APOKALIPSE

1 Tuirmai neʼe mak liafuan* kona-ba buat neʼebé Jesus Kristu hatudu sai ona. Jesus simu buat sira-neʼe husi Maromak,+ atu nuneʼe nia bele hatudu sai ba Maromak nia atan sira+ kona-ba buat neʼebé lakleur tan tenke akontese. Jesus haruka ninia anju ba Maromak nia atan* João,+ no fó sai liafuan sira-neʼe ba João liuhusi sinál oioin. 2 João fó sasin kona-ba buat hotu neʼebé nia haree, katak Maromak nia liafuan no sasin neʼebé Jesus Kristu fó sai. 3 Ksolok ba ema neʼebé lee ho lian makaʼas, no rona liafuan husi profesia neʼe, no halo tuir buat neʼebé hakerek iha laran,+ tanba tempu neʼebé deside tiha ona besik daudaun.

4 Haʼu João, hakerek ba kongregasaun* hitu+ neʼebé iha provínsia Ázia:

Haʼu harohan katak imi sei simu laran-diʼak neʼebé boot no dame husi “Ida neʼebé iha uluk, iha agora no atu mai”,+ no husi espíritu hitu+ neʼebé iha ninia kadunan oin, 5 no husi Jesus Kristu, “Testemuña neʼebé Laran-Metin”,+ “ida neʼebé moris-hiʼas primeiru husi mate”,+ no “Ukun-Naʼin ba liurai sira iha mundu”.+

Nia hadomi ita+ no halo ita livre husi ita-nia sala liuhusi ninia raan rasik,+ 6 no nia halo ita sai liurai*+ no amlulik+ ba ninia Maromak no Aman. Sin, nia merese simu glória no kbiit ba nafatin. Amen.

7 Nia sei mai ho kalohan,+ no ema hotu nia matan sei haree nia, neʼe inklui sira neʼebé uluk sona nia. No suku hotu iha mundu sei baku sira-nia an ho triste tanba nia.+ Sin, Amen.

8 “Haʼu mak Alfa no Ómega”,*+ Maromak Jeová* dehan, “Ida neʼebé iha uluk, iha agora no atu mai, Ida neʼebé Kbiit Boot Liu Hotu”.+

9 Haʼu João, imi-nia maluk fiar-naʼin, neʼebé hetan susar+ no tahan terus+ hamutuk ho imi no sai liurai+ hamutuk ho imi nuʼudar Jesus nia dixípulu.+ Haʼu iha illa ida naran Patmos tanba haʼu koʼalia kona-ba Maromak no fó sasin kona-ba Jesus. 10 Maromak nia espíritu lori haʼu ba Naʼi nia loron, no haʼu rona lian makaʼas ida iha haʼu-nia kotuk hanesan trombeta nia lian, 11 neʼebé dehan: “Hakerek buat neʼebé ó haree iha livru ida no haruka ba kongregasaun hitu iha Éfeso,+ Esmirna,+ Pérgamo,+ Tiatira,+ Sardes,+ Filadélfia+ no Laodiseia.”+

12 Haʼu fila oin atu haree sé mak koʼalia ba haʼu, no kuandu haʼu fila oin, haʼu haree ahi-oan fatin hitu husi osan-mean,+ 13 no iha ahi-oan fatin sira-neʼe nia klaran haʼu haree ema ida neʼebé hanesan oan-mane husi ema,+ nia hatais roupa neʼebé naruk toʼo ninia ain no kesi sintu husi osan-mean iha ninia hirus-matan. 14 Liután neʼe, ninia fuuk mutin hanesan bibi-malae fulun neʼebé mutin, hanesan jelu-rahun, no ninia matan hanesan ahi neʼebé lakan.+ 15 Ninia ain nabilan hanesan riti diʼak+ neʼebé nabeen iha ahi-matan, no ninia lian hanesan bee barak nia tarutu. 16 No iha fitun hitu iha ninia liman-loos,+ no surik naruk ida ho kroʼat iha sorin-sorin sai husi ninia ibun,+ no ninia oin hanesan loro-matan kuandu fó naroman boot.+ 17 Bainhira haʼu haree nia, haʼu monu iha nia ain hanesan ema neʼebé mate.

Nuneʼe nia tau ninia liman-loos ba haʼu no dehan: “Keta taʼuk. Haʼu mak Primeiru+ no Ikus,+ 18 no haʼu mak ida neʼebé moris.+ Uluk haʼu mate tiha,+ maibé agora haʼu moris tinan ba tinan ba nafatin,+ no haʼu iha xave ba mate no ba rate.*+ 19 Tan neʼe, hakerek buat sira neʼebé ó haree ona, no mós hakerek buat neʼebé akontese agora no buat neʼebé sei akontese tuirmai. 20 Kona-ba segredu santu husi fitun hitu neʼebé ó haree iha haʼu-nia liman-loos, no kona-ba ahi-oan fatin hitu husi osan-mean: Fitun hitu reprezenta anju sira iha kongregasaun hitu, no ahi-oan fatin hitu reprezenta kongregasaun hitu.+

2 “Hakerek ba anju+ husi kongregasaun* iha Éfeso,+ dehan: Tuirmai neʼe mak lia-menon husi nia neʼebé kaer fitun hitu iha ninia liman-loos, no laʼo entre ahi-oan fatin hitu husi osan-mean:+ 2 ‘Haʼu hatene ó-nia hahalok sira, ó-nia serbisu no ó tahan susar oioin. Ó la simu ema aat, no ó koko sira neʼebé dehan katak sira mak apóstolu,+ maibé sira laʼós apóstolu, no ó haree katak sira bosok-teen. 3 Ó mós tahan ona susar oioin, no hakaʼas an atu tahan problema barak tanba haʼu-nia naran+ no ó la sai kole.+ 4 Maski nuneʼe, haʼu la kontente ho ó kona-ba buat ida: ó husik ona ó-nia domin uluk nian.

5 “‘Tan neʼe, hanoin-hetan ó monu husi neʼebé, no arrepende an bá+ no halo hahalok neʼebé uluk ó halo. Se ó la arrepende an,+ haʼu sei bá hasoru ó, no haʼu sei hasai tiha ó-nia ahi-oan fatin.+ 6 Maski nuneʼe, ó halo buat ida neʼebé diʼak: ó odi hahalok husi grupu* Nicolau nian+ neʼebé haʼu mós odi. 7 Ema neʼebé iha tilun, rona bá buat neʼebé Maromak nia espíritu dehan ba kongregasaun sira:+ Ba ema neʼebé manán,+ haʼu sei fó lisensa ba nia atu han husi ai-hun moris nian+ neʼebé iha Maromak nia paraízu.’

8 “Hakerek ba anju husi kongregasaun iha Esmirna, dehan: Tuirmai neʼe mak lia-menon husi nia neʼebé ‘Primeiru no Ikus’,+ neʼebé mate tiha maibé moris fali ona:+ 9 ‘Haʼu hatene ó-nia terus no ó-nia situasaun kiak, maibé ó riku.+ Haʼu mós hatene kona-ba ema neʼebé koʼalia aat imi. Sira dehan katak sira ema Judeu maibé sira laʼós ema Judeu, no sira mak husi Satanás nia sinagoga.*+ 10 Keta taʼuk kona-ba susar sira neʼebé ó sei hasoru.+ Haree bá! Diabu sei kontinua soe imi balu ba komarka atu imi bele hetan koko neʼebé kompletu, no imi sei hetan terus ba loron sanulu. Hatudu bá katak ó laran-metin toʼo mate, no haʼu sei fó koroa moris nian ba ó.+ 11 Ema neʼebé iha tilun, rona bá+ buat neʼebé Maromak nia espíritu dehan ba kongregasaun sira: Ema neʼebé manán+ sei nunka hetan mate segundu.’+

12 “Hakerek ba anju husi kongregasaun iha Pérgamo, dehan: Tuirmai neʼe mak lia-menon husi nia neʼebé iha surik naruk ho kroʼat iha sorin-sorin:+ 13 ‘Haʼu hatene ó hela iha neʼebé, ó hela iha fatin neʼebé Satanás tau ninia kadunan. Maski nuneʼe, ó kontinua kaer metin ba haʼu-nia naran,+ no ó la nega ó-nia fiar ba haʼu+ iha Antipas nia tempu, nia mak haʼu-nia sasin neʼebé laran-metin,+ neʼebé ema oho+ iha imi-nia sorin, iha fatin neʼebé Satanás hela bá.

14 “‘Maski nuneʼe, haʼu la kontente ho ó kona-ba buat balu: iha ó-nia leet iha ema neʼebé tuir Balám nia hanorin.+ Nia hanorin Balak+ atu tau fatuk sidi nian iha ema Izraél nia oin, atu sira han buat neʼebé hasaʼe tiha ona ba estátua* no halo sala seksuál.*+ 15 Nuneʼe mós iha ó-nia leet iha ema sira neʼebé tuir hanorin husi grupu* Nicolau nian.+ 16 Tan neʼe, arrepende an bá. Se lae, haʼu sei bá lalais hasoru ó, no haʼu sei halo funu hasoru sira hodi uza surik naruk neʼebé sai husi haʼu-nia ibun.+

17 “‘Ema neʼebé iha tilun, rona bá buat neʼebé Maromak nia espíritu dehan ba kongregasaun sira:+ Ba ema neʼebé manán,+ haʼu sei fó maná balu neʼebé subar hela,+ no haʼu sei fó fatuk mutin ba nia, no iha fatuk neʼe nia leten hakerek ona naran foun ida, no la iha ema ida mak hatene naran neʼe, só ema neʼebé simu fatuk neʼe mak hatene.’

18 “Hakerek ba anju husi kongregasaun iha Tiatira,+ dehan: Tuirmai neʼe mak lia-menon husi Maromak nia Oan-Mane, neʼebé iha matan hanesan ahi neʼebé lakan,+ no ain nabilan hanesan riti diʼak:+ 19 ‘Haʼu hatene ó-nia hahalok sira, ó-nia domin, ó-nia fiar, ó-nia serbisu ba Maromak no ó tahan susar oioin, no haʼu hatene katak ó-nia hahalok ikus diʼak liu fali uluk nian.

20 “‘Maski nuneʼe, haʼu la kontente ho ó kona-ba buat ida: ó husik deʼit feto Jezabel iha ó-nia leet,+ neʼebé bolu nia an nuʼudar profeta ida. Nia hanorin no lohi haʼu-nia atan sira hodi halo sala seksuál*+ no han buat neʼebé hasaʼe ona ba estátua. 21 Haʼu fó tempu ba nia atu arrepende an, maibé nia lakohi arrepende an hodi husik ninia sala seksuál.* 22 Lakleur tan haʼu sei soe nia ba ema moras nia toba-fatin, no kona-ba sira neʼebé halo adultériu* ho nia, se sira la arrepende an hodi husik hahalok neʼebé hanesan feto neʼe nian, haʼu sei soe sira ba susar boot nia laran. 23 No haʼu sei oho ninia oan sira ho moras-peste, atu nuneʼe kongregasaun hotu sei hatene katak haʼu buka-hatene ema nia hanoin* no laran, no haʼu sei selu ba imi tuir imi ida-idak nia hahalok.+

24 “‘Maski nuneʼe, kona-ba ema sira seluk iha Tiatira, katak ema hotu neʼebé la simu Jezabel nia hanorin no la hatene buat neʼebé bolu nuʼudar “segredu kleʼan husi Satanás”,+ haʼu dehan: Haʼu sei la tau tan todan seluk ba imi. 25 Maibé, kaer metin ba buat diʼak neʼebé imi iha ona toʼo haʼu mai fali.+ 26 No ba ema neʼebé manán no halo tuir haʼu-nia hahalok sira toʼo rohan, haʼu sei fó podér ba nia atu ukun nasaun sira,+ 27 no nia sei ukun ema* ho ai-tonka besi,+ atu nuneʼe nia bele harahun sira hanesan sanan-rai, hanesan haʼu mós simu ona podér husi haʼu-nia Aman. 28 Haʼu sei fó fitun dadeer nian ba nia.+ 29 Ema neʼebé iha tilun, rona bá buat neʼebé Maromak nia espíritu dehan ba kongregasaun sira.’

