Endelea Kuwa Imara Kiroho Unapopata Elimu ya Ziada

1-2. (a) Ikiwa utaamua kupata elimu ya ziada, utahitaji kuendelea kufanya nini? (b) ‘Kuendelea kutembea kwa utaratibu katika mwendo huohuo’ kunamaanisha nini? (Wafilipi 3:16)

BAADHI ya watumishi wa Yehova wameamua kupata elimu ya ziada ambayo inazidi elimu ya lazima iliyo takwa la serikali. Huenda wakahisi kwamba wakipata elimu hiyo itaweza kuwasaidia kupata kazi ambayo itawategemeza katika utumishi wao kwa Yehova. Ikiwa umeamua kuwa utafuatilia elimu ya ziada, unawezaje kuhakikisha kwamba unaendelea kuwa karibu na Yehova unapopata masomo hayo? (Yak. 4:8a) Bila shaka, imani yako ilijaribiwa pia awali ulipokuwa shuleni. Sasa utahitaji “[kuendelea] kutembea kwa utaratibu katika mwendo huohuo”—yaani, kuendelea kumtumikia Yehova kwa uaminifu, kama tu ulivyofanya tayari.—Soma Wafilipi 3:16.

² Kitenzi cha Kigiriki kinachotumiwa katika msemo, “kutembea kwa utaratibu katika mwendo huohuo,” mara nyingi kilitumiwa jeshini kurejelea askari wanaotembea kwa umoja kwenye gwaride. Ukiamua kupata elimu ya ziada, utahitaji kuendelea “kusonga mbele” katika utumishi wa Yehova, usisimame tuli, wala kurudi nyuma. Makala hii itazungumzia kanuni nne za Biblia ambazo zitakusaidia. Kanuni hizo si mpya kwako. Ulizitumia zamani ulipokuwa shuleni, na utahitaji kuendelea kuzitumia unapopata elimu ya ziada na hata muda mrefu baada ya kumaliza masomo yako.

DUMISHA RATIBA NZURI YA KIROHO

3. Unaweza kukabili changamoto gani katika ratiba yako ya kila siku unapoendelea kupata elimu ya ziada?

³ Changamoto. Huenda elimu ya ziada ikafanya uwe na mambo mengi zaidi ya kufanya ambayo yataathiri ratiba yako ya kila siku. Elimu ya ziada inaweza kukufanya uwe mwenye shughuli nyingi. Kwa kuwa kiasili unataka kufanya vizuri katika masomo yako, huenda ukaanza kuyatanguliza, badala ya kutanguliza utumishi wako kwa Yehova. Unaweza hata kuanza kupuuza mikutano ya Kikristo, kushiriki katika huduma, funzo la Biblia la kibinafsi, na sala.—Ufu. 2:4.

4. Ni nini kinachoweza kukusaidia kuwa na “mengi ya kufanya katika kazi ya Bwana”? (1 Wakorintho 15:58)

⁴ Soma 1 Wakorintho 15:58. Kama tu ambavyo baiskeli inaendelea kusimama wima inapoendeshwa, utaendelea kusimama katika kweli ikiwa utakuwa na “mengi ya kufanya katika kazi ya Bwana,” kwenye utumishi wa Yehova. Hilo halimaanishi tu kutumia wakati fulani katika utendaji wa kitheokrasi. Jambo muhimu ni kile unachotanguliza maishani. Kumbuka kwamba wewe ni mtumishi wa Yehova kwanza, kisha mwanafunzi wa shule. (Mt. 22:37) Dada kijana anayeitwa Samantha, anasema hivi: “Nilijiambia kwamba ikiwa elimu yangu itaingilia utumishi wangu kwa Yehova, nitaacha shule.”

5. Unaweza kufanya nini ili uendelee kuwa na mengi ya kufanya katika utumishi wa Yehova?

⁵ Unachoweza kufanya kabla ya kuanza elimu ya ziada. Sikuzote kumbuka kutanguliza mambo muhimu. Jiulize hivi: ‘Nimefanya mipango gani ili nihudhurie mikutano kwa ukawaida, nishiriki katika utumishi, na kujifunza kibinafsi?’ (Yos. 1:8; Mt. 28:​19, 20; Ebr. 10:25) Pia, fikiria wakati uliopita: Uliwezaje kuendelea kutanguliza mambo muhimu wakati ulipokuwa shuleni zamani? Ikiwa unahisi kwamba kuna mambo ambayo ungependa kushughulikia vizuri zaidi, unaweza kufanya mabadiliko gani sasa? Azimia kuendelea kuwa na mengi ya kufanya katika utumishi wa Yehova unapopata elimu ya ziada. Yapatie uangalifu wa kutosha masomo yako—lakini usidhabihu ibada yako kwa Yehova.a—Mt. 6:24.

6. Unaweza kufikiria mambo gani unapojichunguza? (Tazama pia picha.)

⁶ Unapoendelea kupata elimu ya ziada, uwe na kawaida ya kujichunguza, huenda kila mwezi hivi. Jiulize hivi: ‘Je, bado ninatanguliza mambo muhimu?’ Uwe makini kutambua ishara za hatari, kama vile, zoea la kukosa au kuchelewa kufika kwenye mikutano, kufikiria kuhusu kazi za shule wakati wa mikutano, au kuhudhuria mikutano kwa njia ya mtandao tu. Chunguza pia ikiwa zoea lako la kusali na kusoma Biblia linaanza kuzorota au ikiwa huduma yako imekuwa ya kidesturi—kana kwamba ni kazi inayochosha unayotaka kumaliza haraka iwezekanavyo. Ikiwa utaona unaanza kusitawisha tabia kama hizo, chukua hatua haraka. Usiruhusu elimu yako ikuzuie kutanguliza maishani utumishi wako kwa Yehova.

