Kurahisisha Uchapishaji ili Kuwasaidia “Watu wa Namna Zote”

Yehova Mungu anataka “watu wa namna zote” wapate “ujuzi sahihi wa kweli.” (1 Timotheo 2:3, 4) Hata hivyo, ndugu na dada zetu na wale tunaowahubiria wanazungumza lugha nyingi tofauti-tofauti. Kila mwaka, tunachapisha nakala bilioni mbili hivi za machapisho katika lugha hizo. Ni hatua gani ambazo zimechukuliwa ili kutokeza chakula cha kiroho katika lugha nyingi hivyo, na wakati uleule kutumia michango kwa hekima?

Viwanda Vichache vya Kuchapisha, Vifaa Bora Zaidi

Katika miaka ya 1980, tulikuwa tukichapisha magazeti katika nchi zaidi ya 40. Tangu wakati huo, tumeboresha hatua kwa hatua jinsi uchapishaji ulivyokuwa ukifanywa na sasa tunachapisha katika nchi tisa tu. Licha ya hilo, katika kipindi hicho idadi ya lugha ambazo tunatokeza machapisho yetu imeongezeka kwa asilimia 500! Tunawezaje kuchapisha machapisho katika lugha nyingi zaidi kwa kutumia viwanda vichache zaidi vya uchapishaji? Sababu moja muhimu ni kwamba tuna vifaa bora zaidi vya uchapishaji.

Mashine za karibuni zaidi za kuchapisha zinatuwezesha kuchapisha machapisho mengi zaidi kwa muda mfupi. Mashine tulizokuwa tukitumia awali zilihitaji muda mwingi zaidi kubadili mabamba ya kuchapia ili tufanye kazi tofauti. Kwa kuwa sasa tunatumia mashine mpya, kubadilisha kutoka kazi moja mpaka nyingine kunachukua robo ya muda tuliokuwa tukitumia hapo awali. Sasa, tunamaliza kazi haraka zaidi, kutia ndani kuchapisha machapisho katika lugha zinazozungumzwa na watu wachache. Bila shaka, kila kazi inahitaji mabamba mapya ya kuchapishia. Hivi karibuni, tulitumia dola milioni mbili hivi kwa ajili ya mabamba ya kuchapishia katika kipindi cha miezi 12.a Kwa hiyo, kwa ajili ya kazi ndogo tunatumia mashine za kielektroni ambazo hazihitaji mabamba ya kuchapishia. Mashine hizi, kutia ndani zinazotumia teknolojia ya leza, hutokeza machapisho machache kwa gharama ndogo na zinatumia vizuri rasilimali zilizopo.

Kwa miaka mitatu iliyopita, tumetumia zaidi ya dola milioni kumi kuboresha mashine zetu za kuchapisha na kujalidi ulimwenguni pote. Ona jinsi tunavyotumia baadhi ya mashine hizo kutokeza Biblia. Awali, zaidi ya hatua 40 zilihitaji kufuatwa ili kutokeza Biblia baada ya kuchapishwa. Hatua hizo zilitia ndani kushona, kukata, kupiga msasa, na kupaka rangi. Isitoshe, tulihitaji kubeba Biblia hizo na kuzipanga katika kila hatua. Leo, ni hatua kumi tu zinazohitaji kufuatwa kwa sababu hatua nyingi zimeunganishwa katika mashine tunazotumia sasa. Pia, tunatumia mikanda ya umeme ya kusafirishia mizigo ili kuhamisha Biblia kutoka hatua moja mpaka nyingine. Kwa hiyo, tumepunguza kazi iliyohitajika ili kutokeza Biblia kwa zaidi ya asilimia 55. Kwa mfano, katika ofisi ya tawi ya Japani, kiwanda cha kujalidi kilikuwa kikitokeza nakala 2,000 za Biblia kila baada ya saa nane, lakini sasa kiwanda hicho kinatokeza nakala 35,000 za Biblia ndani ya muda huohuo!

