Fiar metin bá ita sei hetan salvasaun iha mundu nia rohan

Lakleur Jeová sei la hatudu tan pasiénsia ba mundu aat neʼe. Relijiaun falsu sei lakon ba nafatin, nasaun sira sei ataka Maromak nia povu, no Jeová sei halakon ema aat sira iha Armagedon. Ema Kristaun neʼebé loos hein namanas ba akontesimentu neʼe.

Klaru katak ita la hatene buat barak kona-ba terus boot. Porezemplu, ita la hatene bainhira mak neʼe sei hahú. Ita la hatene polítiku-naʼin sira sei uza razaun saida atu ataka relijiaun. Ita la hatene nasaun sira sei ataka Maromak nia povu ba tempu hira ka neʼe sei envolve saida deʼit. Ita mós la hatene ho loloos oinsá mak Jeová sei halakon ema aat iha Armagedon.

Maski nuneʼe, Bíblia fó sai informasaun hotu neʼebé ita presiza atu bele iha fiar no aten-brani iha futuru. Porezemplu, ita hatene katak ita moris iha “loron ikus” nia rohan. (2Ti 3:1) Ita hatene katak Jeová sei “habadak tempu” neʼebé ema ataka relijiaun atu nuneʼe relijiaun loos la lakon. (Mt 24:22) Ita hatene katak Jeová sei salva ninia povu. (2Pe 2:9) No mós ita hatene katak Ida neʼebé Jeová hili ona mak laran-metin no kbiit boot atu halakon buat aat hotu no salva ema-lubun boot hodi moris liu Armagedon.—Apk 19:11, 15, 16.

Akontesimentu iha futuru sei halo ema “dezmaia tanba taʼuk”. Maski nuneʼe, hodi lee no hanoin kleʼan kona-ba dalan neʼebé Jeová salva ninia povu iha tempu uluk no saida mak nia sei halo iha futuru, ita bele ‘hamriik loos no foti ita-nia ulun’, hodi fiar katak ita-nia salvasaun besik ona.—Lc 21:26, 28.