SOFONIAS
1 Jeová fó sai liafuan ba Kusi nia oan-mane Sofonias,* iha tempu neʼebé Amon+ nia oan-mane Josias+ mak liurai ba rai-Judá. Kusi mak Gedalias nia oan-mane, Gedalias mak Amarias nia oan-mane, no Amarias mak Ezequias nia oan-mane.
2 Jeová dehan: “Haʼu sei halakon buat hotu husi rai leten.”+
3 “Haʼu sei halakon ema no animál.
Haʼu sei halakon manu neʼebé semo iha lalehan no ikan iha tasi,+
No haʼu sei halakon ema aat sira hamutuk ho fatuk sira neʼebé halo ema sidi;*+
Haʼu sei halakon ema husi rai leten”, Jeová mak dehan.
4 “Haʼu sei lolo liman hodi kontra Judá,
No kontra ema hotu neʼebé hela iha Jeruzalein.
Haʼu sei halakon ema hotu neʼebé adora Baal+ husi fatin neʼe,
No halakon maromak falsu nia amlulik sira-nia naran hamutuk ho amlulik sira,+
5 No ema sira neʼebé hakruʼuk iha uma-leten hodi adora tropa lalehan nian,+
No sira neʼebé hakruʼuk hodi jura atu laran-metin ba Jeová+
Maibé jura mós atu laran-metin ba Malkam;*+
6 Haʼu mós sei halakon sira neʼebé fila kotuk hodi la laʼo tuir Jeová+
No la buka Jeová no la husu ba nia.”+
7 Nonook bá iha Jeová, Naʼi Ukun-Naʼin Boot Liu, nia oin tanba Jeová nia loron besik ona.+
Jeová prepara ona sakrifísiu ida; nia halo santu* ona sira neʼebé nia konvida.
8 “Iha loron neʼebé haʼu hasaʼe sakrifísiu, haʼu, Jeová, sei fó kastigu ba ulun-naʼin sira,
Liurai nia oan-mane sira,+ no sira hotu neʼebé hatais ema estranjeiru nia roupa.
9 Haʼu sei fó kastigu ba ema hotu neʼebé saʼe palku* iha loron neʼebá,
Sira neʼebé halo nakonu sira-nia naʼi nia uma ho violénsia no lia-bosok.”
10 Jeová dehan: “Iha loron neʼebá,
Sei iha lian halerik husi Portaun Ikan,+
Sei iha lelir husi sidade nia Área Foun,+
No sei iha tarutu makaʼas husi foho-oan sira.
11 Oh imi neʼebé hela iha Maktes,* tanis bá,
Tanba negósiu-naʼin hotu lakon tiha ona;*
Sira hotu neʼebé tetu osan-mutin lakon mohu ona.
12 Iha tempu neʼebá, haʼu sei buka didiʼak iha Jeruzalein ho ahi-oan sira,
No haʼu sei fó kastigu ba sira neʼebé kontente ho sira-nia moris,* neʼebé hanoin iha sira-nia laran:
‘Jeová sei la halo buat diʼak, nia mós sei la halo buat aat.’+
13 Ema sei hadau sira-nia rikusoin no harahun sira-nia uma.+
Sira sei harii uma, maibé sira sei la hela iha uma neʼe.
Sira sei kuda uvas iha toʼos, maibé sira sei la hemu tua-uvas husi uvas sira-neʼe.+
14 Jeová nia loron boot besik ona!+
Neʼe besik ona no sei mai lalais loos!*+
Lian husi Jeová nia loron halo ema neon-susar.+
Iha loron neʼebá, funu-naʼin sei hakilar.+
15 Loron neʼe mak loron hirus nian,+
Loron terus no neon-susar nian,+
Loron anin-fuik no harahun nian,
Loron neʼe sei nakukun tebes,+
Loron neʼe sei iha kalohan metan,+
16 Loron neʼe mak loron huu dikur no hakilar lian funu nian,+
Hodi kontra hasoru sidade sira neʼebé iha moru aas no hasoru uma aas* iha moru nia sikun sira.+
17 Haʼu sei hamosu susar ba ema,
No sira sei laʼo hanesan ema matan-delek,+
Tanba sira halo ona sala kontra Jeová.+
18 Sira-nia osan-mutin no osan-mean labele salva sira iha Jeová nia loron hirus nian.+
Ninia laran-manas mak hanesan ahi neʼebé sei han mohu mundu tomak,+
Tanba nia sei halakon mohu ema hotu neʼebé hela iha rai iha dalan neʼebé aat loos.”+
2 Antes desizaun neʼebé fó sai ona sai loos,
Antes loron neʼe liu hanesan anin lori lakon trigu-kulit,
Antes Jeová nia hirus neʼebé lakan makaʼas toʼo ba imi,+
Antes Jeová nia loron hirus toʼo ba imi,
3 Buka Jeová,+ oh imi hotu neʼebé laran-maus* iha rai,
Neʼebé halo tuir ninia ukun-fuan neʼebé loos.*
Buka hahalok loos bá, no buka atu sai laran-maus.*
Karik imi sei hetan protesaun iha Jeová nia loron hirus.+
4 Tanba Gaza sei sai sidade neʼebé mamuk,
No Askelon sei rahun.+
Iha meiudia, inimigu sei duni sai ema neʼebé hela iha Asdod,
No sei fokit sai Ekron.+
5 “Susar ba ema Kereti+ nia nasaun neʼebé hela besik tasi!
