Resposta ba parte pergunta no resposta kona-ba Eskola Servisu Teokrátiku

Resposta ba parte pergunta no resposta kona-ba Eskola Servisu Teokrátiku nian husi semana 7 Jullu toʼo 25 Agostu 2008.

INFORMASAUN MAI HUSI: Liafuan diak ba imi, Kitab Suci Terjemahan Dunia Baru [bi12], Menara Pengawal [w], Memperoleh Manfaat dari Pendidikan Sekolah Pelayanan Teokratis [be], “Segenap Alkitab Diilhamkan Allah dan Bermanfaat” (Edisaun 1991) [si], Bertukar Pikiran mengenai Ayat-Ayat Alkitab (Edisaun 2003) [rs].

MATADALAN: Estudante ida-idak presiza surat-tahan ba pergunta sira-neʼe husi Ita-nia Serbisu Reinu nian. Bainhira halaʼo pergunta no resposta ida-neʼe, ajuda rona-naʼin atu hafolin informasaun husi Eskola Servisu Teokrátiku durante fulan rua liubá. Katuas eskola nian bele husu pergunta seluk tan atu rona-naʼin bele: halo klaru pontu neʼebé importante; esplika razaun ba resposta sira; no fó komentáriu kona-ba oinsá mak bele halo tuir informasaun ruma. Surat-tahan ida-neʼe la iha resposta tomak; tan neʼe rona-naʼin sira karik fó resposta neʼebé lahanesan ho resposta neʼebé hakerek iha surat-tahan neʼe. Kuandu sira-nia resposta lasala no tuir buat neʼebé ita fiar, simu resposta sira-neʼe, maski sira la temi pontu neʼebé hakerek iha surat-tahan neʼe. Surat-tahan neʼe labele hatudu ba kongregasaun atu lee molok kongregasaun halaʼo pergunta no resposta, maibé katuas eskola bele uza informasaun neʼe kuandu halaʼo eskola. Pergunta no resposta sei halaʼo iha minutu 30 nia laran.

LIA-MENON BA KATUAS ESKOLA NIAN: Favór ida, hili irmaun ida neʼebé hetan knaar atu lee iha estudu Menara Pengawal atu hamriik iha plataforma hodi lee eskritura sira-neʼebé temi iha pergunta iha Ita-nia Serbisu Reinu nian. Baibain, irmaun neʼe lee uluk eskritura, no depois neʼe mak Ita lee pergunta. Tanba la iha tempu barak atu halaʼo pergunta no resposta, Ita bele deside atu la lee eskritura neʼebé naruk maibé esplika badak deʼit pontu importante.

Data neʼebé hakerek tuir pergunta sira-neʼe hatudu semana neʼebé informasaun neʼe hatoʼo iha reuniaun.

PONTU NEʼEBÉ AJUDA ITA ATU HANORIN

1. Oinsá mak ita bele hatudu laran-diʼak no matenek bainhira ita haklaken lia-loos ba ema? (Flp 4:5) [7 Jul., be-IN p. 251 par. 3] Ita tenke hanoin kona-ba ema nia moris, sira-nia situasaun, no oinsá sira sente, no kuidadu atu la diskute kona-ba buat hotu neʼebé sira hanoin sala. Trata ema hanesan neʼe ajuda sira atu simu buat neʼebé ita koʼalia husi Eskritura sira.

2. Oinsá mak apóstolu Paulo nia ezemplu kuandu nia koʼalia ba ema gregu iha Areópago bele ajuda ita atu haklaken ba ema neʼebé la fiar Bíblia? (Apos 17:22, 23) [14 Jul., be-IN p. 252 par. 1-2] Kuandu Paulo haklaken ba ema gregu iha Areópago, nia la komesa hodi koʼalia kona-ba eskritura sira. Duké halo ida-neʼe, nia komesa koʼalia kona-ba buat neʼebé sira hatene no simu ona, no nia uza buat sira-neʼe atu halo sira hanoin kona-ba Kriadór no Kriadór nia hakarak. Tanba ema barak hakarak iha moris neʼebé diʼak liu, ita bele hatudu interese ba buat neʼebé halo sira laran-susar no hatudu buat neʼebé Bíblia hatete kona-ba oinsá rezolve buat sira-neʼe.

