Pergunta husi lee-naʼin
Tanbasá mak Eliseu husu atu simu espíritu ba “dala rua” husi Elias?
Foin antes Elias halo kompletu ninia knaar nuʼudar profeta ida iha rai-Izraél, profeta Eliseu neʼebé idade kiʼik liu nia, hakbesik ba Elias no husu: “Favór ida, haʼu bele simu espíritu neʼebé Ita iha ba dala rua ka lae?” (2 Reis 2:9) Karik Eliseu husu hanesan neʼe tanba hanoin neʼe mak liman-rohan neʼebé nia iha direitu atu simu. Baibain oan-mane primeiru iha direitu atu simu liman-rohan ba dala rua husi ninia aman. (Deuteronómio 21:17) Bainhira ita aprende liután kona-ba istória neʼe, ita bele komprende ho didiʼak no mós aprende lisaun neʼebé ita bele aplika.
Jeová haruka profeta Elias atu hili Eliseu nuʼudar profeta neʼebé sei troka nia. (1 Reis 19:19-21) Maizumenus ba tinan neen, Eliseu serbí ho laran-metin nuʼudar Elias nia atan no deside metin atu halo ida-neʼe toʼo rohan. Iha Elias nia loron ikus nuʼudar profeta iha Izraél, Eliseu kontinua hamutuk ho Elias. Maski Elias husu Eliseu atu la laʼo tuir tan nia, maibé ba dala tolu Eliseu hatán: “Haʼu sei la husik Ita.” (2 Reis 2:2, 4, 6; 3:11) Eliseu hadomi profeta Elias hanesan ninia aman rasik.—2 Reis 2:12.
Maibé laʼós Eliseu deʼit mak sai hanesan oan ba Elias. Elias no Eliseu mós ransu ho mane sira neʼebé ema koñese nuʼudar “profeta sira-nia oan-mane sira”. (2 Reis 2:3) Livru Segundu Reis hatudu katak oan-mane sira-neʼe mós haree Elias nuʼudar aman. (2 Reis 2:3, 5, 7, 15-17) Maibé tanba Eliseu mak simu knaar husi Jeová atu troka Elias, tan neʼe Eliseu sai hanesan Elias nia oan-mane primeiru. Iha tempu antigu iha rai-Izraél, oan-mane primeiru simu liman-rohan ba dala rua husi ninia aman liu fali ninia alin sira seluk. Tan razaun neʼe mak Eliseu husu atu simu espíritu neʼebé Elias iha ba dala rua.
Tanbasá mak Eliseu husu ida-neʼe iha tempu neʼebá? Tanba knaar neʼebé nia atu simu hodi troka Elias nuʼudar profeta iha rai-Izraél mak la fasil. Eliseu rekoñese katak ninia kbiit la toʼo atu bele kumpre knaar neʼe, no nia presiza kbiit neʼebé la hanesan baibain husi Jeová. Nia presiza hatudu aten-brani hanesan Elias. (2 Reis 1:3, 4, 15, 16) Tan neʼe, nia husu atu simu espíritu neʼebé Elias iha ba dala rua, ida-neʼe sei ajuda nia atu sai aten-brani no serbí Jeová ho laran-manas. Só Maromak nia espíritu santu deʼit mak bele ajuda Eliseu hatudu hahalok sira-neʼe. (1 Reis 19:10, 14) Oinsá Elias hatán?
Elias hatene katak só Maromak deʼit mak bele fó espíritu neʼe. Ho haraik an nia hatán: “Ó husu buat neʼebé susar tebes. Se ó haree haʼu bainhira Maromak foti haʼu, entaun ó sei simu buat neʼebé ó husu.” (2 Reis 2:10) No Jeová husik Eliseu haree Elias bainhira nia saʼe iha anin-fuik laran. (2 Reis 2:11, 12) Eliseu simu buat neʼebé nia husu. Jeová fó ba nia espíritu neʼebé nia presiza atu kumpre ninia knaar foun no tahan susar sira.
Ohin loron, ema neʼebé iha esperansa atu bá lalehan no mós Jeová nia atan sira seluk bele hetan anima husi istória neʼe. Dala ruma karik ita sente laran-kraik tanba hanoin ita-nia kbiit ka matenek la toʼo atu kumpre knaar foun ida. Ka dala ruma ita-nia aten-brani sai menus bainhira haklaken tanba ema neʼebé kontra ita aumenta, ka ema lakohi atu rona. Maibé, se ita husu Jeová nia ajuda, nia sei fó duni espíritu santu ba ita atu bele tahan dezafiu no situasaun susar oioin. (Lucas 11:13; 2 Korinto 4:7; Filipe 4:13) Loos duni, hanesan Jeová fó kbiit ba Eliseu atu halaʼo knaar neʼebé susar, nia sei ajuda ita hotu atu kumpre didiʼak ita-nia serbisu ba Maromak.—2 Timóteo 4:5.