Pergunta husi lee-naʼin

Sé mak ema Filístia neʼebé temi iha Bíblia?

Dala barak Bíblia temi kona-ba ema Filístia neʼebé hela iha rai-Kanaan bainhira ema Izraél tama ba rai neʼebé Maromak promete. Ba tempu kleur, ema Filístia sira kontra hasoru Maromak nia povu. Ezemplu ida mak tempu neʼebé David kontra hasoru ema Filístia nia asuwaʼin ida naran Golias.​—1 Samuel 17:1-3, 23-53.

Bíblia fó sai katak iha tempu antigu, ema Filístia muda husi illa Kaftor ba tasi-ibun iha rai-Kanaan nia parte sudueste nian. (Jeremias 47:4) Kaftor iha neʼebé? Ensiklopédia kona-ba Bíblia esplika katak maski ema la hatene ho loloos, maibé matenek-naʼin sira hanoin katak karik iha tempu antigu illa Kaftor mak refere ba illa Kreta ka illa Kreta hamutuk ho illa sira seluk neʼebé besik Kreta.

Tan neʼe, Bíblia Tradusaun Mundu Foun iha Amós 9:7 hatete: “Jeová hatete: ‘Oh povu Izraél, ba haʼu, imi hanesan deʼit ho ema Kus nia oan sira. Haʼu mak lori sai ema Izraél husi rai-Ejitu, loos ka lae? Haʼu mak lori sai ema Filístia husi Kreta no ema Síria husi Kir, loos ka lae?’”

Ita la hatene horibainhira mak ema Filístia sira husik illa Kreta hodi muda ba rai-Kanaan neʼebé ikusmai bolu nuʼudar rai-Filístia. Rai neʼe iha tasi-ibun parte sudueste entre Jope no Gaza. Karik iha Abraão no Isaac nia tempu, ema Filístia hela ona iha área ne’e.​—Génesis 20:1, 2; 21:32-34; 26:1-18.

Tinan barak liutiha, depois ema Izraél tama ba rai neʼebé Maromak promete, ema Filístia nafatin iha kbiit boot iha área neʼebá. (Éxodo 13:17; Josué 13:2; Juís 1:18, 19; 3:3, 4; 15:9, 10; 1 Samuel 4:1-11; 7:7-14; 13:19-23; 1 Reis 16:15) Bainhira Liurai Uzias ukun Judá, ema Filístia sei hela iha sira-nia sidade Gat, Jabne, no Asdod. (2 Krónikas 26:6) Sidade boot seluk neʼebé temi iha Bíblia husi ema Filístia, inklui Ekron, Askelon, no Gaza.

Alexandre Boot ataka no manán ema Filístia nia sidade Gaza, maibé ikusmai ema la temi tan ema Filístia. Matenek-naʼin ida esplika kona-ba ema Filístia iha revista ida kona-ba Bíblia no arkeolojia hodi hatete: “Ema Filístia mós sai dadur iha Babilónia. . . . Maibé la iha informasaun kona-ba saida mak akontese ba ema Filístia sira iha neʼebá. Sira neʼebé la sai dadur no hela nafatin iha Askelon bainhira Liurai Nabukodonozór manán funu, lakon sira-nia kultura no identidade. Sira lakon mohu husi istória.”

Liafuan Palestina neʼebé ema temi ohin loron mai husi lian Latina no Gregu, no neʼe mai husi lian Ebraiku nia liafuan ba “Filístia”. Tradusaun Bíblia balu iha lian Arabi uza liafuan “ema Filístia” neʼebé atu hanesan ho liafuan neʼebé refere ba “ema Palestina” ohin loron, no neʼe halo ema konfuzaun. Maibé tradusaun Bíblia Today’s Arabic Version uza liafuan Arabi neʼebé la hanesan atu halo klaru diferensa entre ema Filístia iha tempu antigu no ema Palestina ohin loron.

[Dezeñu]

Uma antigu neʼebé rahun ona iha Askelon

[Credit Line]

Pictorial Archive (Near Eastern History) Est.