Mbá dí itháan gíʼdoo numuu dí maraʼwíí maʼni xa̱bu̱, nindxu̱u̱ dí maxnáximinaʼ náa Jeobá mu maʼga̱nú maxtáa náa kúwá bi̱ nduyamajkuíí ikhaa. Jeobá nandoo dí xúgíinʼ xa̱bu̱ muraʼwi̱i̱ muni̱ rúʼko̱. Nandoo dí mambáxu̱u̱n gajmiún ma̱ngaa dí makuwá kámuu mbiʼi (Deut. 30:​19, 20; Gál. 6:​7, 8). Jeobá tsétsudaa nimbáa dí maʼni ñajuunʼ, ikhaa má naniñuuʼ dí mámbáa má garaʼwíí ndiéjunʼ gáʼni. Mú, ndiéjunʼ erígá índo̱ mbáa cristiano bi̱ nijngúun má iyááʼ nakudaminaʼ aʼkhá mbiiʼ rá. Á mu tsétanga̱a̱ a̱jkiu̱u̱n, mbaʼyóoʼ muriya̱a̱ʼ náa congregación (1 Cor. 5:13). Mú, maski ajndu xúʼko̱, Jeobá nandoo dí matanga̱a̱ mambajxúu ga̱jma̱a̱. Ikhaa numuu rúʼko̱ dí nixnájxi̱i̱ A̱ʼdióo makhañúu, mú xúʼko̱ ma̱ndoo maʼni mba̱a̱ a̱jkiu̱u̱n kaʼñún bi̱ natanga̱a̱ a̱jkiu̱ún náa aʼkhá dí nini. Dios ndrígúlú, ra̱ʼkhá tháán nandoo kaʼyulú, dí nambáñúún bi̱ nixudami̱jna̱ aʼkhá ga̱jma̱a̱ naʼthúún dí mata̱nga̱a̱ a̱jkiu̱ún (Zac. 1:3; Rom. 2:4; Sant. 4:8). w24.08 14 kutriga̱ 1, 2

Índo̱ apóstol Juan xtáa raʼnirámáʼ ragajtsú carta, tikhuun xa̱bu̱ kúwá má rusngáa dí minduwaʼ ga̱jma̱a̱ nuni̱ dí marigá xkujndu náa congregación. Mú, eʼwíinʼ “jngruigu̱u̱n má xúʼko̱ náa rí gajkhun”. Nunimbu̱u̱n kuyáá Jeobá ga̱jma̱a̱ nuni̱ “má xúʼko̱ xó má naʼthí náa kiʼtáñajunʼ ndrígóo” (2 Juan 4, 6). Cristianos bi̱ niguájun jmbu bugi̱ nini̱ rí maʼdxuu a̱jkiu̱u̱n Juan, ma̱ngaa nini̱ rí maʼdxuu a̱jkiu̱u̱n Jeobá (Prov. 27:11). Ndiéjunʼ eʼsngúlú ikháánʼ rá. Á mu naguajún jmbu náa Jeobá makuwáánʼ gagi (1 Juan 5:3). Mbá xkri̱da, ra̱ʼkhá tháán edxulú índo̱ nu̱ʼni̱ dí maxtáa gagi Jeobá. Ikhaa nadxuu índo̱ nu̱ʼni̱ gaʼduunʼ tsáʼkhá dí rígá náa numbaaʼ ga̱jma̱a̱ nuʼnimbulú dí naʼthí náa Ajngá rawuunʼ. Ma̱ngaa nadxún bi̱ kúwá mekhuíí (Luc. 15:10). Asndu mangáánʼ nadxulú índo̱ nduʼyáá dí a̱ngiu̱lú naguájun jmbu maski asndu najuixkúún o nuraʼníí tsáʼkhá (2 Tes. 1:4). Índo̱ gáguma gámbáa numbaaʼ náa dí naʼtáñajunʼ Gixa̱a̱, ra̱ʼkhá tháán gáʼdxulú numuu dí niguajún jmbu náa Jeobá. w24.11 12 kutriga̱ 17, 18

Nguáthá mba̱yu̱u̱ʼ gíʼmaa mbajyáaʼ mu ma̱ta̱ya̱a̱ xú káʼnii nindxu̱u̱ mbáa xa̱bu̱ mu maratha̱a̱n rí nandaaʼ majngruiga̱a̱ʼ ga̱jma̱a̱ʼ xá. Á mu naratháán mbá nacha̱, mbáa maku̱mu̱u̱ rí tsétatsaʼwáminaʼ májánʼ rí naratá (Prov. 29:20). Á mu ndaʼyoo rí nanigua̱a̱ʼ xtayáá, mú ndajyáaʼ mba̱yu̱u̱ʼ wéñuuʼ mu maratha̱a̱n, mbáa maku̱mu̱u̱ rí tséjmáan gátatsaʼwamínáʼ májánʼ (Ecl. 11:4). Garmáʼáan a̱jkia̱a̱nʼ rí maratha̱a̱n rí nanigua̱a̱ʼ xtayáá mbáa, na̱nguá má eyooʼ rí ma̱ta̱ya̱a̱ dí ikhaa mani̱ndxu̱u̱ bi̱ mbi̱ya̱a̱. Mú gíʼmaa ma̱ta̱ya̱a̱ rí gajkhun xtaa xawii matanujúnʼ o matatsiʼgúnʼ ga̱jma̱a̱ rí ikhaa ma̱ndoo mani̱ndxu̱u̱ bi̱ mbi̱ya̱a̱. Ndiéjunʼ gándoo gátani̱ á mu natayáá rí mbáa nandoo kaʼyaaʼ rá. Á mu ikháán na̱nguá eyaaʼ xtayáá, atani̱ mbaʼyoo kaʼwu dí na̱nguá e̱ndaaʼ xtayáá ga̱jma̱a̱ numuu xóo rí natani̱. Ra̱májánʼ gánindxu̱u̱ rí matasngajmáá rí nandaaʼ xtayáá á mu raʼkháa xúʼko̱ (Efes. 4:25). w24.05 23 kutriga̱ 9, 10