3 “Hakerek ba anju husi kongregasaun iha Sardes, dehan: Tuirmai neʼe mak lia-menon husi nia neʼebé iha Maromak nia espíritu hitu+ no iha fitun hitu:+ ‘Haʼu hatene ó-nia hahalok sira. Ó haree hanesan* moris hela, maibé ó mate ona.+ 2 Matan-moris bá,+ no hametin buat sira neʼebé besik mate ona, tanba haʼu haree katak ó seidauk halo ó-nia serbisu hotu* ba haʼu-nia Maromak. 3 Tan neʼe, kontinua hanoin* kona-ba buat neʼebé ó simu no rona ona, no kontinua halo tuir ida-neʼe, no arrepende an bá.+ Tuir loloos, se ó la hadeer, haʼu sei mai hanesan naʼok-teen ida,+ no ó sei la hatene iha oras saida mak haʼu sei toʼo mai.+

4 “‘Maski nuneʼe, ó iha ema balu* iha Sardes neʼebé la hafoʼer sira-nia roupa,+ no sira sei laʼo ho haʼu ho roupa mutin+ tanba sira merese ida-neʼe. 5 Ema neʼebé manán+ sei hatais roupa mutin,+ no haʼu sei la hasai* ninia naran husi livru moris nian.+ Haʼu sei rekoñese ninia naran iha haʼu-nia Aman nia oin no iha ninia anju sira-nia oin.+ 6 Ema neʼebé iha tilun, rona bá buat neʼebé Maromak nia espíritu dehan ba kongregasaun sira.’

7 “Hakerek ba anju husi kongregasaun iha Filadélfia, dehan: Tuirmai neʼe mak lia-menon husi nia neʼebé santu+ no loos,+ neʼebé kaer David nia xave,+ neʼebé loke odamatan atu ema ida labele taka, no taka odamatan atu ema ida labele loke: 8 ‘Haʼu hatene ó-nia hahalok sira. Haʼu loke ona odamatan ida iha ó-nia oin,+ odamatan neʼebé ema ida labele taka. Haʼu hatene katak ó iha kbiit uitoan, maibé ó kaer metin ba haʼu-nia liafuan no hatudu laran-metin ba haʼu-nia naran. 9 Kona-ba ema sira neʼebé husi Satanás nia sinagoga neʼebé dehan katak sira ema Judeu, maibé sira laʼós ema Judeu+ no sira bosok, haʼu sei halo sira mai no hakruʼuk* iha ó-nia ain no haʼu sei halo sira hatene katak haʼu hadomi ó. 10 Tanba ó halo tuir liafuan kona-ba oinsá haʼu tahan susar,*+ haʼu mós sei tau matan ba ó iha tempu koko nian,+ neʼebé atu akontese iha mundu tomak hodi koko ema sira neʼebé hela iha rai. 11 Haʼu sei mai lalais.+ Kontinua kaer metin ba buat diʼak neʼebé ó iha ona, atu nuneʼe ema ida labele foti ó-nia koroa.+

12 “‘Ema neʼebé manán, haʼu sei halo nia sai hanesan ai-riin iha haʼu-nia Maromak nia templu, no nia sei la sai tan husi neʼebá. Haʼu sei hakerek haʼu-nia Maromak nia naran iha nia+ no mós naran husi haʼu-nia Maromak nia sidade, katak Jeruzalein Foun,+ neʼebé tun mai husi lalehan husi haʼu-nia Maromak, no haʼu mós sei hakerek haʼu-nia naran foun iha nia.+ 13 Ema neʼebé iha tilun, rona bá buat neʼebé Maromak nia espíritu dehan ba kongregasaun sira.’

14 “Hakerek ba anju husi kongregasaun iha Laodiseia,+ dehan: Tuirmai neʼe mak lia-menon husi Amen,+ testemuña+ neʼebé laran-metin no loos,+ neʼebé mak Maromak nia kriasaun primeiru:+ 15 ‘Haʼu hatene ó-nia hahalok sira, katak ó la malirin no mós la manas. Haʼu hakarak ó sai hanesan bee malirin ka manas. 16 Maibé, tanba ó morna deʼit no la manas+ ka malirin,+ entaun haʼu sei muta sai ó husi haʼu-nia ibun. 17 Tanba ó dehan: “Haʼu riku,+ haʼu halibur ona rikusoin no la presiza tan buat seluk”, maibé ó la hatene katak ó la kontente, kuitadu liu, kiak, matan-delek no isin-tanan. 18 Haʼu fó konsellu ba ó atu sosa buat sira tuirmai neʼe husi haʼu: osan-mean neʼebé hamoos ona ho ahi hodi ó bele sai riku, roupa mutin atu ó bele hatais hodi ó la sai moe tanba ó isin-tanan,+ no ai-moruk matan nian atu kose ba ó-nia matan+ hodi ó bele haree.+

19 “‘Haʼu fó konsellu no dixiplina ba ema hotu neʼebé haʼu hadomi.+ Tan neʼe, hatudu laran-manas bá no arrepende an.+ 20 Haʼu hamriik iha odamatan oin no dere hela. Se ema ruma rona haʼu-nia lian no loke odamatan, haʼu sei tama ba ninia uma no han-kalan hamutuk ho nia no nia hamutuk ho haʼu. 21 Ba ema neʼebé manán,+ haʼu sei fó lisensa ba nia atu tuur hamutuk ho haʼu iha haʼu-nia kadunan,+ hanesan haʼu mós manán no tuur ona+ hamutuk ho haʼu-nia Aman iha ninia kadunan. 22 Ema neʼebé iha tilun, rona bá buat neʼebé Maromak nia espíritu dehan ba kongregasaun sira.’”

4 Liutiha buat sira-neʼe, haʼu hateke no haree odamatan ida neʼebé nakloke iha lalehan, no lian primeiru neʼebé haʼu rona mak hanesan trombeta ida. Lian neʼe dehan mai haʼu: “Saʼe mai iha neʼe, no haʼu sei hatudu ba ó buat neʼebé tenke akontese.” 2 Depois neʼe, derrepente deʼit Maromak nia espíritu komesa book an iha haʼu, no haʼu haree kadunan ida iha lalehan, no iha Ida neʼebé tuur iha kadunan neʼe.+ 3 No Ida neʼebé tuur iha kadunan neʼe nabilan hanesan fatuk-jaspe+ no fatuk-sárdiu,* no arkiris neʼebé haree hanesan fatuk-ezmeralda haleʼu kadunan neʼe.+

4 Iha kadunan 24 haleʼu kadunan neʼe, no katuas naʼin-24+ neʼebé hatais roupa mutin mak tuur iha kadunan sira-neʼe. Sira iha koroa osan-mean iha sira-nia ulun. 5 Rai-lakan+ no lian oioin no rai-tarutu+ sai husi kadunan neʼe. Iha kadunan neʼe nia oin iha ahi-oan hitu neʼebé lakan hela, no ahi-oan hitu neʼe reprezenta Maromak nia espíritu hitu.+ 6 Iha kadunan neʼe nia oin iha buat ida neʼebé hanesan tasi neʼebé haree hanesan vidru+ ka fatuk-kristál.

Iha kadunan neʼe nia klaran* no haleʼu kadunan neʼe, iha kriatura moris naʼin-haat+ neʼebé nakonu ho matan iha oin no iha kotuk. 7 Kriatura moris primeiru hanesan leaun,+ kriatura moris segundu hanesan karau-aman,*+ kriatura moris terseiru+ iha oin hanesan ema, no kriatura moris númeru haat+ hanesan manu-makikit neʼebé semo.+ 8 Kona-ba kriatura moris naʼin-haat neʼe, sira ida-idak iha liras neen; no sira-nia liras hotu nakonu ho matan.+ Loron-kalan sira kontinua dehan: “Maromak Jeová* mak santu, santu, santu.+ Nia mak Ida neʼebé Kbiit Boot Liu Hotu, neʼebé iha uluk, iha agora no atu mai.”+

9 Iha tempu ida-idak neʼebé kriatura moris sira-neʼe fó glória, respeitu no agradese ba Ida neʼebé tuur iha kadunan neʼe, Ida neʼebé moris tinan ba tinan ba nafatin,+ 10 katuas naʼin-24+ hakneʼak no hakruʼuk hodi adora Ida neʼebé tuur iha kadunan neʼe, Ida neʼebé moris tinan ba tinan ba nafatin, no sira soe sira-nia koroa iha kadunan neʼe nia oin, hodi dehan: 11 “Jeová,* ami-nia Maromak, Ita-Boot merese simu glória,+ respeitu+ no kbiit,+ tanba Ita kria ona buat hotu,+ no tanba Ita-nia hakarak mak buat hotu iha no kria tiha.”

5 Haʼu haree Ida neʼebé tuur iha kadunan+ neʼe kaer hela surat-tahan lulun ida iha ninia liman-loos. Surat-tahan neʼe iha letra iha sorin-sorin* no taka metin ho selus* hitu. 2 No haʼu haree anju forte ida koʼalia ho lian makaʼas, dehan: “Sé mak merese atu loke surat-tahan lulun neʼe no ninia selus?” 3 Maibé la iha ema ida iha lalehan ka iha rai ka iha rai-okos mak bele loke surat-tahan lulun neʼe ka haree ba surat-tahan neʼe nia laran. 4 Haʼu tanis makaʼas tanba la iha ema ida mak merese atu loke surat-tahan lulun neʼe ka haree ba surat-tahan neʼe nia laran. 5 Maibé katuas ida dehan ba haʼu: “Keta tanis tan. Leaun husi suku Judá,+ David+ nia abut,+ nia manán ona+ hodi bele loke surat-tahan lulun neʼe no ninia selus hitu.”

6 Haʼu haree bibi-oan+ ida hamriik hela besik kadunan,* iha kriatura moris naʼin-haat no katuas sira-nia klaran.+ Bibi-oan neʼe haree hanesan ema oho tiha ona nuʼudar sakrifísiu,+ no nia iha dikur hitu no matan hitu. Ninia matan hitu reprezenta Maromak nia espíritu hitu+ neʼebé haruka tiha ona ba mundu tomak. 7 Bibi-Oan hakbesik kedas ba Ida neʼebé tuur iha kadunan no foti surat-tahan lulun neʼe husi ninia liman-loos.+ 8 Kuandu nia foti surat-tahan neʼe, kriatura moris naʼin-haat no katuas naʼin-24+ hakneʼak iha Bibi-Oan nia oin, no sira ida-idak kaer hela arpa no manko osan-mean neʼebé nakonu ho insensu. Insensu reprezenta ema santu* sira-nia orasaun.+ 9 Sira kanta knananuk foun ida,+ hodi dehan: “Ita-Boot merese simu surat-tahan lulun neʼe no loke ninia selus, tanba ema oho ona Ita nuʼudar sakrifísiu no ho Ita-nia raan mak Ita sosa ona ema ba Maromak+ husi suku, língua, povu no nasaun hotu,+ 10 no Ita halo sira sai liurai*+ no amlulik ba ita-nia Maromak,+ no sira sei ukun nuʼudar liurai+ ba mundu tomak.”

11 Haʼu haree no rona lian husi anju barak neʼebé haleʼu kadunan neʼe no kriatura moris sira no katuas sira no sira hotu sura hamutuk rihun sanulu ba rihun sanulu no rihun ba rihun,+ 12 no sira koʼalia ho lian makaʼas, hodi dehan: “Bibi-Oan neʼebé ema oho ona nuʼudar sakrifísiu+ merese atu simu podér, rikusoin, matenek, kbiit, respeitu, glória no bensaun.”+

13 Tuirmai haʼu rona kriatura hotu iha lalehan no iha rai no iha rai-okos+ no iha tasi, no buat hotu neʼebé iha laran dehan: “Fó bensaun, respeitu,+ glória no kbiit tinan ba tinan ba nafatin+ ba Ida neʼebé tuur iha kadunan+ no ba Bibi-Oan.”+ 14 Kriatura moris naʼin-haat neʼe dehan: “Amen!” no katuas sira-neʼe hakneʼak no adora Maromak.