3. Maski ita hatene katak ema neʼebé ita koʼalia mak iha hanoin neʼebé sala, oinsá mak ita bele hatudu respeitu no laran-diʼak ba ema neʼe? [21 Jul., be-IN p. 252 par. 5–p. 253 par. 1] Dala ruma, diʼak liu atu fó obrigadu deʼit ba ema neʼe, no koʼalia kona-ba buat ida seluk neʼebé sei fó rezultadu diʼak. Ita tenke hanoin-hetan katak ita-nia knaar mak atu “fó sasin”, laʼós atu obriga ema atu fiar buat neʼebé ita fiar ona. (Mt 24:14) Ema tenke hili rasik kona-ba saida mak sira hakarak fiar, no ita labele halakon sira-nia direitu neʼe.

4. Saida mak ita tenke hanoin nafatin, nuʼudar ita hakaʼas an atu koʼalia iha dalan neʼebé halo ema fiar buat neʼebé ita hatoʼo? [4 Ago., be-IN p. 255 par. 3, kaixa] Ema sei la fiar ka halo tuir buat neʼebé ita koʼalia se sira la fiar katak ida-neʼe mak loos. Atu sira fiar buat neʼebé ita koʼalia, importante tebes ba ita atu hatoʼo liafuan neʼebé mai husi Maromak neʼebé kria lalehan no rai. Hodi hatudu buat neʼebé ita fiar husi Bíblia, diʼak atu uza livru sira neʼebé atan laran-metin no matenek halo.

5. Oinsá mak ita bele uza matenek atu bele book ema nia fuan? (Prov 20:5) [25 Ago., be- IN p. 258 par. 1-5] Ema neʼebé matenek sempre hanoin kona-ba ema seluk nia hanoin no sentimentu. Sai toman atu haree didiʼak ema seluk mós bele ajuda. Kuandu ita koʼalia ho ema kona-ba buat ruma, importante atu haree didiʼak oinsá mak ema neʼe hatán ba buat neʼebé ita koʼalia, hanesan sira-nia oin ka sira-nia lian troka uitoan.

KNAAR NÚMERU 1

6. Irmán sira tenke hanoin kona-ba saida bainhira sira hili situasaun ida ba sira-nia diskursu? [7 Jul., be-IN p. 44 par. 5-6] Atu hili situasaun ida, diʼak atu irmán sira hanoin kona-ba tema, kona-ba rona-naʼin, no kona-ba lisaun eskola nian neʼebé sira simu.

7. Saida mak irmaun sira tenke buka atu halo kuandu sira hatoʼo pontu importante husi programa atu lee Bíblia? (Neem 8:8) [14 Jul., be-IN p. 47 par. 2-3] Irmaun sira neʼebé hatoʼo pontu importante husi programa atu lee Bíblia sei esplika Maromak nia Liafuan, no hatudu ida-neʼe katak sá, no ajuda rona-naʼin atu komprende. Liuliu, irmaun tenke esplika oinsá mak imformasaun kona ita-nia moris ohin loron. Atu prepara ba diskursu neʼe, irmaun sira tenke halo orasaun hodi hanoin kona-ba kongregasaun nia presiza no hatoʼo presiza sira-neʼe hodi fó sai prinsípiu husi Bíblia.

8. Oinsá mak irmaun ida tenke halaʼo knaar neʼebé nia hetan iha Reuniaun Serbisu kuandu parte neʼe iha drama kiʼik ka entrevista ruma? [21 Jul., be-IN p. 49 par. 5] Tenke prepara didiʼak, tanba drama kiʼik sira-neʼe fó ezemplu ba irmaun-irmán sira atu halo tuir. Tan neʼe, antes loron reuniaun nian irmaun neʼebé halaʼo parte sira-neʼe tenke koko atu pratika drama kiʼik ka entrevista ho irmaun sira neʼebé sei hola parte.

9. Livru Apostolu fó sai katak ita tenke haklaken iha dalan saida deʼit? (Apos 20:20, 21; 28:23) [28 Jul., si-IN p. 204 par. 35] Paulo fó ezemplu hodi “la taʼuk” atu “hanorin . . . iha ema . . . nia oin ka iha . . . uma”. Iha livru Apostolu fó sai beibeik tema kona-ba ‘fó sasin ho laran-manas’.

