Pergunta husi haklaken-naʼin

◼ Aman no mós inan bele sura tempu neʼebé uza bainhira estuda hamutuk ho família iha sira-nia relatóriu ka lae?

Maski aman mak iha responsabilidade boot liu atu hanorin sira-nia oan kona-ba “dixiplina no Naʼi [Jeová] nia doutrina loloos”, maibé inan mós hola parte iha responsabilidade neʼe. (Ef 6:4) Bíblia fó konsellu ba oan sira: “Rona, haʼu-nia oan, ba ó-nia aman nia dixiplina, no labele husik ó-nia inan nia ukun-fuan.” (Prov 1:8) Buat ida neʼebé importante tebes bainhira inan-aman hanorin oan sira mak estuda Bíblia nuʼudar família.

Uluk, aman ka inan deʼit neʼebé halaʼo estudu família nian ho oan sira neʼebé seidauk batizmu mak sura tempu, maski aman ho inan hamutuk atu hanorin. Maibé agora, ida-neʼe troka ona. Se karik durante estudu família nian aman hamutuk ho inan hola parte atu hanorin oan sira, entaun, aman no mós inan bele sura tempu toʼo oras ida, nuʼudar oras serbisu haklaken nian semana-semana. Klaru katak aman no inan uza tempu barak liu fali oras ida semana-semana atu hanorin oan sira. Atu bele fó treinu ba oan sira, inan-aman presiza hakaʼas an nafatin. (Deut 6:​6-9) Maibé, iha relatóriu ba serbisu haklaken fulan-fulan nian, liuliu ita hakarak hakerek serbisu neʼebé ita halo iha haklaken ba ema iha ita-nia haklaken-fatin. Tan neʼe, aman no mós inan bele sura deʼit oras ida semana-semana, maski estudu família nian halaʼo liu fali oras ida, ka halo liu fali dala ida semana-semana, ka aman no inan estuda ho oan sira ketaketak. Aman deʼit ka inan deʼit mak bele sura estudu Bíblia ida hamutuk ho vizita fali ida semana-semana.