6 Haʼu haree Bibi-Oan+ loke selus* primeiru husi selus hitu neʼe,+ no haʼu rona kriatura moris naʼin-haat sira-neʼe ida+ koʼalia ho lian neʼebé hanesan rai-tarutu, hodi dehan: “Mai!” 2 Haʼu hateke no haree kuda mutin ida mai.+ Ida neʼebé saʼe kuda neʼe kaer hela rama ida, no Maromak fó ona koroa ida ba nia.+ Nia bá hodi manán ninia inimigu no manán sira hotu.+

3 Kuandu nia loke selus segundu, haʼu rona kriatura moris segundu+ dehan: “Mai!” 4 Kuda ida seluk sai mai, kuda neʼe kór-mean lakan; no ida neʼebé saʼe kuda neʼe simu podér atu hasai tiha dame husi rai atu nuneʼe ema sei oho malu, no nia simu surik boot ida.+

5 Kuandu nia loke selus terseiru,+ haʼu rona kriatura moris terseiru+ dehan: “Mai!” Haʼu hateke no haree kuda metan ida mai. Ida neʼebé saʼe kuda neʼe kaer hela dasin iha ninia liman. 6 Haʼu rona lian ida husi kriatura moris naʼin-haat nia klaran, neʼebé dehan: “Trigu kilograma ida* folin denáriu* ida+ no sevada kilograma tolu* folin denáriu ida. Keta estraga mina-oliveira no tua-uvas.”+

7 Kuandu nia loke selus númeru haat, haʼu rona kriatura moris númeru haat nia lian+ dehan: “Mai!” 8 Haʼu hateke no haree kuda kamutis ida mai. Ida neʼebé saʼe kuda neʼe nia naran mak Mate. No Rate* laʼo tuir nia. Sira simu podér ba rai nia sorin balun* atu oho ema ho surik naruk, rai-hamlaha,+ moras-peste no animál fuik iha rai.+

9 Kuandu nia loke selus númeru lima, haʼu haree raan*+ iha altár okos,+ neʼe katak raan husi sira neʼebé ema oho ona tanba Maromak nia liafuan no tanba sasin neʼebé sira fó sai ona.+ 10 Sira hakilar ho lian makaʼas, hodi dehan: “Naʼi Ukun-Naʼin Boot Liu, Naʼi neʼebé santu no loos,+ Ita sei hein toʼo bainhira atu tesi-lia ba ema sira neʼebé hela iha rai tanba sira fakar ami-nia raan?”+ 11 Naʼi fó roupa mutin ba sira ida-idak+ no dehan ba sira atu hein tan ba tempu uitoan toʼo númeru ba sira-nia maluk atan no maun-alin sira sai kompletu ona; ema sira-neʼe sei mate hanesan sira.+

12 Kuandu nia loke selus númeru neen, haʼu haree rai-nakdoko boot mosu. Loro-matan sai metan hanesan hena karón* neʼebé halo husi animál fulun,* fulan tomak sai mean hanesan raan,+ 13 no fitun sira iha lalehan monu ba rai, hanesan ai-figeira nia fuan matak neʼebé monu tanba anin-fuik. 14 Lalehan lakon hanesan surat-tahan neʼebé lulun tiha,+ foho hotu no illa hotu muda husi sira-nia fatin.+ 15 Tuirmai liurai sira iha mundu, ema-boot sira, tropa nia komandante sira, ema riku sira, ema sira neʼebé forte, atan hotu no ema livre hotu, sira bá subar an iha fatuk-kuak no iha fatuk nia leet iha foho sira.+ 16 Sira kontinua dehan ba foho sira no ba fatuk sira: “Monu ba ami-nia leten,+ no subar ami husi Maromak nia oin, Ida neʼebé tuur iha kadunan+ no husi Bibi-Oan nia hirus,+ 17 tanba loron boot ba sira-nia hirus toʼo mai ona,+ no sé mak bele tahan ida-neʼe?”+

7 Depois neʼe, haʼu haree anju haat hamriik iha rai nia lidun haat, no kaer metin hela anin haat husi rai, atu nuneʼe anin labele huu ba rai ka ba tasi ka ba ai-hun sira. 2 Tuirmai haʼu haree anju ida seluk saʼe husi parte leste,* no nia kaer hela selus* neʼebé nia simu husi Maromak neʼebé moris; no nia bolu ho lian makaʼas ba anju haat neʼebé simu ona podér atu halo aat ba rai no tasi, 3 dehan: “Keta halo aat ba rai ka tasi ka ba ai-hun sira toʼo ami tau tiha sinál*+ ba ita-nia Maromak nia atan sira-nia reen-toos.”+

4 Tuirmai haʼu rona númeru husi sira neʼebé hetan sinál,* sira hamutuk naʼin-144.000,+ no sira mai husi Izraél nia suku hotu:+

9 Liutiha buat sira-neʼe, haʼu hateke no haree ema-lubun boot neʼebé sura labele, neʼebé mai husi nasaun, suku, povu no língua hotu.+ Sira hamriik iha kadunan nia oin no iha Bibi-Oan nia oin, sira hatais roupa mutin+ no kaer ai-palmeira sanak iha sira-nia liman.+ 10 Sira kontinua haklalak ho lian makaʼas, dehan: “Ami-nia salvasaun mai husi ita-nia Maromak neʼebé tuur iha kadunan,+ no husi Bibi-Oan.”+

11 Anju hotu hamriik haleʼu kadunan no haleʼu katuas sira+ no mós haleʼu kriatura moris naʼin-haat, no sira hakneʼak no hakruʼuk ho oin ba rai iha kadunan nia oin no adora Maromak, 12 hodi dehan: “Amen! Fó hahiʼi, glória, agradese, respeitu tinan ba tinan ba nafatin ba ita-nia Maromak neʼebé iha podér, kbiit no matenek.+ Amen.”

13 Tuirmai katuas sira-neʼe ida husu haʼu: “Ó hatene sé mak ema sira neʼebé hatais roupa mutin neʼe?+ Sira mai husi neʼebé?” 14 Haʼu hatán kedas ba nia: “Haʼu-nia naʼi, Ita mak hatene.” Nia dehan ba haʼu: “Sira mak ema neʼebé liu terus boot.+ Sira fase ona sira-nia roupa no halo mutin ona sira-nia roupa ho Bibi-Oan nia raan.+ 15 Tan neʼe mak sira hamriik iha Maromak nia kadunan oin, no sira halo serbisu sagradu ba nia loron no kalan iha ninia templu. No Ida neʼebé tuur iha kadunan+ sei harii ninia tenda atu proteje sira.+ 16 Sira sei la hamlaha no la hamrook tan. Loro-matan no rai-manas makaʼas sei la kona sira,+ 17 tanba Bibi-Oan+ neʼebé besik kadunan neʼe* sei tau matan ba sira hanesan bibi-atan+ no sei dirije sira ba bee-matan moris nian.+ No Maromak sei hamaran ema nia matan-been hotu husi sira-nia matan.”+

8 Kuandu nia+ loke selus* númeru hitu,+ lalehan nonook maizumenus ba minutu 30. 2 No haʼu haree anju hitu+ neʼebé hamriik iha Maromak nia oin simu trombeta hitu.

3 Anju seluk toʼo mai no hamriik besik altár,+ no nia kaer insensu-fatin* neʼebé halo husi osan-mean, no Maromak fó nia insensu barak+ atu sunu iha altár osan-mean nia leten+ neʼebé iha kadunan nia oin hodi hasaʼe hamutuk ho ema santu* hotu nia orasaun. 4 Insensu neʼe nia suar husi anju neʼe nia liman hamutuk ho ema santu sira-nia orasaun+ saʼe ba Maromak nia oin. 5 Maibé, anju neʼe foti kedas insensu-fatin, no nia halo nakonu fatin neʼe ho ahi husi altár no soe ahi neʼe ba rai. Tuirmai mosu rai-tarutu, lian oioin, rai-lakan nabilan+ no rai-nakdoko. 6 Kona-ba anju hitu neʼebé kaer hela trombeta hitu,+ sira prepara ona atu huu trombeta sira-neʼe.

7 Anju primeiru huu ninia trombeta. No mosu jelu-fatuk no ahi kahur ho raan, no buat sira-neʼe monu tun ba mundu,+ no ahi han tiha mundu nia sorin balun,* ahi mós han ai-hun balun* no duʼut matak hotu.+

8 Anju segundu huu ninia trombeta. No buat ruma hanesan foho boot neʼebé lakan ho ahi soe tiha ba tasi.+ No tasi nia sorin balun* sai raan,+ 9 no kriatura moris* balun* neʼebé iha tasi mate,+ no ró balun* rahun.

10 Anju terseiru huu ninia trombeta. No fitun boot ida neʼebé lakan hanesan ahi-oan monu husi lalehan, no ida-neʼe monu ba mota balun* no mós ba bee-matan sira.+ 11 Fitun neʼe nia naran mak Ai-Tahan Moruk. Nuneʼe bee balun* sai moruk, no ema barak mate tanba bee neʼe, tanba bee sira-neʼe sai moruk ona.+

12 Anju númeru haat huu ninia trombeta. No loro-matan nia sorin balun,* fulan nia sorin balun* no fitun nia sorin balun* sai nakukun.+ Tan neʼe durante loron, oras balun* la hetan naroman, nuneʼe mós ho kalan.

13 Tuirmai haʼu haree manu-makikit ida semo iha lalehan* no haʼu rona nia koʼalia ho lian makaʼas, dehan: “Susar, susar, susar+ ba sira neʼebé hela iha rai tanba anju tolu seluk besik ona atu huu sira-nia trombeta!”+

9 Anju númeru lima huu ninia trombeta.+ No haʼu haree fitun ida monu husi lalehan ba rai, no Maromak fó xave ba rai-kuak neʼebé kleʼan tebes*+ ba nia. 2 Nia loke rai-kuak neʼebé kleʼan neʼe, no suar sai husi rai-kuak hanesan suar husi ahi-matan boot, no loro-matan ho anin sai nakukun+ tanba suar husi rai-kuak neʼe. 3 Gafañotu sai husi suar neʼe hodi tama ba rai,+ no Maromak fó kbiit* ba sira, hanesan ho kbiit* husi sakunar sira iha rai. 4 Nia haruka sira atu la halo aat ba ai-horis sira iha rai ka ba duʼut matak ka ba ai-hun sira, maibé halo aat deʼit ba ema sira neʼebé la iha Maromak nia sinál* iha sira-nia reen-toos.+

5 Gafañotu sira hetan lisensa atu fó-terus ba sira toʼo fulan lima maibé labele oho sira, no sira-nia terus hanesan ema neʼebé hetan terus bainhira sakunar tata.+ 6 Iha tempu neʼebá ema sei buka mate maibé sei la hetan, no sira sei hakarak tebes atu mate, maibé mate sei halai dook husi sira.

7 Gafañotu sira haree hanesan kuda neʼebé prontu ona atu bá funu.+ Iha sira-nia ulun iha buat neʼebé haree hanesan koroa osan-mean, no sira-nia oin hanesan ema nia oin, 8 maibé sira-nia fuuk hanesan feto nia fuuk. Sira-nia nehan hanesan leaun nia nehan,+ 9 no sira-nia hirus-matan taka ho buat neʼebé hanesan besi. No sira-nia liras nia lian hanesan kuda-karreta sira neʼebé halai lalais hodi bá funu.+ 10 No mós, sira iha ikun hanesan sakunar nia ikun, no sira-nia ikun iha kbiit* atu fó-terus ema ba fulan lima.+ 11 Sira-nia liurai mak anju neʼebé hein rai-kuak neʼebé kleʼan tebes.+ Iha lian Ebraiku anju neʼe naran Abadon,* no iha lian Gregu naran Apolion.*

12 Susar boot ida liu tiha ona. Tuirmai sei mosu tan susar boot rua.+

13 Anju númeru neen+ huu ninia trombeta.+ No haʼu rona lian ida sai husi dikur sira iha altár osan-mean+ neʼebé iha Maromak nia oin 14 no koʼalia ba anju númeru neen neʼebé kaer hela trombeta, hodi dehan: “Kore tiha anju haat neʼebé kesi hela iha mota boot Eufrates.”+ 15 No nia kore anju haat neʼe, neʼebé prontu ona ba oras, loron, fulan no tinan, atu oho ema balun.*

16 Haʼu rona númeru husi tropa neʼebé saʼe kuda, sira hamutuk millaun 200.* 17 Iha vizaun neʼe haʼu haree kuda sira no mós sira neʼebé saʼe kuda: Sira-nia hirus-matan taka ho besi kór-mean lakan, azúl no kinur. Kuda nia ulun hanesan leaun nia ulun,+ no ahi, ahi-suar no enxofre* sai husi sira-nia ibun. 18 No ema balun* mate tanba buat tolu neʼe, neʼe katak liuhusi ahi, suar no enxofre* neʼebé sai husi sira-nia ibun. 19 Kuda sira-neʼe nia kbiit* mak iha sira-nia ibun no sira-nia ikun, tanba sira-nia ikun haree hanesan samea ho ulun, no sira uza sira-nia ikun atu fó susar ba ema.

20 Maibé ema seluk neʼebé la mate tanba buat sira-neʼe, sira la arrepende an husi sira-nia hahalok.* Sira la para atu adora anju aat sira, no adora estátua* neʼebé halo husi osan-mean, osan-mutin, riti, fatuk no ai, neʼebé labele haree, labele rona no labele laʼo.+ 21 No sira la arrepende an husi sira-nia hahalok hanesan oho ema, halo espiritizmu,* halo sala seksuál* no naʼok.

10 Tuirmai haʼu haree anju forte ida seluk tun mai husi lalehan. Nia hatais kalohan hanesan ninia roupa,* arkiris iha ninia ulun leten, ninia oin hanesan loro-matan,+ ninia ain hanesan ahi,* 2 no ninia liman kaer hela surat-tahan lulun kiʼik neʼebé loke ona. Ninia ain sorin loos sama tasi, maibé ninia ain sorin karuk sama rai, 3 no nia hakilar ho lian makaʼas hanesan bainhira leaun hasai lian makaʼas.+ No bainhira nia hakilar, rai-tarutu hitu hasai lian+ hodi koʼalia.

4 Bainhira rai-tarutu hitu hasai lian hodi koʼalia, haʼu prontu ona atu hakerek, maibé haʼu rona lian ida husi lalehan+ dehan: “Taka metin tiha buat neʼebé rai-tarutu hitu koʼalia sai hodi tau selus,* no keta hakerek buat sira-neʼe.” 5 Anju neʼebé haʼu haree hamriik hela ho ain sorin ida sama tasi no sorin seluk sama rai, foti ninia liman-loos ba lalehan, 6 no nia jura hodi Ida neʼebé moris tinan ba tinan ba nafatin,+ neʼebé kria lalehan ho buat neʼebé iha laran, kria rai ho buat neʼebé iha laran, no kria tasi ho buat neʼebé iha laran,+ hodi dehan: “Nia sei la demora tan. 7 Maibé iha tempu neʼebé anju númeru hitu+ besik ona atu huu ninia trombeta,+ segredu santu+ neʼebé Maromak fó sai ona nuʼudar liafuan diʼak ba ninia atan profeta sira+ sei kumpre hotu.”

8 Tuirmai haʼu rona lian neʼebé sai husi lalehan+ koʼalia tan mai haʼu, dehan: “Bá, foti surat-tahan lulun neʼebé loke hela iha anju nia liman, anju neʼebé hamriik ho ain sorin ida sama tasi no sorin seluk sama rai.”+ 9 Haʼu hakbesik ba anju neʼe no haʼu dehan ba nia atu fó surat-tahan lulun kiʼik neʼe ba haʼu. Nia hatete ba haʼu: “Foti surat-tahan neʼe no han hotu,+ no surat-tahan neʼe sei sai moruk iha ó-nia kabun, maibé iha ó-nia ibun sei sai midar hanesan bani-been.” 10 Haʼu foti surat-tahan lulun kiʼik neʼe husi anju nia liman no han,+ no iha haʼu-nia ibun ida-neʼe midar hanesan bani-been,+ maibé kuandu haʼu han hotu tiha, haʼu-nia kabun sai moruk. 11 No sira dehan ba haʼu: “Ó tenke fó sai fali profesia kona-ba povu sira, nasaun sira, ema husi língua oioin no liurai barak.”

11 Tuirmai haʼu simu ai lotuk ida neʼebé hanesan ai-tonka,*+ no nia dehan ba haʼu: “Hamriik, sukat fatin sagradu* iha templu, sukat altár no mós sira neʼebé adora iha templu. 2 Maibé kona-ba templu nia pátiu* neʼebé iha fatin sagradu nia liʼur, husik deʼit ida-neʼe no keta sukat, tanba pátiu neʼe fó tiha ona ba nasaun sira, no sira sei sama sidade santu+ ba fulan 42.+ 3 Haʼu sei haruka haʼu-nia testemuña naʼin-rua atu fó sai profesia durante loron 1.260 hodi hatais hena karón.”* 4 Sira naʼin-rua reprezenta ai-oliveira hun rua+ no ahi-oan fatin rua+ neʼebé hamriik iha Naʼi ba mundu tomak nia oin.+

5 Se ema ruma hakarak atu halo aat ba sira, ahi sai husi sira-nia ibun no han hotu sira-nia inimigu. Se ema ruma hakarak atu halo aat ba sira, ema neʼe sei mate iha dalan hanesan neʼe. 6 Sira iha kbiit* atu taka lalehan+ hodi udan labele tun+ durante loron hotu neʼebé sira fó sai profesia, no sira iha kbiit* hodi halo bee sai raan+ no atu halo buat aat oioin ba rai dala barak tuir sira-nia hakarak.

7 Bainhira sira haklaken hotu ona, animál fuik neʼebé sai husi rai-kuak neʼebé kleʼan tebes* sei halo funu hasoru sira no manán sira no oho sira.+ 8 No sira-nia mate-isin sei latan deʼit iha dalan boot iha sidade boot iha fatin neʼebé ema oho sira-nia Naʼi iha ai-riin, Sodoma no Ejitu mak reprezenta sidade neʼe. 9 Povu sira, ema husi suku oioin, língua oioin no nasaun oioin sei hateke ba sira-nia mate-isin ba loron tolu ho balu,+ no sira la husik ema atu hakoi mate-isin sira-neʼe iha rate. 10 Ema sira neʼebé hela iha rai haksolok no halo selebrasaun tanba profeta naʼin-rua neʼe mate ona, no sira sei haruka prezente ba malu tanba uluk sira hetan terus husi profeta naʼin-rua neʼe.

11 Bainhira loron tolu ho balu neʼe liu tiha, Maromak hatama fali forsa moris nian* ba sira,+ no sira hamriik no ema neʼebé haree sira sai taʼuk tebetebes. 12 No sira rona lian makaʼas ida husi lalehan dehan ba sira: “Saʼe mai iha neʼe.” No sira saʼe ba lalehan iha kalohan laran no sira-nia inimigu haree* sira. 13 Iha oras neʼebá duni mak mosu rai-nakdoko boot, no sidade sorin balun* monu tiha. No ema naʼin-7.000 mate tanba rai-nakdoko, no sira seluk sai taʼuk no fó glória ba Maromak neʼebé iha lalehan.

14 Susar boot segundu+ liu tiha ona. Maibé, susar boot terseiru sei mai lalais.

15 Anju númeru hitu huu ninia trombeta.+ No iha lian sira neʼebé makaʼas iha lalehan dehan: “Agora ita-nia Naʼi+ no ninia Kristu*+ mak ukun mundu tomak, no Nia sei ukun nuʼudar liurai tinan ba tinan ba nafatin.”+

16 Katuas naʼin-24+ neʼebé tuur iha sira-nia kadunan iha Maromak nia oin, sira hakneʼak no hakruʼuk ho oin ba rai no adora Maromak, 17 hodi dehan: “Ami fó agradese ba Ita, Maromak Jeová,* Ida neʼebé Kbiit Boot Liu Hotu, neʼebé iha agora+ no iha uluk, tanba Ita hatudu ona kbiit boot no hahú ukun nuʼudar liurai.+ 18 Maibé nasaun sira sai hirus, no Ita rasik nia hirus toʼo mai, no tempu neʼebé deside tiha toʼo mai ona atu tesi-lia ba ema mate sira, no atu fó kolen+ ba Ita-nia atan profeta sira,+ ema santu* sira no sira neʼebé hamtaʼuk Ita-nia naran, ema baibain no ema-boot, no atu halakon sira neʼebé estraga daudaun mundu.”+

19 Tuirmai fatin sagradu iha Maromak nia templu neʼebé iha lalehan loke tiha, no haʼu bele haree ninia Arka Aliansa nian iha fatin sagradu iha ninia templu.+ No iha rai-lakan nabilan, lian oioin, rai-tarutu, rai-nakdoko no udan jelu-fatuk neʼebé boot.

12 Tuirmai sinál boot ida mosu iha lalehan: Feto ida+ hatais loro-matan nuʼudar ninia roupa, no fulan iha ninia ain okos, no iha ninia ulun iha fitun 12 nuʼudar ninia koroa. 2 Nia isin-rua hela, no nia hakilar tanba terus no moras tuur-ahi nian.

3 Sinál ida seluk mosu iha lalehan. Haree bá! Iha samea boot* neʼebé mean lakan,+ neʼebé iha ulun hitu no dikur sanulu no iha koroa iha ninia ulun ida-idak. 4 Ninia ikun dada fitun sorin balun*+ iha lalehan no soe tun sira ba rai.+ No samea boot neʼe kontinua hamriik iha feto neʼe nia oin,+ feto neʼebé besik ona atu tuur-ahi, atu nuneʼe, kuandu nia tuur-ahi, samea boot neʼe bele tolan ninia oan.

5 Feto neʼe tuur-ahi oan-mane ida+ neʼebé sei sai hanesan bibi-atan no sei ukun nasaun hotu ho ai-tonka besi.+ No kuandu oan neʼe moris, sira lori kedas nia ba Maromak no ba ninia kadunan. 6 No feto neʼe halai ba rai-fuik, iha neʼebá Maromak prepara ona fatin ba nia, no sira sei fó-han nia ba loron 1.260.+

7 Funu mosu iha lalehan: Miguel*+ no ninia anju sira halo funu hasoru samea boot, no samea boot neʼe no ninia anju sira halo funu hasoru sira. 8 Maibé sira la manán,* no la iha ona fatin ba sira iha lalehan. 9 Entaun, samea boot neʼe+ soe tun tiha ba rai. Nia mak samea uluk nian,+ neʼebé hanaran Diabu+ no Satanás,+ neʼebé lohi ema iha mundu tomak.+ Nia soe tun tiha ba rai+ hamutuk ho ninia anju sira. 10 Haʼu rona lian makaʼas ida iha lalehan dehan:

“Agora ita-nia Maromak salva ona ema+ no nia hatudu sai ona ninia kbiit. Ninia Ukun* hahú ona+ no ninia Kristu hahú uza ninia podér, tanba sira soe tun tiha ona ida neʼebé duun ita-nia maun-alin sira loron no kalan iha Maromak nia oin.+ 11 No maun-alin sira-neʼe manán nia+ tanba Bibi-Oan nia raan+ no tanba liafuan neʼebé sira haklaken,+ no sira prontu atu fó sira-nia moris*+ hodi mate. 12 Tanba razaun neʼe, lalehan no imi neʼebé hela iha lalehan, haksolok bá! Maibé, susar ba rai no tasi,+ tanba Diabu tun tiha ona ba imi, no nia hirus makaʼas, tanba nia hatene katak ninia tempu hela uitoan deʼit ona.”+

13 Kuandu samea boot neʼe hatene katak nia soe tun tiha ona ba rai,+ nia fó-terus ba feto+ neʼebé tuur-ahi oan-mane neʼe. 14 Maibé, feto neʼe simu manu-makikit boot nia liras rua,+ atu nuneʼe nia bele semo ba ninia fatin iha rai-fuik, no iha neʼebá mak nia hetan ai-han ba tempu ida, tempu rua no tempu sorin balu*+ hodi dook husi samea nia oin.+

