Informasaun kona-ba reuniaun boot ba loron tolu

◼ Oras: Programa sei hahú iha tuku 9:20 dadeer iha loron tolu hotu. Reuniaun fatin sei loke iha tuku 8:00 dadeer. Kuandu komesa múzika atu loke programa, ita hotu tenke tuur ona iha reuniaun fatin. Hodi halo nuneʼe, ita hatudu respeitu ba programa neʼebé komesa daudauk. Programa sei ramata iha tuku 4:55 lokraik iha loron-sesta no sábadu, no iha tuku 4:00 lokraik iha loron-domingu.

◼ Buka tuur-fatin: Ita bele rai hela deʼit tuur-fatin ba Ita-nia maluk neʼebé mai hamutuk Ita iha karreta ida, ka família neʼebé hela ho Ita iha uma ida.

◼ Han-meiudia: Diʼak atu lori Ita-nia hahán ba reuniaun fatin duké husik fatin neʼe atu han durante tempu deskansa. Labele lori tua ka serveja ba reuniaun fatin.

◼ Kontribuisaun: Ita bele hatudu katak ita agradese ba arranju sira-neʼe hodi fó kontribuisaun ba serbisu ba mundu tomak iha Salaun Reinu ka reuniaun boot. Se halo kontribuisaun hodi fó cek iha reuniaun boot, favór ida hakerek katak cek neʼe selu ba “Watchtower Bible and Tract Society”.

◼ Asidente no emerjénsia: Se ema ruma sai moras tebes iha reuniaun fatin, favór ida fó-hatene ba irmaun sira-neʼebé serbisu nuʼudar asistente. Se presiza, katuas ida sei bolu ambulánsia.

◼ Restaurante: Hanoin nafatin atu fó glória ba Maromak Jeová liuhusi ita-nia hahalok neʼebé diʼak bainhira ita bá restaurante.

◼ Otél: (1) Ita labele hameno kuartu barak liu duké kuartu neʼebé Ita presiza, no mós ema neʼebé toba iha kuartu ida labele liu númeru neʼebé otél nia naʼin deside ona. (2) Se Ita hatene katak Ita sei la uza otél neʼebé Ita hameno tiha ona, diʼak atu fó-hatene kedas ba otél neʼe nia naʼin. (3) Ita labele teʼin iha kuartu laran se otél-naʼin la fó lisensa atu halo nuneʼe. (4) Se otél-naʼin mak prepara matabixu ka kafé ho gratis, labele foti no lori sai ba liʼur. Foti deʼit buat neʼebé Ita han ka hemu iha otél laran. (5) Hatudu hahalok nuʼudar ema kristaun neʼebé loos kuandu hasoru no koʼalia ho serbisu-naʼin sira iha otél.

◼ Batizmu: Ema neʼebé atu hetan batizmu iha reuniaun boot neʼe tenke tuur iha fatin neʼebé prepara nanis ona ba sira antes atu komesa programa iha sábadu dadeer. Sira ida-idak presiza atu lori toallia no roupa batizmu nian neʼebé la mihis ka badak liu. Dala ruma, ema hatais roupa neʼebé la diʼak no la hatudu respeitu ba tempu importante neʼe. Katuas neʼebé halo pergunta ba sira neʼebé hakarak hetan batizmu tenke esplika ho klaru kona-ba oinsá atu hatais iha dalan neʼebé diʼak. Ita hetan batizmu atu hatudu katak Ita dedika an ona ba Maromak Jeová. Tanba desizaun neʼe mak buat neʼebé Ita halo entre Ita ho Maromak Jeová deʼit, ladiʼak atu ema naʼin-rua tama bee-laran hamutuk hodi hakoʼak malu ka kaer liman atu hetan batizmu dala ida deʼit.

◼ Kartaun naran nian: Durante loron tolu neʼe, tau nafatin kartaun naran nian ba tinan 2008 bainhira laʼo bá reuniaun fatin no fila husi neʼebá, ka kuandu Ita bá fatin neʼebé deʼit. Dala barak kartaun neʼe bele loke dalan atu fó sasin neʼebé diʼak. Ita tenke foti kartaun no ninia plástiku liuhusi Ita ida-idak nia kongregasaun, tanba buat sira-neʼe la fahe iha fatin neʼebé halaʼo reuniaun boot. Keta husik toʼo loron atu halaʼo reuniaun boot mak Ita foin husu kartaun neʼebé Ita no Ita-nia família sei uza. Keta haluha atu lori nafatin Ita-nia kartaun neʼebé hatudu katak Ita la simu raan.

◼ Telemovel: Ita tenke hamate ita-nia telemovel, ka taka ninia lian atu labele halo susar ba ema atu rona diskursu.