Nia husu Jeová atu hatudu laran-sadiʼa ba nia’
IHA mane ida neʼebé uluk sai boot nuʼudar Testemuña ba Jeová maibé tuirmai nia husik lia-loos. Bainhira nia komesa halo mudansa iha ninia moris hodi fila fali ba Maromak, nia taʼuk katak Maromak sei nunka perdua nia. Nia hatete: “Haʼu sente katak haʼu la iha folin.” Maibé nia arrepende an no hetan kmaan husi Manasés nia istória iha Bíblia neʼebé hakerek iha 2 Krónikas 33:1-17. Se dala ruma Ita sente katak Ita la iha folin tanba sala neʼebé uluk Ita halo, karik Ita mós bele hetan kmaan husi Manasés nia ezemplu.
Manasés sai boot iha família neʼebé adora Maromak. Ninia aman mak Ezequias, liurai neʼebé mak diʼak tebes iha Judá. Manasés moris maizumenus tinan tolu liutiha husi tempu neʼebé Maromak halo milagre hodi hanaruk Ezequias nia moris. (2 Reis 20:1-11) Tan neʼe, Ita bele fiar katak Ezequias haree ninia oan nuʼudar prezente husi Maromak neʼebé laran-sadiʼa, no Ezequias hakaʼas an atu hanorin Manasés atu halaʼo adorasaun loos. Maibé dala ruma labarik sira la laʼo tuir sira-nia inan-aman nia ain-fatin. Manasés mak hanesan neʼe.
Bainhira Manasés maizumenus tinan 12, ninia aman mate. Triste mak Manasés “halo buat neʼebé aat tuir Jeová nia haree”. (Versíkulu 1, 2) Bíblia la fó sai kona-ba tanbasá nia komesa halo buat neʼebé aat. Maibé karik konsellu-naʼin sira neʼebé la hafolin adorasaun loos mak fó influénsia la diʼak ba nia. Maski ita la hatene razaun loloos, maibé Bíblia fó sai katak Manasés komesa adora estátua sira no halo hahalok aat oioin. Nia harii altár sira ba maromak falsu sira, nia hasaʼe ninia oan-mane sira nuʼudar sakrifísiu, nia halo espiritizmu, no nia mós tau estátua sira iha Jeová nia templu iha Jeruzalein. Manasés neʼebé ulun-toos lakohi simu avizu husi Jeová, Maromak neʼebé halo milagre hodi hanaruk ninia aman nia moris. Se Jeová la halo milagre neʼe, Manasés sei la moris mai.—Versíkulu 3-10.
Ikusmai, Jeová husik ema Babilónia atu kaer Manasés no lori nia ba Babilónia nuʼudar dadur. Iha neʼebá, nia iha tempu atu hanoin kleʼan kona-ba ninia hahalok aat. Karik nia rekoñese ona katak ninia estátua sira la iha kbiit atu proteje nia. Karik nia hanoin-hetan fali buat neʼebé ninia aman hanorin nia kona-ba Maromak kuandu nia sei labarik. Maski ita la hatene ho loloos buat neʼebé Manasés hanoin iha tempu neʼebá, maibé ita hatene nia halo mudansa. Bíblia hatete: “Nia husu Jeová, ninia Maromak, atu hatudu laran-sadiʼa ba nia no nia hatudu haraik an tebes . . . Nia kontinua halo orasaun ba Maromak.” (Versíkulu 12, 13) Maibé mane neʼebé halo sala sériu hanesan neʼe bele hetan perdua husi Maromak ka lae?
Tanba Manasés arrepende an ho laran, neʼe book tebes Jeová nia laran. Maromak rona ninia harohan hodi husu laran-sadiʼa no Maromak mós “husik nia fila fali ba Jeruzalein atu ukun nuʼudar liurai”. (Versíkulu 13) Manasés hatudu katak nia arrepende an ho laran hodi hakaʼas an atu hadiʼa fali situasaun no halakon estátua sira iha ninia ukun okos no anima ninia povu “atu serbí Jeová”.—Versíkulu 15-17.
Se Ita sente katak Ita la iha folin no la merese atu hetan perdua husi Maromak tanba sala neʼebé uluk Ita halo, hanoin-hetan kona-ba Manasés nia ezemplu. Maromak dirije ninia atan atu hakerek istória neʼe iha Bíblia ba ita-nia diʼak. (Roma 15:4) Klaru katak Jeová hakarak ita atu hatene katak nia “prontu atu fó perdua”. (Salmo 86:5) Ema nia laran mak buat neʼebé importante ba Jeová. Se ema neʼebé halo sala ruma, arrepende an ho laran, halo orasaun ba Jeová, husik ninia hahalok aat, no hakaʼas an atu halo fali buat neʼebé loos, Maromak mós sei fó perdua ba nia, hanesan Maromak fó perdua ba Manasés.—Isaias 1:18; 55:6, 7.
SUJESTAUN BA LEE BÍBLIA BA FULAN-JANEIRU: