Pergunta no resposta kona-ba informasaun husi Eskola Servisu Teokrátiku
Pergunta tuirmai neʼe sei uza iha Eskola Servisu Teokrátiku iha semana neʼebé komesa 27 Outubru 2008. Katuas eskola nian sei halaʼo ida-neʼe iha minutu 30 nia laran. Informasaun neʼe mai husi knaar neʼebé halaʼo ona husi semana 1 Setembru toʼo 27 Outubru 2008.
PONTU NEʼEBÉ AJUDA ITA ATU HANORIN
1. Hodi halo saida deʼit mak ita bele hatene loloos kona-ba ema seluk nia fiar no kona-ba tansá mak nia fiar hanesan neʼe? [1 Set., be-IN p. 259 par. 1, 2] Ita presiza tempu barak atu hatene loloos buat neʼebé iha ema seluk nia laran. Atu halo nuneʼe, diʼak atu husu pergunta. Ita bele husu: “Ita sente oinsá kona-ba . . . ?” “Tansá mak Ita fiar katak . . . ?” ka “Se . . . karik, Ita sei halo saida?” Antes atu hadiʼa ema nia hanoin neʼebé sala, ita tenke buka-hatene tansá mak ema neʼe sente hanesan neʼe. Kuandu sira sente katak ita komprende sira-nia sentimentu, karik sai fasil ba sira atu hanoin didiʼak kona-ba buat neʼebé ita koʼalia.
2. Oinsá mak ita bele ajuda ema atu halakon hanoin sala no ódiu ba ema seluk? [15 Set., be-IN p. 260 par. 2] Ema neʼebé iha hanoin sala ka rai ódiu ba ema seluk, ema sira-neʼe tenke aprende oinsá mak Maromak Jeová haree kona-ba ema seluk no mós kona-ba ninia an rasik, no aprende atu haree ema seluk hanesan Maromak haree ema. Kuandu nia komprende oinsá mak Maromak Jeová hatudu laran-diʼak ba ema hotu neʼebé moris iha fatin oioin, iha nasaun no rasa oioin, nia sei hatene razaun husi Bíblia kona-ba tansá mak nia tenke simu ema seluk ho laran-diʼak. (Apos 10:34, 35)
3. Oinsá mak ita bele ajuda ita-nia estudante atu hatene didiʼak sira rasik nia laran, atu nuneʼe sira bele hametin sira-nia relasaun ho Maromak Jeová? [29 Set., be-IN p. 261 par. 3] Ita presiza ajuda ita-nia estudante atu la bele haluha katak Bíblia mak fó-hatene kona-ba Maromak Jeová nia haree mai ita. (Prov 17:3) Ita tenke fó laran-manas ba sira atu hanoin katak lee Bíblia mak dalan importante ida atu hatene oinsá mak Maromak Jeová nia haree ba ita-nia “hanoin no hakarak”. Hodi halo nuneʼe, sira bele hadiʼa sira-nia an tuir Maromak nia haree no hanoin. (Ebr 4:12)
4. Buat saida deʼit mak ita presiza atu hanoin nafatin kuandu ita hakaʼas an atu book rona-naʼin sira-nia laran? [13 Out., be-IN p. 262 par. 4] Diʼak atu hanoin nafatin katak ita serbisu hamutuk ho Maromak Jeová hodi halaʼo ita-nia knaar atu hanorin ema. (1 Kor 3:9) Maromak Jeová deʼit mak haree ema nia fuan no laran, no dada ema atu iha relasaun diʼak ho nia. (Prov 21:2; Joao 6:44) Nia la obriga ema ida atu simu lia-loos, maibé kuandu ita uza Bíblia, Maromak bele ajuda ema atu hatene katak eskritura neʼe mak fó resposta ba sira-nia pergunta ka orasaun.
5. Tansá mak importante ba ita atu tuir oras iha reuniaun sira iha kongregasaun? [20 Out., be-IN p. 263 par. 1, 3, kaixa] Hodi kuidadu kona-ba oras, ita bele halo “buat hotu . . . loloos no momoos”. (1 Kor 14:40) Ita presiza planu atu uza tempu ho didiʼak atu esplika pontu ida-idak neʼebé importante. Liután neʼe, maski ema nia toman no hakarak mak la tuir oras, ita-nia reuniaun tenke komesa no ramata tuir oras.
KNAAR NÚMERU 1
6. Saida mak book Paulo atu hakerek ninia surat primeiru ba ema kristaun sira iha Korintu? [1 Set., si-IN p. 210 par. 3] Paulo simu surat husi kongregasaun foun iha Korintu, no nia presiza hakerek resposta ba surat neʼe. Liután neʼe, Paulo hetan informasaun balu neʼebé halo nia laran-susar. (1 Kor 1:11; 5:1; 11:18) Informasaun hirak-neʼe halo Paulo laran-susar tebes, tan neʼe nia la temi kedas kona-ba surat neʼebé nia simu, no iha kapítulu 7 versíkulu 1 mak foin temi kona-ba surat neʼe.
7. Tanbasá mak Paulo hakerek ninia surat segundu ba ema kristaun sira iha Korintu? [15 Set., si-IN p. 214 par. 1-2] Tanba Tito fila husi Korintu no fó-hatene Paulo oinsá mak kongregasaun simu ninia surat primeiru, neʼebé book sira atu arrepende an. Maibé, kongregasaun iha perigu nia laran iha dalan espirituál tanba “apóstolu boot sira”, neʼebé Paulo bolu nuʼudar “apóstolu bosok” no “serbisu-naʼin neʼebé laran-makerek”. (2 Kor 11:5, 13, 14) Ema balu laran-rua no koʼalia aat kona-ba Paulo nia kbiit no knaar nuʼudar apóstolu ida. Tan neʼe, nia hakerek surat segundu ba ema kristaun sira iha Korintu atu koʼalia kona-ba buat neʼebé kongregasaun presiza duni atu hadiʼa.
8. Ema kristaun nia haree kona-ba serbisu haklaken tenkesér oinsá? [22 Set., si-IN p. 216-17 par. 18] Ema kristaun nia haree kona-ba serbisu haklaken tenkesér hanesan ho Paulo nian, neʼebé hakerek iha ninia surat segundu ba ema Korintu. Nia hafolin duni serbisu neʼebé nia simu. Serbisu-naʼin kristaun neʼebé simu knaar husi Maromak la buka osan husi Nia liafuan, maibé halaʼo ninia serbisu ho laran. Ita la iha surat neʼebé hatudu katak ita mak serbisu-naʼin neʼebé loos, maibé hatudu ida-neʼe liuhusi ita-nia hahalok neʼebé diʼak. Maski ita iha serbisu kmanek, ida-neʼe nunka halo ita foti-an. Ita bele halaʼo ita-nia serbisu tan deʼit ita simu forsa husi Maromak Jeová. (2 Kor 2:16, 17; 3:1-5; 4:7)
9. Oinsá mak ita bele iha hahalok neʼebé Maromak simu no bele fó ksolok ba ita-nia irmaun sira, hanesan irmaun kristaun sira iha Filipe? [13 Out., si-IN p. 225 par. 12] Ita bele banati-tuir ema kristaun iha Filipe hodi hatudu laran-luak, no ajuda ita-nia irmaun sira neʼebé iha susar nia laran. (Flp 1:3-6) Ita bele halo Maromak kontente kuandu ita kontinua ‘laran-metin iha espíritu ida deʼit, hodi buka tahan ita-nia fiar iha evanjellu ho laran ida deʼit’, hodi sai “naroman” iha mundu neʼebé aat. Kuandu ita halo buat hirak-neʼe, ita bele fó ksolok ba ita-nia irmaun sira. (Flp 1:27; 2:15; 4:1)
10. Oinsá mak Paulo no ninia maluk sira-nia hahalok book kongregasaun iha Tesalonika? [20 Out., si-IN p. 231 par. 13] Paulo hatete kona-ba nia an rasik ho ninia maluk sira neʼebé hamutuk ho nia katak sira hatoʼo laʼós liafuan diʼak deʼit, maibé mós sira-nia moris rasik ba irmaun sira iha Tesalonika neʼebé sira hadomi. Paulo halo orasaun katak ema kristaun sira iha Tesalonika sei “halo boot liután sira-nia domin ba malu”. Domin neʼebé hatudu ho laran mak hametin no fó ksolok ba malu, no halo sira lahanesan ho mundu aat neʼebé la iha domin no morál. (1 Tes 2:8; 3:12; 4:1-9)
PROGRAMA ATU LEE BÍBLIA
11. Liafuan “saran ema [aat] neʼe ba Diabu atu halo aat nia isin, atu nia espíritu bele hetan maksoin”, neʼe katak sá? (1 Kor 5:5) [1 Set., w08-IN 15/7 “Firman Yehuwa Itu Hidup—Pokok-Pokok Penting Surat kepada Orang-Orang Korintus”] Kuandu kongregasaun hasai ema ida, ema neʼe sai fali parte husi mundu aat neʼebé Diabu mak ukun. (1 Joao 5:19) Ema neʼe hanesan saran ba Diabu Satanás. Hodi hasai ema aat neʼe, kongregasaun hasai hahalok aat isin nian, no proteje kongregasaun nia “espíritu” ka hahalok diʼak neʼebé halo tuir Maromak. (2 Tim 4:22)
12. Ita komemora Jesus nia mate tinan ida dala hira? “Toʼo” bainhira? (1 Kor 11:26) [8 Set., w08-IN 15/7 “Firman Yehuwa Itu Hidup—Pokok-Pokok Penting Surat kepada Orang-Orang Korintus”] Paulo hatete katak kuandu ema kristaun neʼebé kose mina mak han paun no hemu tua, katak tinan ida dala ida, iha 14 Nisan, sira “haklaken Naʼi nia mate”. Sira halo nuneʼe “toʼo wainhira nia hiʼit an mai”, ka toʼo tempu neʼebé nia simu ema kose mina sira neʼebé moris hiʼas iha lalehan durante ninia “hiʼit an mai”. (1 Tes 4:14-17)
13. 2 Korinto 12:2-4 [MF] hatete kona-ba vizaun saida? Karik sé mak hetan vizaun neʼe? [22 Set., w04-IN 15/10 p. 8 par. 4; p. 10 par. 9] Vizaun neʼe hatudu kondisaun kmanek atu halaʼo adorasaun neʼebé loos, paraízu espirituál neʼebé Maromak Jeová nia povu goza iha “tempu ikus”. (Dan 12:4) Paulo hakerek eskritura neʼe kuandu nia defende ninia pozisaun nuʼudar apóstolu, tan neʼe ita bele fiar katak Paulo rasik mak hetan vizaun neʼe.
14. Tansá mak Paulo hatete katak Ukun-Fuan Moisés nian mak hanesan “pembimbing” ka ema ida neʼebé lori toʼo Kristu? (Gal 3:24, MF) [29 Set., w08-IN 1/3 p. 18-21] Paulo hakarak esplika kona-ba knaar neʼebé Ukun-Fuan mak halaʼo hodi proteje ema, no esplika mós katak Ukun-Fuan sei la hela ba nafatin. Lia-gregu neʼebé tradús ba “pembimbing” mak hanesan atan diʼak ida neʼebé ninia naʼi tau fiar hodi fó knaar atu proteje naʼi nia oan husi perigu no hanorin oan atu iha hahalok diʼak. Hanesan neʼe, Maromak fó Ukun-Fuan Moisés nian atu proteje ema Izraél atu la bele tuir hahalok aat morál nian no relijiaun nian husi rai seluseluk neʼebé haleʼu sira. Liután neʼe, kuandu oan sai boot ona, “pembimbing” la iha ona kbiit ba oan neʼe. Hanesan neʼe, Ukun-Fuan mós la hela ba nafatin. Kuandu ajuda ema judeu sira neʼebé fiar Maromak no lori ona sira toʼo Kristu, Ukun-Fuan nuʼudar “pembimbing” mós ramata ona ninia knaar.
15. Paulo hatoʼo orasaun ba Maromak atu bali, ka proteje, irmaun sira “ho isin diʼak no sala-laek, espíritu, klamar no isin”. Liafuan neʼe katak saida? (1 Tes 5:23) [20 Out., w08-IN 15/9 “Firman Yehuwa Itu Hidup—Pokok-Pokok Penting Surat kepada Orang-Orang Tesalonika dan Timotius”] Paulo halo orasaun kona-ba kongregasaun kristaun nuʼudar grupu neʼebé iha irmaun barak. Nia harohan atu kongregasaun bele iha “espíritu” neʼebé diʼak, ka hanoin neʼebé diʼak. Nia harohan mós kona-ba kongregasaun nia “klamar”, ka moris, atu kongregasaun sei iha nafatin, no kona-ba “isin”—irmaun kose mina sira, neʼebé halo isin ida deʼit. (1 Kor 12:12, 13) Hodi halo tuir Paulo nia orasaun neʼebé hatudu katak nia hanoin tebes kona-ba kongregasaun, ita-nia orasaun mós tenke hatudu katak ita hanoin tebes kona-ba ita-nia relasaun ho ita-nia irmaun sira iha mundu tomak.