Bíblia nia haree kona-ba soe-malu no haketak-malu

Maromak Jeová hakarak feen no laʼen atu moris tuir juramentu kaben nian. Kuandu Maromak Jeová fó-kaben ba mane no feto primeiru, Nia dehan: “Mane . . . sei moris hamutuk ho nia feen no sira sei sai isin ida deʼit.” Tempu barak liutiha, Jesus Kristu temi filafali liafuan neʼe, no hatutan: “Neʼe duni buat neʼebé Maromak tau hamutuk, ema keta haketak.” (Gênesis 2:24; Mateus 19:3-6) Tan neʼe, tuir Maromak Jeová no Jesus nia hanoin, feen no laʼen tenke moris hamutuk toʼo ida mate. (1 Korinto 7:39) Tanba arranju kaben mak sagradu, kaben-naʼin labele hanoin atu soe malu nuʼudar dalan atu rezolve problema lalais. Tuir loloos, Maromak Jeová odi soe-malu kuandu la iha razaun husi Bíblia.—Malaquias 2:15, 16.

Tuir Bíblia, ho razaun saida deʼit mak ema bele soe malu no kaben fali ho ema seluk? Loloos, Maromak Jeová odi sala-foʼer hotu. (Gênesis 39:9; 2 Samuel 11:26, 27; Salmo 51:4; 1 Korinto 6:9, 10) Tan nia odi tebes sala-foʼer, nia husik ida-neʼe nuʼudar razaun atubele soe malu. (Atu hatene liután sala-foʼer katak sá, haree Kapítulu 9, parágrafu 7.) Maromak Jeová fó direitu ba kaben-naʼin neʼebé la halo sala atu deside se nia sei kontinua atu moris hamutuk ka soe malu ho ninia kaben neʼebé halo sala. (Mateus 19:9) Tan neʼe, kuandu ida neʼebé la halo sala mak hili atu soe malu, nia la halo buat ida neʼebé kontra hasoru Maromak Jeová nia hakarak. Maibé, ninia maluk kristaun iha kongregasaun labele fó ideia ba nia, katak soe-malu mak diʼak liu. Karik iha situasaun balun, ida neʼebé la halo sala hakarak atu nafatin moris hamutuk ho nia kaben neʼebé halo sala ona, liuliu se nia hatudu duni katak nia arrepende an. Ikusmai, feen ka laʼen neʼebé iha direitu atu soe nia kaben tenke halo desizaun rasik no simu buat saida deʼit neʼebé sei mosu tanba ninia desizaun neʼe.​—Galasia 6:5.

Iha mós situasaun balun neʼebé susar tebes neʼebé halo ema kristaun deside atu haketak malu ka soe malu maski ninia kaben la halo sala-foʼer. Iha situasaun hanesan neʼe, Bíblia haruka ema neʼebé haketak an husi ninia kaben atu “hela mesak ka hadame malu fali”. (1 Korinto 7:11) Ema kristaun neʼe labele buka atu kaben ho ema seluk. (Mateus 5:32) Agora, mai ita hanoin kona-ba situasaun balun neʼebé halo ema deside atu haketak malu.

Kuandu laʼen lakohi duni atu tau matan ba família. Karik família sai kiak tebes no kuran buat neʼebé presiza atu halaʼo moris, tanba laʼen lakohi atu halaʼo ninia knaar atu tau matan ba ninia família, maski nia bele halo nuneʼe. Bíblia hatete: “Ema neʼebé la tau matan ba . . . sira neʼebé horik hamutuk ho nia, ema neʼe hewai tiha nia fiar no aat liu fali ema neʼebé fiar-laek.” (1 Timoteo 5:8) Se laʼen hanesan neʼe lakohi troka ninia hahalok neʼebé aat, ninia feen tenke halo desizaun kona-ba haketak malu tuir lei estadu nian atu proteje ninia an no ninia oan sira. Se iha informasaun katak ema kristaun ida mak lakohi tau matan ba ninia família, katuas kristaun sira tenke buka-hatene kona-ba problema neʼe. Dala ruma, kongregasaun hasai ema neʼebé lakohi duni atu tau matan ba família.

Kuandu halo violénsia makaʼas. Dala ruma, ema halo violénsia makaʼas ba nia kaben, toʼo halo kanek no besik atu oho nia. Se ema neʼebé halo violénsia mak ema kristaun, katuas iha kongregasaun tenke buka-hatene se nia halo violénsia duni ka lae. Hahalok hanesan hirus makaʼas no violénsia bele sai nuʼudar razaun atu kongregasaun hasai ema neʼe.​—Galasia 5:19-21.

Kuandu iha perigu atu lakon relasaun diʼak ho Maromak. Karik kaben-naʼin ida fó terus beibeik ba ida seluk atu labele halaʼo adorasaun neʼebé loos no obriga nia atu halo buat ruma neʼebé kontra Maromak nia ukun-fuan. Iha situasaun hanesan neʼe, karik ida neʼebé simu terus tenke halo desizaun atu haketak malu tuir lei estadu nian nuʼudar dalan ida deʼit atubele “halo tuir Maromak nia hakarak liu ema sira-nian”.​—Apostolu 5:29.

Se situasaun neʼebé temi iha leten mosu, ema ida labele koko atu obriga ema neʼebé hetan terus atu haketak malu ka kontinua moris hamutuk ho ninia kaben. Maski maluk kristaun neʼebé iha esperiénsia barak ona ka katuas sira bele ajuda nia hodi fó konsellu husi Bíblia, maibé sira la hatene buat hotu-hotu neʼebé akontese entre feen no laʼen. Maromak Jeová deʼit mak hatene. Klaru katak, se ema kristaun ida fó-hatene buat ruma neʼebé ladún loos kona-ba problema iha uma laran tan deʼit atu hakarak haketak an husi ninia kaben, ema ida-neʼe la hatudu respeitu ba Maromak no mós ba arranju kaben nian. Hanesan neʼe mós ho ema neʼebé koʼalia buat neʼebé ladún loos kona-ba ninia sala. Maromak Jeová hatene planu hotu neʼebé ema halo, maski koko makaʼas atu subar. Loos duni, “buat hotu bele haree no nakloke deʼit ba nia matan. Ba nia ita sei hatán kona-ba buat hotu”. (Ebreu 4:13) Maibé se kaben-naʼin kristaun ida hasoru beibeik perigu iha ninia moris no ikusmai nia hili atu haketak an husi ninia kaben, ema ida labele koʼalia aat ba ninia desizaun neʼe. Tuir loloos, “ita hotu sei hamriik iha Maromak futar oin no Nia sei tesi lia”.​—Roma 14:10-12.