Kuhifadhi Vitu Vichache Kunapunguza Gharama

Marekebisho yaliyotajwa hapo juu yametusaidia kuokoa michango. Kwa mfano, kwa kuwa sasa tunaweza kuchapisha machapisho machache na kubadili mabamba ya kuchapishia mara nyingi zaidi, tumepunguza kiasi cha machapisho tunayohifadhi katika kila kiwanda cha kuchapishia. Gary, anayetumikia katika ofisi ya tawi ya Marekani, anasema hivi: “Mwanzoni, ilionekana kwamba kuchapisha idadi ndogo ya machapisho mara nyingi zaidi si wazo zuri. Huenda mtu akafikiri ni bora zaidi kuchapisha machapisho mengi mara chache. Kwa mfano, katika mwaka wa kwanza tulipoanza kuchapisha machapisho machache, gharama za mabamba ya kuchapishia na kutupa taka za karatasi ziliongezeka kwa dola 60,000. Hata hivyo, tuliokoa zaidi ya dola milioni 1.5 ambazo tungetumia kuhifadhi vitabu na machapisho!” Michango hiyo huelekezwa kwenye shughuli nyingine muhimu kama vile, ujenzi wa Majumba ya Ufalme na jitihada za kutoa msaada.

Kwa kuwa tunahifadhi vitu vichache, tunakuwa na nafasi kubwa zaidi katika baadhi ya ofisi za tawi. Ofisi hizo za tawi zinaweza kutumia nafasi hizo kwa ajili ya mahitaji mengine ya Betheli. Pia, kwa kuchapisha katika viwanda vichache, tunapunguza ukubwa wa miradi mipya ya ujenzi. Kwa mfano, kazi ya uchapishaji katika ofisi ya tawi ya Uingereza ilianza kufanywa na ofisi ya tawi ya Ulaya ya Kati na viwanda vingine mwaka wa 2018. Hilo liliokoa mamilioni ya dola katika gharama za ujenzi wa ofisi mpya ya tawi iliyoko Chelmsford, Uingereza.

“Umenikumbuka!”

Jambo muhimu zaidi ni kwamba shughuli za uchapishaji zilizorahisishwa zinawasaidia watu kiroho. Sasa tunaweza kuchapisha katika lugha nyingi zaidi, hata ikiwa ni nakala chache tu za machapisho zinazohitajika. Kwa mfano, kuna watu 35,000 hivi wanaozungumza Kiwalisi wanaoishi katika eneo la New Caledonia na visiwa vya Wallis na Futuna. Hata hivyo, Agosti 2024, Biblia Takatifu—Tafsiri ya Ulimwengu Mpya ilitolewa katika Kiwalisi. Selafina, mhubiri anayezungumza Kiwalisi, anasema hivi: “Nilikuwa nikisoma maneno katika Biblia ya Kifaransa ambayo sikuyaelewa. Kwa hiyo, nilipopokea Biblia katika Kiwalisi, nilitokwa na machozi. Nilisali, ‘Ee Yehova, umenikumbuka! Wewe ni Mungu asiye na ubaguzi.’”

Katika Jamhuri ya Kidemokrasia ya Kongo kuna watu 500,000 hivi wanaozungumza Kisanga. Ingawa idadi hiyo ni ndogo, kitabu Furahia Maisha Milele! kilitafsiriwa katika lugha hiyo. Josué, ambaye anashirikiana na kutaniko la Kisanga, anasema hivi: “Ilikuwa vigumu sana kufafanua au kuwatafsiria wanafunzi wa Biblia maneno fulani. Na hata tulipofanya hivyo, nyakati nyingine wanafunzi wangu hawakuelewa habari zilizokuwa kwenye kitabu hicho. Tumefurahia sana kupata kitabu hiki katika Kisanga! Sasa wanaelewa wanachojifunza, na sihitaji tena kuwapa maelezo mengi.”

Tunachapisha na kusambaza chakula cha kiroho kwa watu wengi zaidi na katika lugha nyingi zaidi kuliko wakati mwingine wowote. Michango yenu, kutia ndani ile inayotolewa kupitia donate.jw.org, imetusaidia kutimiza mambo hayo. Asanteni sana kwa ukarimu wenu.