Jeoas husik Jeová tanba ransu neʼebé la diʼak

NEʼE mak tempu neʼebé susar tebes iha Jeruzalein, sidade neʼebé Maromak nia templu harii bá. Ema foin oho Liurai Acazias. Maibé tuirmai Acazias nia amá Atalia halo buat neʼebé aat tebes. Nia haruka ema atu oho Acazias nia oan-mane hotu, katak ninia bei-oan rasik! Ó hatene tanbasá?​—a Atu nuneʼe, nia bele sai ukun-naʼin ida atu troka sira-nia fatin.

Maski nuneʼe, Atalia nia bei-oan ida, bebé Jeoas, hetan salvasaun, no ninia avó-feto la hatene kona-ba neʼe. Hakarak hatene oinsá nia hetan salvasaun?​— Loloos, bebé neʼe iha tia ida naran Jeoseba, neʼebé subar nia iha Maromak nia templu. Jeoseba bele halo nuneʼe tanba ninia laʼen mak Amlulik Boot Jeoada. Entaun, sira naʼin-rua hamutuk proteje bebé Jeoas.

Jeoada no Jeoseba subar Jeoas iha templu ba tinan neen. Iha neʼebá mak nia aprende kona-ba Maromak Jeová no ninia ukun-fuan sira. Ikusmai, bainhira Jeoas tinan hitu, Jeoada halo Jeoas sai liurai. Hakarak hatene oinsá Jeoada halo ida-neʼe no saida mak akontese ba Jeoas nia avó-feto neʼebé aat, Atalia?​—

Jeoada bolu subasubar guarda espesiál neʼebé serbí liurai sira iha Izraél atu halibur hamutuk. Nia fó-hatene sira katak nia no ninia feen salva ona Liurai Acazias nia oan-mane ida. Depois neʼe, Jeoada lori Jeoas ba guarda sira-neʼe no sira hatene katak Jeoas mak ukun-naʼin neʼebé loos. No tuirmai sira komesa halo planu.

Jeoada lori Jeoas sai ba liʼur no tau koroa ba nia. Iha neʼebá, ema “komesa basa liman no dehan: ‘Viva liurai!’” Guarda sira hamriik haleʼu Jeoas atu proteje nia. Bainhira Atalia rona lian sira-neʼe, nia halai sai no hakilar hodi dehan katak sira mak traidór. Maibé Jeoada haruka xefe sira-neʼe atu oho tiha Atalia.​—2 Reis 11:1-16.

Tuir ó-nia hanoin, Jeoas kontinua rona ba Jeoada no kontinua halo buat neʼebé loos ka lae?​— Jeoas halo nuneʼe bainhira Jeoada sei moris. Porezemplu, Jeoas fó mandamentu ba povu atu fó osan hodi hadiʼa Maromak nia templu tanba durante ninia apá Acazias no ninia avó-mane Jeorão nia ukun sira la tau matan. Maibé mai ita buka-hatene saida mak akontese bainhira Amlulik Boot Jeoada mate.​—2 Reis 12:1-16.

Iha tempu neʼebá, Jeoas maizumenus tinan 40. Duké ransu ho ema neʼebé serbí Jeová, Jeoas habelun ho ema neʼebé adora maromak falsu sira. Iha tempu neʼebá, Jeoada nia oan-mane Zacarias mak amlulik. Tuir ó-nia hanoin, saida mak Zacarias halo bainhira nia hatene kona-ba buat aat hotu neʼebé Jeoas halo daudaun?​—

Zacarias hatete ba Jeoas no povu: “Imi husik ona Jeová, tan neʼe nia mós sei husik imi.” Rona tiha neʼe, Jeoas sai hirus tebes no haruka ema atu tuda mate Zacarias. Hanoin toʼok, uluk Zacarias nia apá mak salva Jeoas husi ohodór sira, maibé agora nia rasik mak oho fali Zacarias!​—2 Krónikas 24:1-3, 15-22.

Saida mak ó bele aprende husi istória neʼe?​— Ita lakohi sai hanesan Atalia neʼebé odi ema seluk no laran-aat. Ita presiza hadomi ita-nia maluk fiar-naʼin no mós ita-nia inimigu hanesan Jesus hanorin ita atu halo. (Mateus 5:44; João 13:34, 35) No hanoin-hetan bá katak se ita halo ona buat neʼebé diʼak hanesan Jeoas, ita presiza kontinua habelun ho ema neʼebé hadomi Jeová no anima ita atu serbí nia.