Resposta ba parte pergunta no resposta kona-ba Eskola Servisu Teokrátiku
Resposta ba parte pergunta no resposta kona-ba Eskola Servisu Teokrátiku husi semana 5 Maiu toʼo 30 Juñu, 2008.
INFORMASAUN MAI HUSI: Liafuan diak ba imi, Kitab Suci Terjemahan Dunia Baru [bi12], Menara Pengawal [w], Memperoleh Manfaat dari Pendidikan Sekolah Pelayanan Teokratis [be], “Segenap Alkitab Diilhamkan Allah dan Bermanfaat” (Edisaun 1991) [si], Bertukar Pikiran mengenai Ayat-Ayat Alkitab (Edisaun 2003) [rs].
MATADALAN: Estudante ida-idak presiza surat-tahan ba pergunta sira-neʼe husi Ita-nia Serbisu Reinu nian. Bainhira halaʼo pergunta no resposta ida-neʼe, ajuda rona-naʼin atu hafolin informasaun husi Eskola Servisu Teokrátiku durante fulan rua liubá. Katuas eskola nian bele husu pergunta seluk tan atu rona-naʼin bele: halo klaru pontu neʼebé importante; esplika razaun ba resposta sira; no fó komentáriu kona-ba oinsá mak bele halo tuir informasaun ruma. Surat-tahan ida-neʼe la iha resposta tomak; tan neʼe rona-naʼin sira karik fó resposta neʼebé lahanesan ho resposta neʼebé hakerek iha surat-tahan neʼe. Kuandu sira-nia resposta lasala no tuir buat neʼebé ita fiar, simu resposta sira-neʼe, maski sira la temi pontu neʼebé hakerek iha surat-tahan neʼe. Surat-tahan neʼe labele hatudu ba kongregasaun atu lee molok kongregasaun halaʼo pergunta no resposta, maibé katuas eskola bele uza informasaun neʼe kuandu halaʼo eskola. Pergunta no resposta sei halaʼo iha minutu 30 nia laran.
LIA-MENON BA KATUAS ESKOLA NIAN: Favór ida, hili irmaun ida neʼebé hetan knaar atu lee iha estudu Menara Pengawal atu hamriik iha plataforma no lee eskritura sira-neʼebé temi iha pergunta iha Ita-nia Serbisu Reinu nian. Baibain, irmaun neʼe lee uluk eskritura, no depois neʼe mak Ita lee pergunta. Tanba la iha tempu barak atu halaʼo pergunta no resposta, Ita bele deside atu la lee eskritura neʼebé naruk maibé esplika badak deʼit pontu importante.
Data neʼebé hakerek tuir pergunta sira-neʼe hatudu semana neʼebé informasaun neʼe hatoʼo iha reuniaun.
PONTU NEʼEBÉ AJUDA ITA ATU HANORIN
1. Saida mak ita bele halo atu rona-naʼin bele komprende didiʼak ilustrasaun neʼebé ita hatoʼo? [12 Maiu, be-IN p. 242 par. 3-5] Diʼak atu esplika kona-ba oinsá mak ilustrasaun bele aplika ba pontu neʼebé ita koʼalia daudauk. Porezemplu, kuandu Jesus hatete katak ninia dixípulu sira mak “mundu nia naroman”, nia hatete mós kona-ba saida mak sira tenke halo. (Mt 5:14-16) No mós, konta tiha ai-knanoik kona-ba bibi ida neʼebé lakon no hetan fali, nia hatete kona-ba ksolok neʼebé anju sira sente iha lalehan ba sala-naʼin ida neʼebé hakribi ninia sala. (Lc 15:7)
2. Tansá mak diʼak atu uza ilustrasaun simples neʼebé foti husi moris loron-loron nian? [26 Maiu, be-IN p. 245 par. 2-4] Ilustrasaun neʼebé foti husi moris loron-loron nian bele book rona-naʼin nia fuan. Hanesan Jesus, ita bele uza ilustrasaun neʼebé simples atu esplika buat neʼebé susar atu komprende. Hodi halo nuneʼe, ita bele ajuda ema atu komprende no la haluha lia-loos neʼebé ita hanorin daudaun husi Bíblia.