15 Samea neʼe muta sai bee hanesan mota husi ninia ibun hodi suli tuir feto neʼe, atu halo feto neʼe mout iha mota. 16 Maibé rai ajuda feto neʼe, no rai loke ninia ibun no tolan mota neʼebé samea boot neʼe muta sai husi ninia ibun. 17 Tan neʼe, samea boot neʼe sai hirus tebes ba feto neʼe, no bá halo funu hasoru feto neʼe nia bei-oan sira seluk,+ sira neʼebé halo tuir Maromak nia ukun-fuan sira no halo serbisu atu fó sasin kona-ba Jesus.+

13 Nia* hamriik hela iha rai-henek leten iha tasi-ibun.

Tuirmai haʼu haree animál fuik ida+ sai husi tasi laran,+ no nia iha dikur sanulu no ulun hitu, no koroa ida iha dikur ida-idak nia leten, maibé iha ninia ulun sira iha naran neʼebé koʼalia aat Maromak. 2 Animál fuik neʼebé haʼu haree mak hanesan leopardu ida, maibé ninia ain hanesan ursu nia ain, no ninia ibun hanesan leaun nia ibun. No samea boot neʼe+ fó kbiit, kadunan no podér boot ba animál fuik neʼe.+

3 Haʼu haree katak ninia ulun ida iha kanek todan. Maski kanek neʼe bele halo nia mate, maibé sai diʼak fali ona,+ no ema hotu iha rai laʼo tuir animál fuik neʼe hodi gaba nia. 4 Sira adora samea boot neʼe tanba nia fó podér ba animál fuik neʼe, no sira adora animál fuik, hodi dehan: “Sé mak hanesan animál fuik neʼe? No sé mak bele halo funu hasoru nia?” 5 Animál fuik neʼe simu podér* hodi koʼalia ho foti an no kontra buat santu, no nia simu podér atu halo buat neʼebé nia hakarak ba fulan 42.+ 6 Nia loke ninia ibun hodi koʼalia aat+ Maromak, koʼalia aat Maromak nia naran no ninia hela-fatin, no mós koʼalia aat sira neʼebé hela iha lalehan.+ 7 Nia simu lisensa atu halo funu hasoru ema santu* sira no manán sira,+ no nia simu podér atu ukun ema husi suku, povu, língua no nasaun hotu. 8 No ema neʼebé hela iha rai sei adora animál fuik neʼe. Husi tempu neʼebé mundu hahú,* ema hotu neʼe nia naran la hakerek iha Bibi-Oan nia livru* moris nian,+ Bibi-Oan neʼebé ema oho tiha nuʼudar sakrifísiu.+

9 Se ema ida iha tilun, rona bá.+ 10 Se ema ruma tenke tama komarka, nia sei tama duni komarka. Se ema ruma atu oho ho surik,* nia sei mate ho surik.+ Tan neʼe mak ema santu sira+ presiza tahan susar+ no iha fiar.+

11 Tuirmai haʼu haree animál fuik ida seluk sai husi rai. Nia iha dikur rua hanesan bibi-malae oan nia dikur, maibé nia hahú koʼalia hanesan samea boot ida.+ 12 Animál fuik neʼe uza podér tomak husi animál fuik ida primeiru+ no nia halo neʼe iha animál fuik ida primeiru nia oin. Nia halo rai no ema neʼebé hela iha rai adora animál fuik ida primeiru, neʼebé iha kanek todan maibé sai diʼak fali ona.+ 13 Nia hatudu sinál boot sira, no nia mós halo ahi tun husi lalehan ba rai iha ema nia oin.

14 Nia simu lisensa atu halo sinál sira iha animál fuik nia oin, no liuhusi sinál sira-neʼe mak nia lohi ema neʼebé hela iha rai, no iha tempu hanesan, nia dehan ba ema sira neʼebé hela iha rai atu halo estátua+ ba animál fuik neʼebé hetan kanek todan husi surik maibé sai diʼak fali ona.+ 15 No nia simu lisensa atu huu iis* ba animál fuik nia estátua, atu nuneʼe animál fuik nia estátua bele koʼalia no mós bele haruka atu oho ema hotu neʼebé lakohi adora animál fuik neʼe nia estátua.

16 Nia obriga ema hotu, kiʼik no boot, riku no kiak, ema livre no atan, atu simu marka iha sira-nia liman-loos ka iha reen-toos,+ 17 atu nuneʼe ema ida labele sosa ka faʼan só sira neʼebé iha marka deʼit mak bele, marka neʼe mak animál fuik nia naran+ ka númeru ba ninia naran.+ 18 Ema presiza matenek atu hatene buat tuirmai neʼe: Ema neʼebé iha kbiit atu komprende tenke sura animál fuik neʼe nia númeru. Neʼe mak númeru ema nian,* no ninia númeru mak 666.+

14 Tuirmai haʼu hateke no haree Bibi-Oan+ hamriik iha Foho Siaun+ hamutuk ho ema naʼin-144.000,+ no iha sira-nia reen-toos hakerek tiha Bibi-Oan nia naran no ninia Aman nia naran.+ 2 Haʼu rona lian ida sai husi lalehan hanesan lian husi bee barak no mós hanesan rai-tarutu makaʼas. Lian neʼebé haʼu rona mak hanesan lian husi kantadór sira neʼebé kanta hodi akompaña ho sira-nia arpa neʼebé sira toka. 3 Sira kanta knananuk iha kadunan nia oin no iha kriatura moris naʼin-haat+ no katuas sira-nia oin.+ Knananuk neʼe hanesan knananuk foun ida,+ no la iha ema ida mak bele aprende knananuk neʼe só sira naʼin-144.000+ neʼebé sosa tiha ona husi rai mak bele aprende knananuk neʼe. 4 Sira mak ema neʼebé la hafoʼer sira-nia an ho feto sira. Tuir loloos, sira virjen hela.+ Sira kontinua laʼo tuir Bibi-Oan ba fatin naran deʼit neʼebé nia bá.+ Sira mak ema neʼebé sosa ona+ husi ema nia leet nuʼudar ai-fuan primeiru+ ba Maromak no ba Bibi-Oan, 5 no la iha lia-bosok ida sai husi sira-nia ibun, no sira la iha sala ida.+

6 Haʼu haree anju ida seluk semo iha lalehan.* Nia lori liafuan diʼak neʼebé iha ba nafatin atu fó sai ba ema neʼebé hela iha rai, ba nasaun, suku, língua no povu hotu.+ 7 Nia koʼalia ho lian makaʼas, hodi dehan: “Hamtaʼuk Maromak bá no fó glória ba nia, tanba oras toʼo mai ona atu nia tesi-lia.+ Tan neʼe, adora bá Ida neʼebé halo lalehan no rai, tasi+ no bee-matan.”

8 Anju segundu mai tuir nia no dehan: “Nia monu ona! Babilónia Boot+ monu tiha ona.+ Nia mak halo nasaun hotu hemu ninia tua-uvas, neʼe katak ninia hakarak makaʼas atu halo* sala seksuál!”*+

9 Anju terseiru mai tuir sira no dehan ho lian makaʼas: “Se ema ruma adora animál fuik neʼe+ no ninia estátua, no simu marka iha ninia reen-toos ka liman,+ 10 nia mós sei hemu Maromak nia tua-uvas, neʼe katak Maromak nia hirus. Tua-uvas neʼe forte loos no fui ona ba Maromak nia kopu hirus nian,+ no ema neʼe sei hetan kastigu ho ahi no enxofre*+ iha anju santu sira-nia oin no iha Bibi-Oan nia oin. 11 Suar husi ahi neʼebé haterus sira* kontinua saʼe tinan ba tinan ba nafatin,+ no sira-nia kastigu la para loron no kalan, sira mak ema neʼebé adora animál fuik no ninia estátua, no ema neʼebé simu marka ho ninia naran.+ 12 Tan neʼe mak ema santu* sira presiza atu tahan susar,+ santu sira neʼebé halo tuir Maromak nia ukun-fuan sira no kaer metin ba fiar+ kona-ba Jesus.”

13 Haʼu rona lian ida husi lalehan dehan: “Hakerek liafuan sira tuirmai neʼe: Hahú husi ohin ba oin, ema sira neʼebé mate neʼebé ida deʼit ho Naʼi+ sei haksolok. Sin, Maromak nia espíritu dehan, sira tenke deskansa husi sira-nia serbisu, tanba Maromak nunka haluha buat diʼak neʼebé sira halo ona.”*

14 Tuirmai haʼu hateke no haree kalohan mutin ida, no ida neʼebé tuur iha kalohan neʼe nia leten haree hanesan oan-mane husi ema,+ no iha koroa osan-mean iha ninia ulun no nia kaer hela sabit neʼebé kroʼat.

15 Anju ida seluk sai husi fatin sagradu iha templu, no koʼalia ho lian makaʼas ba ida neʼebé tuur iha kalohan leten, hodi dehan: “Lolo Ita-nia sabit no koʼa bá, tanba oras koʼa nian toʼo ona, tanba toʼos iha mundu tomak tasak loos ona.”+ 16 No ida neʼebé tuur iha kalohan leten lolo ninia sabit ba mundu, no nia koʼa rezultadu husi mundu.

17 Anju ida tan sai husi fatin sagradu iha templu neʼebé iha lalehan. Anju neʼe mós kaer hela sabit neʼebé kroʼat.

18 Anju ida seluk tan sai husi altár no nia iha kbiit atu kontrola ahi. No nia bolu ho lian makaʼas ba ida neʼebé kaer hela sabit kroʼat, hodi dehan: “Lolo ó-nia sabit kroʼat no halibur uvas-fuan husi uvas-hun iha mundu, tanba uvas-fuan sira-neʼe tasak ona.”+ 19 Anju neʼe lolo ninia sabit ba mundu no halibur uvas-hun iha mundu, no soe tiha ba fatin sama uvas nian neʼebé boot, neʼe reprezenta Maromak nia hirus.+ 20 Kuda sira sama uvas-fuan iha sidade nia liʼur, no raan neʼebé sai husi fatin neʼe aas toʼo kuda-freun no suli toʼo maizumenus kilómetru 300.*

15 Haʼu haree sinál ida tan iha lalehan, sinál neʼebé boot no furak, neʼe mak kona-ba anju hitu+ neʼebé kaer hela susar hitu. Susar sira-neʼe mak susar ikusliu, tanba liuhusi susar sira-neʼe mak Maromak nia hirus sei remata.+

2 Haʼu haree buat ida neʼebé hanesan tasi vidru+ neʼebé kahur ho ahi, no haʼu mós haree ema sira neʼebé manán ona+ animál fuik no ninia estátua+ no númeru husi ninia naran.+ Ema sira-neʼe hamriik besik tasi neʼebé hanesan vidru hodi kaer hela arpa sira husi Maromak. 3 Sira kanta Maromak nia atan Moisés nia knananuk,+ no mós Bibi-Oan nia knananuk,+ hodi dehan:

“Maromak Jeová,* Ida neʼebé Kbiit Boot Liu Hotu,+ Ita-nia hahalok sira mak boot no furak.+ Liurai rohan-laek,*+ Ita-nia dalan sira mak iha justisa no loos.+ 4 Jeová,* sé mak sei la hamtaʼuk Ita no fó hahiʼi ba Ita-nia naran?+ Tanba Ita deʼit mak laran-metin. Nasaun hotu sei mai hodi adora iha Ita-nia oin,+ tanba sira haree ona Ita-nia desizaun sira* neʼebé tuir justisa.”

5 Liutiha buat sira-neʼe, haʼu haree fatin sagradu husi tenda santu*+ loke tiha iha lalehan,+ 6 no anju hitu neʼebé kaer hela susar hitu+ sai husi fatin sagradu neʼe, sira-nia roupa moos no nabilan, no sintu osan-mean kesi iha sira-nia hirus-matan. 7 Kriatura moris naʼin-haat neʼe ida fó ba anju hitu neʼe manko osan-mean hitu neʼebé nakonu ho Maromak nia hirus,+ Maromak neʼebé moris tinan ba tinan ba nafatin. 8 Fatin sagradu neʼe sai nakonu ho suar tanba Maromak nia glória+ no tanba ninia kbiit, no la iha ema ida mak bele tama ba fatin sagradu neʼe toʼo susar hitu+ husi anju hitu neʼe remata ona.