Jeová fó sai ona liafuan kontra imi.
Haʼu sei halakon Kanaan, ema Filístia nia rai,
Atu nuneʼe la iha tan ema ida mak hela iha neʼebá.
6 No rai sira iha tasi ninin sei sai fatin ba animál sira atu han duʼut,
Fatin neʼebé iha bee-posu sira ba bibi-atan, no iha bibi-malae sira-nia luhan neʼebé halo husi fatuk.
7 Ema restu husi umakain Judá sei hela iha rai neʼe.+
Sira sei han iha neʼebá.
Iha kalan, sira sei toba iha uma sira iha Askelon.
Tanba Jeová, sira-nia Maromak, sei tau matan ba sira,*
No nia sei halibur fali ema sira neʼebé sai ona dadur.”+
8 “Haʼu rona ona Moab+ nia liafuan neʼebé hatún haʼu-nia povu no ema Ammon+ nia liafuan neʼebé koʼalia aat haʼu-nia povu,
Sira sadik haʼu-nia povu no gaba an kona-ba haʼu-nia povu nia rai.+
9 Tan neʼe, haʼu jura hodi haʼu-nia moris rasik”, Jeová neʼebé ukun tropa lalehan nian, Izraél nia Maromak, mak dehan,
“Moab sei sai hanesan Sodoma,+
No ema Ammon sei sai hanesan Gomorra,+
Fatin ba ai-tarak, rai neʼebé iha masin no fatin neʼebé fuik ba nafatin.+
Haʼu-nia povu restu sei foti sira-nia sasán,
No ema restu husi haʼu-nia nasaun sei duni sai sira husi sira-nia rai.
10 Neʼe mak buat neʼebé sira sei hetan tanba foti an,+
Tanba sira sadik no foti an hasoru povu husi Jeová neʼebé ukun tropa lalehan nian.
11 Jeová sei halo sira taʼuk,
Tanba nia sei halo maromak sira hotu iha mundu tomak sai folin-laek,*
No nasaun sira iha illa hotu sei hakruʼuk ba* nia,+
Husi sira ida-idak nia fatin.
12 Imi ema Etiópia sira, imi mós sei mate ho haʼu-nia surik.+
13 Nia sei lolo liman ba parte norte no halakon Asíria,
Nia sei halo Nínive sai fatin mamuk,+ no sai maran hanesan rai-fuik maran.
14 Animál-lubun sei hela iha sidade neʼe, sin, animál fuik oioin.
Iha kalan, manu-pelikanu no porku-espiñu sei toba entre sidade nia riin sira.
Lian ida sei sai husi ninia janela.
Ninia odamatan oin sei rahun hotu,
Tanba Nia sei husik anin no udan halo ai-sedru iha didin sira sai aat.
15 Neʼe mak sidade neʼebé uluk foti an no hela ho seguru,
Sidade neʼebé hanoin iha ninia laran dehan: ‘Haʼu mesak deʼit mak diʼak liu, no la iha ema seluk.’
Agora nia sai ona buat neʼebé halo ema taʼuk,
Fatin ba animál fuik sira atu toba.
Ema hotu neʼebé laʼo liu sei hakfuʼik no kumu liman no doko atu goza nia.”+
3 Susar ba sidade neʼebé kontradór, halo hahalok foʼer, no hanehan ema!+
2 Nia lakohi rona,+ no lakohi simu dixiplina.+
Nia la tau fiar ba Jeová,+ no la hakbesik ba ninia Maromak.+
3 Sidade neʼe nia ulun-naʼin sira mak hanesan leaun neʼebé hasai lian.+
Ninia juís sira mak hanesan asu-lobu* iha kalan;
Sira han buat hotu, ruin ida mós sira la husik toʼo dadeer.
4 Ninia profeta sira foti an no laran-makerek.+
5 Jeová hatudu hahalok loos iha sidade neʼe nia klaran.+ Nia la halo sala ida.
Dadeer-dadeer nia fó sai ninia desizaun sira,+
Hanesan naroman neʼebé sempre mosu tuir tempu.
Maibé ema neʼebé halo hahalok aat la hatene moe.+
6 “Haʼu halakon ona nasaun sira; haʼu harahun sira-nia uma aas* iha moru nia sikun sira.
Haʼu estraga sira-nia dalan, atu nuneʼe la iha ema ida mak laʼo liu.
Haʼu harahun sira-nia sidade, no la iha ema ida mak hela iha neʼebá.+
7 Haʼu dehan ba sidade neʼe: ‘Ó tenke hamtaʼuk haʼu no simu haʼu-nia dixiplina’,*+
Atu nuneʼe sidade neʼe nia hela-fatin labele rahun.+
Haʼu tenke fó kastigu ba nia tanba buat sira-neʼe hotu.