10. Irmaun neʼebé hatoʼo diskursu públiku bele halo saida atu bele hatudu katak buat neʼebé nia hanorin mai husi Bíblia? (Apos 17:​2, 3) [11 Ago., be-IN p. 52 par. 6–p. 53 par. 2] Irmaun neʼebé atu fó dismkursu labele hanoin deʼit oinsá atu esplika liafuan neʼebé hakerek ona iha surat-tahan. Duké halo ida-neʼe, nia tenke hanoin oinsá mak liafuan sira-neʼe mai husi Bíblia. Nia tenke uza tempu atu lee, esplika, fó ezemplu, no hatudu oinsá bele halo tuir eskritura neʼebé nia deside atu lee, duké fó atensaun deʼit ba surat diskursu nian.

PROGRAMA ATU LEE BÍBLIA

11. Tansá mak dadur nia naʼin-ulun iha rai Filipe hakarak “atu oho an”? (Apos 16:25-​27) [7 Jul., w90-IN 15/5 p. 25, kaixa] Rai-nakdoko halo dadur nia odamatan nakloke no korrente neʼebé kesi ema dadur sira mesak nakloke. Lei Roma nian hatete katak se ema dadur ida halai sai, ema neʼebé tau matan tenke hetan fali kastigu hanesan ho ema neʼebé halai sai neʼe. Tan neʼe, dadur nia naʼi-ulun hakarak oho an deʼit duké hetan fali kastigu hanesan ema ida neʼebé halai tiha ona.

12. Maski ema fó-terus ba Aristarco no Gaio, saida mak sira halo? (Apos 19:29; 20:4, 5) [14 Jul., w08-IN 15/2 p. 10 par. 16-​17] Kuandu ema-lubun boot neʼebé laran-nakali kaer Aristarco no Gaio no lori sira ba teatru iha Éfezu, sira karik hanoin katak sira sei mate. Maski nuneʼe, Bíblia la dehan katak sira lakon aten-brani. Liutiha fulan balu, sira naʼin-rua mós akompaña Paulo nia viajen terseiru maski iha situasaun neʼebé perigu tebes.

13. Bíblia hatete katak Saulo “tebe buat neʼebé kili kuda”, neʼe katak sá? (Apos 26:14) [28 Jul., w03-IN 1/10 p. 32] Liafuan “buat neʼebé kili kuda” katak ai-tonka ho besi tarak neʼebé ema uza atu baku kuda ka karau. “Tebe buat neʼebé kili kuda” dehan katak animál ida tebe hasoru fali ema neʼebé foin baku nia, maibé animál neʼe sei hetan kanek liután. Saulo hakanek nia an hodi trata aat ema kristaun sira, tanba tuir loloos, nia funu hasoru Maromak. Saulo simu ho laran Jesus nia konsellu, troka nia dalan, no sai apóstolu kristaun ida naran Paulo. Iha Eclesiastes 12:11, fó sai katak konsellu husi Maromak hanesan ai-tonka ho besi tarak ba karau tanba bele hakaʼas ita no hatudu dalan loos mai ita.

14. “Sala neʼebé hetan dalan tan ukun-fuan” neʼebé Maromak fó ba nasaun Izraél, katak sá? (Rom 7:​8, 11) [11 Ago., w08-IN 15/6 “Firman Yehuwa Itu Hidup​—Pokok-Pokok Penting Surat kepada Orang-Orang Roma”] Ukun-Fuan ajuda ema atu komprende kona-ba sala oioin no hahalok saida deʼit mak sala, no fó-hanoin beibeik katak sira sala-naʼin. Nuneʼe, sira bele rekoñese katak sira mak ema sala-naʼin iha dalan barak, no hatudu katak ema hotu mak sala-naʼin.

15. Oinsá mak ita “tau ahi-klaak lakan” iha inimigu nia ulun leten? (Rom 12:20) [18 Ago., w08-IN 15/6 “Firman Yehuwa Itu Hidup​—Pokok-Pokok Penting Surat kepada Orang-Orang Roma”] Iha tempu Bíblia nian, ema tau besi iha fornu boot nia laran ho ahi-klaak iha okos no mós iha leten. Manas husi leten ajuda atu halo besi nabeen no haketak husi foʼer. Ita mós tau ahi-klaak lakan iha inimigu nia ulun leten kuandu ita halo hahalok diʼak ba nia. Ida-neʼe bele hamam ar nia atitude toos no halo ninia hahalok diʼak mosu fali.