16 Haʼu rona lian makaʼas ida sai husi fatin sagradu+ neʼe hodi dehan ba anju hitu: “Bá, fakar Maromak nia hirus neʼebé iha manko hitu neʼe nia laran ba rai.”+

2 Anju primeiru bá no fakar buat neʼebé iha ninia manko laran ba rai.+ No ema sira neʼebé iha animál fuik nia marka+ no adora ninia estátua,+ sira hetan kanek dodok.+

3 Anju segundu fakar buat neʼebé iha ninia manko laran ba tasi.+ No tasi sai hanesan raan+ husi ema mate, no kriatura moris* hotu mate, sin, buat hotu neʼebé iha tasi laran mate.+

4 Anju terseiru fakar buat neʼebé iha ninia manko laran ba mota no bee-matan.+ No buat sira-neʼe sai raan.+ 5 Haʼu rona anju neʼebé iha kbiit atu kontrola bee dehan: “Ita-Boot, Ida neʼebé iha agora no iha uluk,+ Ida neʼebé laran-metin,+ Ita iha hahalok loos, tanba Ita fó sai ona desizaun sira-neʼe.+ 6 Sira fakar ona ema santu* sira no profeta sira-nia raan,+ tan neʼe Ita fó ona raan ba sira atu hemu.+ Sira merese ida-neʼe.”+ 7 Haʼu rona altár dehan: “Sin, Maromak Jeová,* Ida neʼebé Kbiit Boot Liu Hotu,+ Ita-nia desizaun sira* mak loos no tuir justisa.”+

8 Anju númeru haat fakar buat neʼebé iha ninia manko laran ba loro-matan,+ no loro-matan simu lisensa atu sunu ema ho ahi. 9 Ahi neʼe sunu ema ho ninia manas neʼebé makaʼas, maibé sira koʼalia aat Maromak nia naran, Maromak neʼebé iha podér atu kontrola susar sira-neʼe, no sira la arrepende an no la fó glória ba nia.

10 Anju númeru lima fakar buat neʼebé iha ninia manko laran ba animál fuik nia kadunan. Animál fuik neʼe nia ukun sai nakukun,+ no sira hahú tata sira-nia nanál tanba sira sente moras, 11 maibé sira koʼalia aat Maromak iha lalehan tanba sira-nia moras no sira-nia kanek dodok, no sira la arrepende an husi sira-nia hahalok.

12 Anju númeru neen fakar sai buat neʼebé iha ninia manko laran ba mota boot Eufrates,+ no bee iha mota neʼe sai maran,+ atu nuneʼe bele prepara dalan ba liurai sira+ neʼebé mai husi parte leste.*

13 Tuirmai haʼu haree samea boot,+ animál fuik no profeta falsu, no sira ida-idak hasai liafuan foʼer* husi sira-nia ibun. Liafuan foʼer tolu neʼe haree hanesan manduku. 14 Tuir loloos, liafuan sira-neʼe mai husi anju aat no liafuan sira-neʼe hamosu sinál sira.+ Sira halibur hamutuk liurai sira iha mundu tomak, atu bá funu+ iha Maromak neʼebé Kbiit Boot Liu Hotu nia loron boot.+

15 “Haree bá! Haʼu sei mai hanesan naʼok-teen ida.+ Ksolok ba ema neʼebé matan-moris hela+ no hatais hela roupa, atu nuneʼe ema sei la haree nia laʼo ho isin-tanan no nia sai moe.”+

16 Sira halibur liurai sira hamutuk iha fatin ida neʼebé iha lian Ebraiku hanaran Armagedon.*+

17 Anju númeru hitu fakar buat neʼebé iha ninia manko laran ba anin. Ho ida-neʼe, lian makaʼas ida sai husi kadunan iha fatin sagradu,+ hodi dehan: “Neʼe remata ona!” 18 No iha rai-lakan, lian oioin no rai-tarutu, no iha mós rai-nakdoko makaʼas, no rai-nakdoko neʼe la hanesan rai-nakdoko sira neʼebé mosu ona husi tempu neʼebé ema hela iha rai,+ rai-nakdoko neʼe kona fatin barak no makaʼas loos. 19 Sidade boot neʼe+ fahe ba parte tolu, no sidade sira iha nasaun hotu monu tiha. Tuirmai Maromak hanoin-hetan Babilónia Boot,+ no fó kopu tua-uvas husi Maromak nia hirus no laran-nakali ba nia.+ 20 No mós, illa hotu halai tiha, no foho sira lakon ona.+ 21 Tuirmai udan jelu-fatuk boot monu tun husi lalehan ba ema nia leten,+ jelu-fatuk sira-neʼe ida-idak todan maizumenus kilograma 20,* no ema koʼalia aat Maromak tanba susar husi jelu-fatuk neʼe,+ tanba susar neʼe boot tebetebes.

17 Anju ida husi anju hitu neʼebé kaer manko hitu+ mai no dehan ba haʼu: “Mai, haʼu sei hatudu ba ó kastigu ba feto-aat* neʼebé naran-boot, feto neʼe tuur iha bee barak nia leten,+ 2 feto neʼe halo sala seksuál* ho liurai sira iha mundu,+ no ema sira iha rai sai lanu ho tua-uvas husi ninia sala seksuál.”*+

3 Nia lori haʼu ba rai-fuik ho kbiit husi Maromak nia espíritu. Tuirmai haʼu haree feto ida tuur hela iha animál fuik nia leten, animál fuik neʼe kór-mean no nakonu ho naran sira neʼebé koʼalia aat Maromak. Animál neʼe iha ulun hitu no dikur sanulu. 4 Feto neʼe hatais hena kór-violeta+ no mean, no nia hafurak ninia an ho osan-mean, fatuk-murak neʼebé folin-boot no pérola,+ no nia kaer hela kopu osan-mean neʼebé nakonu ho buat sira neʼebé ema hakribi no mós ho buat foʼer oioin husi ninia hahalok sala seksuál.* 5 Iha ninia reen-toos hakerek tiha naran ida neʼebé segredu: “Babilónia Boot, inan ba feto-aat sira+ no ba buat foʼer hotu iha rai.”+ 6 Haʼu haree katak feto neʼe lanu ho ema santu* sira-nia raan no ho raan husi Jesus nia testemuña sira.+

Kuandu haʼu haree nia, haʼu hakfodak tebetebes. 7 Tan neʼe anju neʼe dehan ba haʼu: “Tanbasá ó hakfodak? Haʼu sei fó-hatene ba ó segredu kona-ba feto neʼe+ no kona-ba animál fuik neʼebé iha ulun hitu no dikur sanulu, ida neʼebé lori daudaun feto neʼe:+ 8 Animál fuik neʼebé ó haree ona, uluk nia iha, maibé agora la iha ona, nia besik atu sai husi rai-kuak neʼebé kleʼan tebes,*+ tuirmai nia sei lakon mohu tiha. No ema iha rai, neʼe katak sira neʼebé naran la hakerek iha livru moris nian+ husi tempu neʼebé mundu hahú,* sira sei hakfodak bainhira sira haree oinsá animál fuik neʼe iha uluk, maibé agora la iha ona, no sei mosu fali.

9 “Ema presiza iha neon neʼebé matenek atu komprende ida-neʼe: Ulun hitu+ reprezenta foho hitu, foho sira neʼebé feto neʼe tuur iha leten. 10 No iha liurai naʼin-hitu: Naʼin-lima monu tiha ona, ida agora iha daudaun, ida tan seidauk mosu, maibé kuandu nia mosu mai nia tenke hela ba tempu uitoan deʼit. 11 Kona-ba animál fuik neʼebé iha uluk, maibé agora la iha ona,+ nia mak liurai númeru ualu. Maibé nia mosu husi liurai naʼin-hitu neʼe, no nia sei lakon mohu.

12 “Dikur sanulu neʼebé ó haree reprezenta liurai naʼin-sanulu, no sira seidauk simu sira-nia ukun, maibé sira simu podér nuʼudar liurai ba oras ida hamutuk ho animál fuik neʼe. 13 Sira iha hanoin* ida deʼit, tan neʼe sira fó sira-nia kbiit no podér ba animál fuik neʼe. 14 Sira sei halo funu hasoru Bibi-Oan,+ maibé tanba nia mak Naʼi ba naʼi sira no Liurai ba liurai sira,+ Bibi-Oan sei manán sira.+ No mós ema sira neʼebé hamutuk ho Bibi-Oan, neʼebé Maromak bolu no hili ona no laran-metin ona, sira sei manán.”+

15 Nia dehan ba haʼu: “Kona-ba bee neʼebé ó haree, neʼebé feto-aat neʼe tuur iha leten, reprezenta povu sira, ema-lubun sira, nasaun sira no ema husi língua oioin.+ 16 Kona-ba dikur sanulu+ neʼebé ó haree no mós animál fuik neʼe,+ sira sei odi feto-aat neʼe+ no sei halakon nia no halo nia isin-tanan, no sei han ninia isin no sunu hotu nia iha ahi.+ 17 Tanba Maromak tau ninia hanoin iha sira-nia laran atu kumpre Maromak nia hakarak,+ sin, atu kumpre sira-nia hanoin* neʼebé ida deʼit, hodi fó sira-nia ukun ba animál fuik neʼe+ toʼo Maromak nia liafuan kumpre ona. 18 No feto+ neʼebé ó haree reprezenta sidade boot neʼebé ukun liurai sira iha mundu.”

18 Depois neʼe, haʼu haree anju seluk tun daudaun husi lalehan ho podér boot, no rai hetan naroman tanba ninia glória. 2 Nia hakilar ho lian makaʼas, dehan: “Nia monu ona! Babilónia Boot monu tiha ona!+ Nia sai ona hela-fatin ba anju aat sira no ba espíritu* foʼer hotu no manu hotu neʼebé la moos no ema odi!+ 3 Tanba nasaun sira hotu sai ona vítima ba ninia tua-uvas,+ neʼe katak ninia hakarak makaʼas atu halo sala seksuál,* no liurai sira iha mundu halo sala seksuál ho nia,+ no negósiu-naʼin sira* iha mundu sai riku tanba ninia rikusoin neʼebé nia halibur ona la ho moe.”

4 Tuirmai haʼu rona lian ida seluk husi lalehan dehan: “Haʼu-nia povu, sai husi nia,+ atu nuneʼe imi labele hola parte iha ninia sala sira, no labele hola parte iha ninia kastigu sira.+ 5 Ninia sala sira sai barak tebes toʼo lalehan+ no Maromak sei tesi-lia ba nia tanba ninia hahalok neʼebé la iha justisa.*+ 6 Selu fali ba nia tuir dalan neʼebé nia halo ba ema seluk,+ sin, selu ba nia dala rua liu fali buat neʼebé nia halo ona.+ Iha kopu+ neʼebé nia kahur hemu atu fó ba ema seluk, kahur mós hemu dala rua barak liu fali ninian atu fó ba nia.+ 7 Hanesan nia fó glória ba ninia an rasik no halibur ona rikusoin hodi la moe, entaun fó mós terus makaʼas no triste ba nia. Tanba nia kontinua hanoin iha ninia laran dehan: ‘Haʼu mak liurai-feto, haʼu laʼós feto-faluk, no haʼu sei nunka tanis.’+ 8 Tan neʼe mak ninia susar hotu sei kona nia iha loron ida deʼit, neʼe katak mate, tanis, hamlaha boot, no ahi sei han hotu nia,+ tanba Maromak Jeová* neʼebé tesi-lia ba nia, mak iha forsa.+

9 “Liurai sira iha mundu neʼebé halo sala seksuál* ho nia no moris hamutuk ho nia hodi goza ninia rikusoin neʼebé nia halibur ona la ho moe, sei tanis no baku sira-nia an ho triste ba nia bainhira sira haree suar husi ahi neʼebé han nia. 10 Sira sei hamriik dook deʼit tanba taʼuk ninia terus no dehan: ‘Kuitadu, kuitadu ba ó, sidade boot+ Babilónia, sidade neʼebé forte, tanba iha oras ida nia laran ó-nia kastigu toʼo ona ba ó!’