3. Tansá mak importante atu uza buat ruma neʼebé ema bele haree? Oinsá mak Maromak Jeová uza buat sira-neʼe atu hanorin lisaun neʼebé importante? (Gên 15:5; Jer 18:6; Jonas 4:10, 11) [2 Juñu, be-IN p. 247 par. 1-2] Se uza buat ruma neʼebé ema bele haree, ida-neʼe ajuda atu dada rona-naʼin nia atensaun no ajuda sira atu la haluha. Maromak Jeová uza fitun iha lalehan, badain sanan-rai nia serbisu-fatin, no ai-hun atu hanorin lisaun neʼebé importante. Hanesan neʼe, ita mós bele uza buat ruma neʼebé ema bele haree atu fó sai pontu importante iha dalan neʼebé rona-naʼin la bele haluha.
4. Iha dalan saida deʼit mak ita bele uza buat ruma neʼebé ema bele haree atu hanorin iha dalan neʼebé diʼak? [16 Juñu, be-IN p. 248 par. 1-3] Kuandu halaʼo estudu Bíblia, ita bele dada estudante nia atensaun ba gambar no husu estudante atu koʼalia kona-ba gambar neʼe. Kuandu estuda kona-ba profesia neʼebé ita presiza atu sura tempu, ka akontesimentu ruma iha istória, diʼak atu sura hodi hakerek iha surat-tahan, ka hakerek liña istória nian ka diagram no hatudu akontesimentu sira-neʼe tuir tempu iha istória. Hodi uza gambar no tabela neʼebé iha ita-nia livru sira, ita bele ajuda ema atu komprende lisaun neʼebé ita koʼalia daudaun.
5. Oinsá mak ita bele uza mapa kuandu hanorin Bíblia ba estudante? [23 Juñu, be-IN p. 248 par. 4] Mapa bele ajuda ita atu aprende didiʼak kona-ba fatin neʼebé ita lee husi Bíblia laran. Porezemplu, se ita estuda kona-ba oinsá mak Abraão laʼo rai husi Ur toʼo Haran, no depois bá Betél, ka oinsá mak ema Izraél sira laʼo rai husi Ejitu toʼo Rai neʼebé Promete ona, mapa sei ajuda ita hatene liután kona-ba fatin sira neʼebé temi iha Bíblia laran, no hatene mós fatin ida ba fatin seluk dook oinsá. Se ita uza mapa atu aprende kona-ba fatin sira neʼebé Jesus no apóstolu Paulo haklaken bá, ida-neʼe sei ajuda ita atu komprende oinsá mak sira hakaʼas an atu haklaken lia-foun diʼak.
KNAAR NÚMERU 1
6. Hodi simu ajuda husi Maromak nia espíritu santu, kona-ba saida deʼit mak ita bele komprende liuhusi estudu Bíblia? [12 Maiu, be-IN p. 32 par. 3-4] Hodi simu ajuda husi Maromak nia espíritu, ita bele komprende kona-ba oinsá mak liafuan husi Bíblia sai loos daudauk, no mós oinsá mak buat neʼebé akontese daudaun iha mundu iha relasaun ho loron ikus sira. (Mc 13:4-29; Apok 12:12) Ita bele hatene Kriadór hanesan saida hodi haree didiʼak buat neʼebé nia kria. (Rom 1:20) Estuda Maromak nia Liafuan mós sei ajuda ita atu haraik an, no atu la monu ba sala neʼebé lohi ita, no atu laʼo tuir Maromak Jeová nia dalan. (Ebr 3:13; Deut 17:18-20; Kol 1:10)
7. Oinsá mak ita bele uza Bíblia rasik hodi halo riset atu komprende liután eskritura ruma? [19 Maiu, be-IN p. 34 par. 4–p. 35 par. 2] Ita bele haree eskritura sira-neʼebé haleʼu eskritura ida-neʼe, no husu ba ita-nia an: ‘Liafuan neʼe koʼalia ba sé? Tuir eskritura sira-neʼe, liafuan ida-neʼe hatete iha situasaun saida? No hahalok saida mak ema hatudu iha tempu neʼebá?’ Se ita uza “Tradusaun Mundu Foun”, ita bele hatene kona-ba akontesimentu neʼebé halo profesia sai loos, no eskritura sira-neʼebé fó sai lisaun neʼebé hanesan, ka informasaun kona-ba ema no fatin, hodi loke ba eskritura neʼebé temi iha pájina neʼe nia klaran.