Maibé nia hakarak liután atu halo hahalok aat.+
8 Jeová dehan: ‘Tan neʼe, hein nafatin* haʼu,+
Toʼo loron neʼebé haʼu hamriik atu ataka ema no hadau sira-nia sasán,*
Tanba haʼu-nia desizaun mak atu halibur nasaun sira, ukun sira,
Atu fakar sai haʼu-nia laran-nakali no haʼu-nia hirus hotu neʼebé lakan makaʼas ba sira.+
Tanba haʼu-nia laran-manas mak hanesan ahi neʼebé sei han mohu mundu tomak.+
9 Tanba iha tempu neʼe mak haʼu sei troka povu sira-nia língua ho língua neʼebé moos,
Atu nuneʼe sira hotu bele bolu Jeová nia naran,
10 Haʼu-nia povu neʼebé namkari, neʼebé harohan ba haʼu, sei lori prezente ba haʼu
Husi área besik mota sira iha rai-Etiópia.+
11 Iha loron neʼebá, ó sei la hetan moe
Tanba hahalok hotu neʼebé ó halo hodi kontra haʼu,+
Tanba haʼu sei hasai tiha ema neʼebé loko an no gaba an husi ó-nia leet,
No ó sei nunka loko an tan iha haʼu-nia foho santu.+
12 Haʼu sei husik ema kiʼik no haraik an atu hela iha ó-nia leet,+
No sira sei buka protesaun iha Jeová nia naran.
13 Ema restu husi Izraél+ sei la hatudu hahalok aat.+
Sira sei la koʼalia bosok, no lia-bosok ida mós sei la sai husi sira-nia ibun.
Sira sei han* no toba, no sei la iha ema ida mak halo sira taʼuk.”+
14 Oh Siaun nia oan-feto, haklalak ho haksolok bá!
Oh Izraél, haklalak ho lian manán nian!+
Oh Jeruzalein nia oan-feto,+ haksolok no kontente bá ho ó-nia laran tomak!
15 Jeová hasai ona kastigu husi ó.+
Nia hasees ona ó-nia inimigu husi ó.+
Jeová, Liurai Izraél nian, hamutuk ho ó.+
Ó sei la taʼuk tan susar.+
16 Iha loron neʼebá, Jeruzalein sei rona liafuan tuirmai, neʼebé dehan:
“Oh Siaun, keta taʼuk.+
Keta husik ó-nia liman sai fraku.
17 Jeová, ó-nia Maromak, hamutuk ho ó.+
Hanesan asuwaʼin ida, nia sei salva ó.
Nia sei haksolok tebes kona-ba ó.+
Nia sei nonook* tanba nia hadomi ó.
Nia sei haklalak ho haksolok kona-ba ó.
18 Haʼu sei halibur ema sira neʼebé triste tanba la tuir ó-nia festa sira;+
Sira la tuir ó-nia festa sira tanba lori ó-nia moe iha rai seluk.+
19 Iha tempu neʼebá, haʼu sei kontra hasoru ema hotu neʼebé haterus ó.+
Haʼu sei salva sira neʼebé laʼo kudeʼik,+
No haʼu sei halibur ema sira neʼebé namkari.+
Haʼu sei halo sira hetan hahiʼi no naran-boot
Iha rai hotu neʼebé uluk sira hetan moe.”
20 Jeová dehan: “Iha tempu neʼebá, haʼu sei lori imi fila,
Iha tempu neʼebá, haʼu sei halibur imi hamutuk.
Imi-nia matan sei haree haʼu halibur fali imi-nia ema sira neʼebé sai ona dadur,+
Tanba haʼu sei halo imi hetan naran-boot no hahiʼi+ iha povu hotu nia leet iha mundu tomak.”
Naran neʼe katak “Nia neʼebé Jeová subar ona (hafolin)”.
Karik neʼe refere ba sasán ka atividade sira neʼebé liga ho adora estátua.
Haree Glosáriu.
Haree “Halo santu” iha Glosáriu.
Ka “plataforma”. Karik neʼe refere ba palku atu hatuur liurai nia kadunan.
Karik neʼe mak fatin iha Jeruzalein besik Portaun Ikan.
Orj., “nonook tiha”.
Ka “sira neʼebé la book an hanesan tua nia teen iha tua-fatin”.
Ka “mai ho ansi!”
Ka “torre”. Haree Glosáriu.
Orj., “tee-oan”.
Ka “haraik an”.
Orj., “ninia tesi-lia”.
Ka “haraik an”.
Ka “tau atensaun ba sira”.
Ka “halo maromak sira hotu sai hamlaha toʼo krekas”.
Ka “adora”.
Neʼe mak animál neʼebé siʼak no han animál seluk.
Ka “torre”.
Ka “korrije”.
Ka “hein ho pasiénsia ba”.
Ka karik “hamriik nuʼudar sasin ida”.
Orj., “Hodi serbí nia ho kabaas ida”.
Ka “han duʼut”.
Ka “kontente; hakmatek”.