11 “Negósiu-naʼin sira iha mundu mós sai triste no tanis ba nia, tanba la iha ona ema atu sosa sira-nia sasán neʼebé barak: 12 sira-nia osan-mean, osan-mutin, fatuk-murak, pérola, hena-liñu neʼebé diʼak, hena kór-violeta no mean no hena-seda; no buat hotu neʼebé halo husi ai-morin, marfín, ai folin-boot, riti, besi no fatuk-mármore; 13 no mós ai-kanela, temperus husi rai-Índia, insensu, mina-morin, olíbanu, tua-uvas, mina-oliveira, trigu uut neʼebé diʼak, karau, bibi-malae, kuda, kuda-karreta, atan no ema. 14 Sin, ai-fuan tasak neʼebé ó gosta la iha ona, no hahán diʼak hotu no sasán furak oioin lakon ona husi ó, no ó sei nunka hetan fali.

15 “Negósiu-naʼin sira neʼebé faʼan buat sira-neʼe, neʼebé sai riku tanba nia, sei hamriik dook deʼit tanba taʼuk ninia terus, no sira sei triste no tanis, 16 hodi dehan: ‘Kuitadu, kuitadu, sidade boot neʼe, neʼebé hatais hena-liñu neʼebé diʼak, hena kór-violeta no mean, no hafurak an ho osan-mean, fatuk-murak no pérola,+ 17 tanba iha oras ida nia laran rikusoin barak sira-neʼe lakon hotu!’

“Kapitaun ró nian hotu, ema hotu neʼebé saʼe ró, ema neʼebé serbisu iha ró no sira hotu neʼebé buka moris iha tasi, sira hamriik dook deʼit 18 no bainhira sira hateke ba ahi-suar husi sidade neʼe, sira hakilar, hodi dehan: ‘Sidade ida-neʼebé mak hanesan sidade boot neʼe?’ 19 Sira soe rai-rahun ba sira-nia ulun no hakilar, halerik no tanis, hodi dehan: ‘Kuitadu, kuitadu, sidade boot neʼe, neʼebé halo ró-naʼin hotu neʼebé iha ró iha tasi laran sai riku tanba ninia rikusoin, tanba iha oras ida nia laran nia rahun ona!’+

20 “Oh lalehan+ no mós imi ema santu* sira,+ apóstolu sira no profeta sira, haksolok bá tanba buat neʼebé akontese ba nia. Maromak tesi-lia ona ba nia tanba hanoin imi!”+

21 Tuirmai anju forte ida hiʼit saʼe fatuk ida neʼebé hanesan fatuk boot dulas trigu nian no soe tiha ida-neʼe ba tasi, hodi dehan: “Iha dalan hanesan neʼe mak sidade boot Babilónia sei soe tun tiha ho lalais, no ema sei nunka hetan fali nia.+ 22 No ema sei la rona tan lian husi kantadór neʼebé akompaña ho arpa, no sei la iha tan lian husi ema neʼebé huu flauta no trombeta, ka lian husi múzika seluk iha ó, Babilónia. No sei la iha tan badaen ida neʼebé sei serbisu iha ó, no la iha tan lian husi fatuk dulas trigu nian. 23 Ahi-oan nia nabilan sei la fó naroman tan iha ó, no sei la iha tan lian husi noivu no noiva iha ó. Tanba ó-nia negósiu-naʼin sira mak ema-boot iha mundu, no ó lohi nasaun hotu liuhusi ó-nia hahalok espiritizmu.*+ 24 Sin, iha sidade neʼe iha profeta sira-nia raan, ema santu sira-nia raan+ no mós raan husi sira hotu neʼebé ema oho tiha iha mundu.”+

19 Depois neʼe, haʼu rona lian makaʼas ida hanesan husi ema-lubun boot iha lalehan. Sira dehan: “Fó hahiʼi ba Jah!*+ Ita-nia Maromak mak fó salvasaun no nia iha glória no kbiit, 2 tanba ninia desizaun mak loos no tuir justisa.+ Tanba nia tesi-lia ona ba feto-aat* neʼebé naran-boot, neʼebé hafoʼer mundu tomak ho ninia hahalok sala seksuál,* no Maromak selu fali ona ninia atan sira-nia raan neʼebé iha feto neʼe nia liman.”*+ 3 Tuirmai sira koʼalia kedas ba dala segundu: “Fó hahiʼi ba Jah!*+ No suar kontinua saʼe husi sidade neʼe tinan ba tinan ba nafatin.”+

4 Katuas naʼin-24+ no kriatura moris naʼin-haat+ hakneʼak no hakruʼuk hodi adora Maromak neʼebé tuur iha kadunan no dehan: “Amen! Fó hahiʼi ba Jah!”*+

5 No mós, lian ida sai husi kadunan no dehan: “Fó hahiʼi ba ita-nia Maromak, imi hotu neʼebé mak ninia atan,+ neʼebé hamtaʼuk nia, imi neʼebé kiʼik no boot.”+

6 Haʼu rona lian ida hanesan husi ema-lubun boot no hanesan lian husi bee barak no husi rai-tarutu makaʼas. Sira dehan: “Fó hahiʼi ba Jah,*+ tanba ita-nia Maromak Jeová,* Ida neʼebé Kbiit Boot Liu Hotu,+ hahú ukun ona nuʼudar liurai!+ 7 Mai ita haksolok boot no fó glória ba nia, tanba tempu toʼo ona ba Bibi-Oan nia kazamentu no ninia feen prepara an ona. 8 Sin, ninia feen hetan ona lisensa atu hatais hena-liñu neʼebé nabilan, moos no diʼak. Tanba hena-liñu diʼak neʼe reprezenta ema santu sira-nia hahalok loos.”+

9 Nia fó-hatene mai haʼu: “Hakerek ida-neʼe bá: Ksolok ba sira neʼebé hetan konvite ba Bibi-Oan nia festa kazamentu.”*+ No mós, nia dehan tan ba haʼu: “Liafuan sira-neʼe mak liafuan neʼebé loos husi Maromak.” 10 Ho ida-neʼe, haʼu hakneʼak iha ninia oin hodi adora nia. Maibé nia dehan ba haʼu: “Kuidadu bá! Keta halo ida-neʼe!+ Haʼu mak atan deʼit hanesan ó no ó-nia maun-alin sira neʼebé halaʼo serbisu atu fó sasin kona-ba Jesus.+ Adora Maromak bá!+ Tanba profesia mak fó sasin kona-ba Jesus.”+

11 Haʼu haree lalehan nakloke, no iha kuda mutin ida mosu mai.+ Ida neʼebé saʼe kuda neʼe iha naran Laran-Metin+ no Lia-Loos,+ no nia tesi-lia no halo funu tuir justisa.+ 12 Ninia matan hanesan ahi neʼebé lakan,+ no iha koroa barak iha ninia ulun. Naran ida hakerek tiha iha nia, no ema ida la hatene naran neʼe, só nia deʼit mak hatene. 13 Nia hatais roupa neʼebé iha noda tanba* raan, no ninia naran mak Maromak nia Liafuan.+ 14 No mós, tropa lalehan nian saʼe kuda mutin hodi tuir nia. Sira hatais hena-liñu neʼebé mutin, moos no diʼak. 15 Surik naruk ida neʼebé kroʼat sai husi ninia ibun,+ atu nuneʼe nia bele oho nasaun sira ho surik neʼe, no nia sei ukun sira* ho ai-tonka besi.+ Nia mós sei sama fatin sama uvas nian, neʼe reprezenta Maromak neʼebé Kbiit Boot Liu Hotu nia laran-nakali no hirus.+ 16 Iha ninia roupa, iha parte kelen, hakerek tiha naran ida, Liurai ba liurai sira no Naʼi ba naʼi sira.+

17 Haʼu mós haree anju ida hamriik iha loro-matan, nia hakilar ho lian makaʼas no dehan ba manu sira hotu neʼebé semo iha lalehan:* “Mai iha neʼe, halibur hamutuk bá iha Maromak nia festa boot,+ 18 atu nuneʼe imi bele han liurai sira-nia isin, komandante tropa sira-nia isin, no ema forte sira-nia isin,+ kuda sira-nia isin no mós ema sira neʼebé saʼe kuda,+ ema hotu nia isin, ema livre no atan, ema kiʼik no boot.”

19 Haʼu haree animál fuik no liurai sira iha rai no mós sira-nia tropa halibur hamutuk atu halo funu hasoru ida neʼebé saʼe kuda no ninia tropa sira.+ 20 Ida neʼebé saʼe kuda kaer tiha animál fuik no profeta falsu+ neʼebé halo sinál iha animál fuik nia oin. Liuhusi sinál sira-neʼe mak profeta falsu lohi ema sira neʼebé simu animál fuik nia marka+ no sira neʼebé adora ninia estátua.+ No ida neʼebé saʼe kuda soe moris deʼit animál fuik no profeta falsu ba tasi neʼebé ahi lakan makaʼas ho enxofre.*+ 21 Maibé, ida neʼebé saʼe kuda neʼe oho sira seluk ho surik naruk neʼebé sai husi ninia ibun.+ No manu sira hotu sai bosu ho sira-nia isin.+

20 Tuirmai haʼu haree anju ida tun daudaun husi lalehan no nia kaer hela xave ba rai-kuak neʼebé kleʼan tebes*+ no mós kaer hela korrente boot ida. 2 Nia kaer tiha samea boot neʼe,+ samea uluk nian,+ neʼe mak Diabu+ no Satanás,+ no kesi samea neʼe ba tinan 1.000. 3 Nia soe samea neʼe ba rai-kuak neʼebé kleʼan tebes,*+ no taka no xave metin tiha,* atu nuneʼe samea neʼe labele lohi tan nasaun sira toʼo tinan 1.000 remata. Depois neʼe, nia sei sai livre ba tempu uitoan.+

4 Tuirmai haʼu haree kadunan sira, no sira neʼebé tuur iha kadunan sira-neʼe simu podér atu tesi-lia. Sin, haʼu haree raan* husi sira neʼebé ema oho* tanba sira fó sasin kona-ba Jesus no tanba koʼalia kona-ba Maromak. Sira la adora animál fuik ka ninia estátua no sira la simu marka iha sira-nia reen-toos no liman.+ Sira moris fali no ukun nuʼudar liurai hamutuk ho Kristu+ ba tinan 1.000. 5 Neʼe mak moris-hiʼas primeiru.+ Maibé ema mate sira seluk+ sei la hetan moris toʼo tinan 1.000 remata ona. 6 Ema sira neʼebé simu moris-hiʼas primeiru mak santu no haksolok.+ Mate segundu+ la iha kbiit atu ukun sira,+ no sira sei sai nuʼudar amlulik+ ba Maromak no Kristu, no sei ukun nuʼudar liurai hamutuk ho nia ba tinan 1.000.+

7 Bainhira tinan 1.000 foin remata, Satanás sei livre husi dadur, 8 no nia sei bá rai nia lidun haat hodi lohi nasaun sira, neʼe katak Gog no Magog, atu halibur sira hamutuk ba funu ida. Sira-nia númeru mak hanesan rai-henek iha tasi. 9 Sira sei bá mundu tomak no haleʼu ema santu* sira-nia hela-fatin* no haleʼu sidade neʼebé Maromak hadomi. Maibé, ahi sei tun husi lalehan no han sira.+ 10 Kona-ba Diabu neʼebé lohi ema sira-neʼe, sei soe tiha ba tasi neʼebé iha ahi-lakan no enxofre,* no animál fuik+ no profeta falsu iha ona neʼebá;+ no loron-kalan sira sei hetan terus* tinan ba tinan ba nafatin.