8. Oinsá mak Evanjellu Joao fó sai Jesus nuʼudar dalan neʼebé Maromak Jeová uza atu lori bensaun ba ema? [2 Juñu, si-IN p. 198 par. 32] Evanjellu Joao hatudu Jesus nuʼudar dalan mesak ida deʼit neʼebé Maromak uza atu lori bensaun ba ema, hanesan hakerek iha Joao 14:13, 14 no 16:23. João bolu Jesus nuʼudar “Maromak nia Bibi-Oan”, “ai-han moris nian”, “naroman moris nian”, “bibi-atan diʼak”, “moris-hiʼas no moris”, “dalan, lia-loos no moris”, no “uvas hun loloos”. (Joao 1:29; 6:35; 8:12; 10:11; 11:25; 14:6; 15:1)
9. Oinsá mak ita bele hatene husi Bíblia katak doutór Lucas mak hakerek livru Apostolu? [9 Juñu, si-IN p. 199 par. 3; p. 200 par. 5-7] Evanjellu Lucas no livru Apostolu hotu hakerek ba Teófilo. (Lc 1:3; Apos 1:1) Versíkulu balu neʼebé komesa livru Apostolu temi akontesimentu balu neʼebé hakerek ona iha parte ikus husi livru Lucas. Lucas hakerek buat hotu ho loos kona-ba anin-boot neʼebé halo ró nakfera no kona-ba sira-nia viajen husi Sezareia toʼo Roma. (Apos 27:40)
10. Baibain, kuandu prepara nota badak atu hatoʼo diskursu, hakat saida deʼit mak ita presiza atu halo? [16 Juñu, be-IN p. 39-41] Hakat primeiru mak hanoin kona-ba tema, ka pontu neʼebé importante liu atu hatoʼo. Buka atu komprende didiʼak liafuan ida-idak husi tema. Hanoin kona-ba buat neʼebé ita hakarak halo liuhusi ita-nia diskursu. Tuirmai, buka-hatene pontu sira neʼebé ita hakarak koʼalia atubele fó sai tema no kumpre ita-nia hakarak neʼe. Buka informasaun liután, hodi hili deʼit eskritura no informasaun neʼebé iha relasaun ho pontu sira neʼebé importante liu. Tau informasaun “didiʼak” hodi hanoin oinsá mak bele halo diskursu atu sai fasil liu ba ema atu komprende no simu. (Lc 1:3)
PROGRAMA ATU LEE BÍBLIA
11. Templu ida-neʼebé mak harii “iha tinan haatnulu-resin-neen nia laran”? (Joao 2:20) [5 Maiu, w08 15/4 “Firman Yehuwa Itu Hidup—Pokok-Pokok Penting Buku Yohanes”] Ema judeu sira hanoin kona-ba serbisu neʼebé Liurai Herodes husi rai Judeia mak halo atu harii fali templu Zorobabel nian. Tuir matenek-naʼin kona-ba istória naran Josefo, liutiha tinan 18 husi tempu neʼebé Herodes hahú ninia ukun, katak tinan 18/17 molok Kristu, nia komesa serbisu neʼe atu harii fali templu. Santuáriu no fatin neʼebé importante liu, nia halo hotu iha tinan ualu nia laran. Maibé, serbisu atu harii buat seluseluk iha templu neʼe kontinua toʼo Páskua iha tinan 30 liutiha Kristu, no iha tempu neʼebá mak ema judeu sira hatete katak gasta tinan 46 atu harii templu.
12. Sé mak ema sira neʼebé ‘liu ona husi mate ba moris’? (Joao 5:24, 25) [12 Maiu, w08 15/4 “Firman Yehuwa Itu Hidup—Pokok-Pokok Penting Buku Yohanes”] Jesus koʼalia kona-ba ema neʼebé uluk mate iha dalan espirituál, katak la iha relasaun ho Maromak Jeová, maibé ikusmai rona Jesus nia liafuan no fiar ba nia no para atu moris naranaran deʼit. Sira ‘liu ona husi mate ba moris’, neʼe katak kastigu-mate sei la monu ona ba sira, no sira iha esperansa atu moris ba nafatin tanba sira-nia fiar ba Maromak. (1 Ped 4:3-6)
13. Oinsá mak Jesus “hadiʼa fatin” ka prepara fatin ba ninia dixípulu sira-neʼebé laran-metin ba nia iha lalehan? (Joao 14:2) [26 Maiu, w08 15/4 “Firman Yehuwa Itu Hidup—Pokok-Pokok Penting Buku Yohanes”] Jesus “hadiʼa fatin” hodi halo aliansa foun sai válidu, kuandu nia hamriik iha Maromak nia oin no saran ninia raan nia folin ba Maromak. No mós Jesus simu kbiit nuʼudar liurai, depois neʼe mak ema kose-mina sira neʼebé mate ona komesa atu hetan moris-hiʼas iha lalehan.
14. Tansá mak Jesus hatete ba Maria Madalena atu labele ‘kona netik’, ka kaer metin nia? (Joao 20:17) [2 Juñu, w08 15/4 “Firman Yehuwa Itu Hidup—Pokok-Pokok Penting Buku Yohanes”] Maria kona netik Jesus ka kaer metin Jesus tanba nia hanoin katak Jesus atu besik saʼe ba lalehan no nia sei la haree tan Jesus. Hodi ajuda Maria atubele fiar katak Jesus sediauk saʼe ba lalehan, Jesus hatete ba nia atu labele kona netik nia tan, maibé haruka nia atu bá hodi fó-hatene dixípulu sira kona-ba ninia moris-hiʼas.
15. Liafuan neʼebé dehan katak Jesus “sei fila fali mai nuʼudar sira haree nia saʼe ba lalehan” katak sá? (Apostolu 1:9-11) [9 Juñu, rs-IN p. 183 par. 4; it-1-IN p. 1222 par. 9] Kuandu anju sira dehan katak Jesus sei fila fali mai “nuʼudar” nia saʼe ba lalehan, sira la uza liafuan gregu neʼebé arti isin (morfé), maibé uza liafuan gregu (tropos) neʼebé arti dalan. Ida-neʼe katak Jesus sei fila fali mai mundu hanesan iha dalan neʼebé nia saʼe ba lalehan. Kuandu nia saʼe daudaun, kalohan taka netik nia, no ema la bele haree ona Jesus. Livru Apostolu hatudu katak iha tempu neʼebá, la iha serimónia boot neʼebé dada ema nia atensaun atu haree Jesus saʼe daudauk ba lalehan, maibé dixípulu balu neʼebé laran-metin ba Jesus deʼit mak haree. Ema barak la hatene kona-ba buat neʼebé akontese daudauk iha tempu neʼebá. Nuneʼe mós kuandu Kristu fila fali hodi simu kbiit nuʼudar liurai iha Reinu iha tinan 1914.