11 Tuirmai haʼu haree kadunan mutin ida neʼebé boot no haree Ida neʼebé tuur iha kadunan neʼe.+ Rai no lalehan halai tiha husi ninia oin,+ no la iha ona fatin ba sira. 12 Depois neʼe, haʼu haree ema sira neʼebé mate ona, kiʼik no boot, sira hamriik iha kadunan nia oin, no livru sira loke tiha. Maibé, iha mós livru ida seluk neʼebé loke tiha; neʼe mak livru moris nian.+ Liuhusi buat sira neʼebé hakerek iha livru sira-neʼe mak ema mate sira sei hetan tesi-lia tuir sira-nia hahalok.+ 13 Tasi entrega ema mate sira neʼebé iha laran, no mate no rate* entrega ema mate sira neʼebé iha laran, no ema ida-idak hetan tesi-lia tuir sira-nia hahalok.+ 14 Mate no rate* soe tiha ba tasi neʼebé iha ahi-lakan.+ Tasi neʼebé iha ahi-lakan+ reprezenta mate segundu.+ 15 Liután neʼe, ema sira neʼebé naran la hakerek iha livru moris nian+ sei soe tiha ba tasi neʼebé iha ahi-lakan.+

21 Tuirmai haʼu haree lalehan foun no rai foun.+ Lalehan uluk nian no rai uluk nian lakon tiha ona,+ no tasi+ la iha tan. 2 Haʼu mós haree sidade santu, Jeruzalein Foun tun mai daudaun husi lalehan, husi Maromak.+ Sidade neʼe hanesan noiva neʼebé hatais prontu ona atu simu ninia laʼen.+ 3 No haʼu rona lian makaʼas ida husi kadunan dehan: “Maromak nia tenda hamutuk ho ema, no nia sei hela hamutuk ho sira, no sira sei sai ninia povu. Maromak rasik sei hamutuk ho sira.+ 4 Nia sei hamaran sira-nia matan-been hotu husi sira-nia matan,+ mate sei la iha tan,+ no ema sei la triste tan ka tanis ka sente moras.+ Buat sira neʼebé uluk nian lakon tiha ona.”

5 Tuirmai Ida neʼebé tuur iha kadunan+ dehan: “Haree bá! Haʼu halo buat hotu sai foun.”+ Nia mós dehan: “Hakerek liafuan sira-neʼe bá, tanba liafuan sira-neʼe mak loos no ema bele tau fiar.”* 6 No nia dehan ba haʼu: “Liafuan sira-neʼe sai loos ona! Haʼu mak Alfa no Ómega,* ida neʼebé primeiru no ida neʼebé ikus.+ Ba ema neʼebé hamrook, haʼu sei fó bee ba nia husi bee-matan neʼebé iha bee moris nian no la presiza selu.+ 7 Ema neʼebé manán sei simu buat sira-neʼe nuʼudar liman-rohan, no haʼu sei sai ninia Maromak no nia sei sai haʼu-nia oan. 8 Maibé kona-ba ema taʼuk-teen, ema neʼebé la iha fiar,+ ema neʼebé la moos no halo hahalok foʼer, ohodór,+ ema neʼebé halo sala seksuál,*+ halo espiritizmu,* adora estátua,* no bosok-teen hotu,+ sira-nia rohan mak tama iha tasi neʼebé iha ahi-lakan no enxofre.*+ Neʼe reprezenta mate segundu.”+

9 Anju ida husi anju hitu neʼebé kaer manko hitu neʼebé nakonu ho susar hitu ikusliu,+ mai no dehan ba haʼu: “Mai, no haʼu sei hatudu ba ó noiva neʼebé sei sai Bibi-Oan nia feen.”+ 10 Nia lori haʼu ba foho boot no aas tebes ho kbiit husi Maromak nia espíritu, no nia hatudu ba haʼu sidade santu Jeruzalein neʼebé tun mai daudaun husi lalehan, husi Maromak+ 11 no ho glória husi Maromak.+ Sidade neʼe nabilan hanesan fatuk folin-boot, no hanesan fatuk-jaspe neʼebé nabilan hanesan fatuk-kristál neʼebé moos.+ 12 Sidade neʼe iha moru neʼebé boot no aas tebes, no iha mós portaun 12, no iha portaun ida-idak iha anju ida, no iha portaun nia leten hakerek tiha Izraél* nia suku 12 nia naran. 13 Portaun tolu iha parte leste, portaun tolu iha parte norte, portaun tolu iha parte súl, no portaun tolu tan iha parte oeste.+ 14 Moru neʼebé haleʼu sidade neʼe harii iha fatuk fundasaun 12 nia leten, no iha fatuk sira-neʼe hakerek tiha Bibi-Oan nia apóstolu naʼin-12 nia naran.+

15 Ida neʼebé koʼalia ho haʼu kaer hela ai-loos* osan-mean ida hodi sukat, atu nuneʼe nia bele sukat sidade neʼe, ninia portaun sira no ninia moru.+ 16 Sidade neʼe kuadradu, no ninia luan ho naruk hanesan deʼit. Nia sukat sidade ho ai-loos neʼe, no sidade neʼe nia naruk, luan no aas mak maizumenus kilómetru 2.220.* Sira-nia medida hanesan deʼit. 17 Nia mós sukat sidade neʼe nia moru, no moru neʼe nia aas maizumenus metru 64,* hodi tuir sukat ema nian no mós anju nian. 18 Sidade neʼe nia moru harii ho fatuk-jaspe,+ no sidade neʼe halo husi osan-mean neʼebé moos no nabilan hanesan vidru neʼebé moos. 19 Fundasaun ba moru neʼebé haleʼu sidade neʼe hafurak ho fatuk folin-boot oioin: fatuk primeiru iha fundasaun neʼe mak fatuk-jaspe, segundu fatuk-safira, no terseiru fatuk-kalsedónia, no haat fatuk-ezmeralda, 20 lima fatuk-sardónika, neen fatuk-sárdiu, hitu fatuk-krizólitu, ualu fatuk-berilu, sia fatuk-topáziu, sanulu fatuk-krisóprasu, sanulu-resin-ida fatuk-jasintu, sanulu-resin-rua fatuk-ametista. 21 No mós, portaun 12 halo husi pérola 12. Portaun ida-idak halo husi pérola ida. No dalan boot iha sidade neʼe halo husi osan-mean neʼebé moos, hanesan vidru neʼebé moos.

22 Haʼu la haree templu ida iha sidade neʼe nia laran, tanba Maromak Jeová,* Ida neʼebé Kbiit Boot Liu Hotu,+ no mós Bibi-Oan mak sidade neʼe nia templu. 23 Sidade neʼe la presiza loro-matan no fulan atu fó naroman, tanba Maromak nia glória mak fó naroman ba sidade neʼe,+ no Bibi-Oan mak sidade neʼe nia ahi-oan.+ 24 Nasaun sira sei laʼo iha ninia naroman,+ no liurai sira iha mundu sei lori sira-nia glória ba sidade neʼe. 25 Sidade neʼe nia portaun sei nunka taka iha loron, no iha neʼebá sei nunka iha kalan.+ 26 Sira sei lori nasaun sira-nia glória no respeitu ba sidade neʼe.+ 27 Maibé buat neʼebé foʼer no ema neʼebé halo hahalok la moos no lohidór sei la tama ba sidade neʼe.+ Só ema sira neʼebé naran hakerek ona iha Bibi-Oan nia livru moris nian mak sei tama.+

22 Tuirmai anju neʼe hatudu ba haʼu mota neʼebé iha bee moris nian+ neʼebé moos loos hanesan fatuk-kristál, no mota neʼe suli sai husi Maromak no Bibi-Oan nia kadunan+ 2 no mota neʼe suli liuhusi dalan boot nia klaran iha sidade neʼe. Mota neʼe nia sorin-sorin iha ai-hun moris nian neʼebé fó fuan dala 12 tinan-tinan, neʼe katak fó fuan fulan-fulan. No ai-hun sira-neʼe nia tahan mak ai-moruk hodi kura nasaun sira.+

3 Sidade neʼe sei la hetan tan malisan. Maibé Maromak no Bibi-Oan nia kadunan+ sei iha sidade neʼe, no ninia atan sira sei halo serbisu sagradu ba nia. 4 Sira sei haree ninia oin,+ no ninia naran sei hakerek iha sira-nia reen-toos.+ 5 No mós, kalan sei la iha tan,+ no sira la presiza tan ahi-oan ka loro-matan nia naroman, tanba Maromak Jeová* sei fó naroman ba sira,+ no sira sei ukun nuʼudar liurai tinan ba tinan ba nafatin.+

6 Nia dehan ba haʼu: “Liafuan sira-neʼe mak loos duni no ema bele tau fiar;*+ sin, Jeová,* Maromak neʼebé koʼalia liuhusi ninia profeta sira,+ haruka ninia anju atu hatudu sai ba ninia atan sira kona-ba buat neʼebé lakleur tan tenke akontese. 7 Haʼu sei mai lalais.+ Ksolok ba ema neʼebé halo tuir liafuan profesia nian iha livru* neʼe.”+

8 Haʼu, João, haʼu mak rona no haree buat sira-neʼe. Bainhira haʼu rona no haree ona, haʼu hakneʼak iha anju neʼe nia ain hodi adora nia. Nia mak anju neʼebé hatudu sai buat sira-neʼe ba haʼu. 9 Maibé nia dehan ba haʼu: “Kuidadu bá! Keta halo ida-neʼe! Haʼu mak atan deʼit hanesan ó no ó-nia maun-alin sira neʼebé nuʼudar profeta no mós hanesan sira neʼebé halo tuir liafuan iha livru neʼe. Adora Maromak bá.”+

10 Nia mós dehan ba haʼu: “Keta tau selus* hodi taka metin liafuan profesia nian neʼebé hakerek iha livru neʼe, tanba tempu neʼebé deside tiha besik ona. 11 Ema neʼebé halo hahalok aat kontinua halo hahalok aat bá. Ema neʼebé halo hahalok foʼer kontinua halo hahalok foʼer bá. Maibé ema neʼebé halo hahalok loos kontinua halo hahalok loos bá, no ema neʼebé santu kontinua santu bá.

12 “‘Haree bá! Haʼu sei mai lalais, no haʼu mós lori kolen hamutuk ho haʼu, hodi selu fali ema ida-idak tuir sira-nia hahalok.+ 13 Haʼu mak Alfa no Ómega,*+ ida neʼebé primeiru no ida neʼebé ikus, ida neʼebé hun no ida neʼebé rohan. 14 Ksolok ba sira neʼebé fase moos ona sira-nia roupa,+ atu nuneʼe sira bele iha direitu atu han husi ai-hun moris nian+ no atu bele tama ba sidade neʼe liuhusi ninia portaun sira.+ 15 Iha sidade neʼe nia liʼur iha asu* sira, iha ema neʼebé halo espiritizmu,* ema neʼebé halo sala seksuál,* ohodór, ema neʼebé adora estátua* no mós ema hotu neʼebé hadomi lia-bosok no iha toman atu bosok.’+

16 “‘Haʼu, Jesus, haʼu haruka haʼu-nia anju atu fó sasin ba imi kona-ba buat sira-neʼe ba kongregasaun sira. Haʼu mak David nia abut no bei-oan,+ no haʼu mak fitun dadeer nian neʼebé nabilan.’”+

17 Maromak nia espíritu no noiva+ kontinua dehan: “Mai!” no ema hotu neʼebé rona tenke dehan: “Mai!” no ema hotu neʼebé hamrook tenke mai.+ Ema hotu neʼebé hakarak bele foti bee moris nian no la presiza selu.+

18 “Haʼu fó sasin ba ema hotu neʼebé rona liafuan profesia nian iha livru neʼe: Se ema ida aumenta tan liafuan ruma ba liafuan sira-neʼe,+ Maromak mós sei aumenta susar ba nia hodi tuir susar sira neʼebé hakerek ona iha livru neʼe,+ 19 no se ema ida hasai liafuan profesia nian ida husi livru neʼe, Maromak mós sei hasai ema neʼe nia parte diʼak neʼebé hakerek ona iha livru neʼe, neʼe katak Maromak sei la husik nia atu han husi ai-hun moris nian+ no la husik nia atu tama ba sidade santu.+

20 “Ida neʼebé fó sasin kona-ba buat sira-neʼe dehan: ‘Sin, haʼu sei mai lalais.’”+

“Amen! Mai, Naʼi Jesus.”

21 Haʼu hein katak Naʼi Jesus sei hatudu laran-diʼak neʼebé boot ba ema santu* sira.