‘LINDA UWEZO WAKO WA KUFIKIRI’

7. Unapopata elimu ya ziada, huenda ukakabili changamoto gani inapohusu njia yako ya kufikiri?

⁷ Changamoto. Ikitegemea masomo utakayochagua, huenda ukafundishwa “falsafa na udanganyifu mtupu” wa ulimwengu huu, kama vile imani ya kwamba hakuna Mungu na nadharia ya mageuzi, unapopata elimu ya ziada. (Kol. 2:8) Inaweza pia kuchochea roho ya kujitegemea. Ndugu mmoja kijana anakumbuka hivi: “Hatukufundishwa tu ustadi fulani; tulifundishwa njia ya kufikiri, ambayo mara nyingi haikupatana na njia ya Yehova ya kufikiri. Kwa mfano, tulifundishwa kwamba mafanikio yetu maishani yanategemea jitihada zetu. Njia hiyo ya kufikiri haikumhusisha Yehova. Na ilifanya iwe vigumu zaidi kwangu kumtegemea.”

8. Kwa nini ni muhimu “kuulinda uwezo wako wa kufikiri”? (Methali 5:​1, 2)

⁸ Soma Methali 5:​1, 2. Biblia inakuonya ‘uulinde uwezo wako wa kufikiri.’ Kulinda kitu kunamaanisha kwamba kiko hatarini kushambuliwa. Hilo ni kweli kabisa inapohusu uwezo wako wa kufikiri. (1 Pet. 5:8) Roho ya ulimwengu inaweza kudhoofisha imani yako inapohusu maadili, maoni kuhusu chanzo cha uhai, au ikiwa kuna Mungu. Huenda watu wakawasilisha maoni yao kwa njia inayofanya yaonekane ni ya “juu zaidi,” lakini kwa kweli sivyo ilivyo. Isitoshe, ni “upumbavu kwa Mungu.”—1 Kor. 3:​18-20.

9. Unaweza kufanya nini ili kulinda uwezo wako wa kufikiri?

⁹ Unachoweza kufanya kabla ya kuanza elimu ya ziada. Ili kulinda uwezo wako wa kufikiri, hakikisha una imani yenye nguvu katika mafundisho ya Biblia kabla ya kuanza elimu ya ziada. Jiulize hivi: ‘Kwa nini ninaamini kwamba kuna Mungu? Ninajuaje kwamba Biblia ni Neno lake? Ni nini kinachonihakikishia kwamba viwango vya Biblia vya maadili ni bora kuliko vya ulimwengu?’ Pia, kumbuka ulipokuwa shuleni zamani: Bila shaka, ulifundishwa kuhusu mitazamo ya ulimwengu huu. Je, imani yako ilidhoofishwa na maoni thabiti ya baadhi ya watu walioamini nadharia ya mageuzi? Je, ulishawishiwa kwa urahisi na mwenendo usio safi wa wanafunzi wenzako? Ikiwa unahisi kwamba ungeweza kutenda kwa njia nzuri zaidi wakati huo, unawezaje kuimarisha imani yako sasa? Azimia kulinda uwezo wako wa kufikiri unapopata elimu ya ziada.—2 Tim. 2:​16-18.b

10. Unawezaje kuendelea kuulinda uwezo wako wa kufikiri?

¹⁰ Unapopata elimu ya ziada, endelea kujichunguza kwa ukawaida. Jiulize hivi: ‘Je, ninaathiriwa na mwenendo wa watu wanaonizunguka wasiomwogopa Mungu? Je, ninatambua falsafa za ulimwengu huu zisizo za kweli? Je, nina uhakika kabisa kwamba ni Ufalme wa Mungu tu utakaoondoa matatizo ya wanadamu?’ Ili kulinda uwezo wako wa kufikiri, endelea kuwa mwanafunzi mzuri wa Neno la Mungu. Kujifunza Biblia na kutafakari, kutakusaidia uimarishe uhakika wako kwamba una kweli.—1 Tim. 4:15.

TUMIA WAKATI WAKO VIZURI

11. Unapopata elimu ya ziada, huenda ukakabili changamoto gani inapohusu kutumia wakati wako?

¹¹ Changamoto. Elimu ya ziada inaweza kuchukua wakati wako mwingi, hasa unapojitayarisha kwa ajili ya mitihani au unapohitaji kumaliza kazi fulani ya shule kwa wakati hususa. Ikiwa hutatumia vizuri wakati wako, huenda ukapata mkazo au hata tatizo la kuchoka kupita kiasi. Hiyo ndiyo sababu ni muhimu utunze afya yako ya kimwili na kihisia.

12. Ni utendaji gani ambao utahitaji kufikiria ili ‘utumie vizuri kabisa wakati wako’? (Waefeso 5:​15, 16)

¹² Soma Waefeso 5:​15, 16. Inaweza kuwa vigumu ‘kutumia vizuri kabisa wakati wako.’ Hivyo, unahitaji kuwa na usawaziko. Kwa mfano, zaidi ya kukazia tu fikira masomo yako, unahitaji kutumia wakati pamoja na waabudu wenzako na watu wa familia. (Zab. 133:1; Met. 18:1) Uhitaji wako wa kiroho, ndilo jambo kuu zaidi. (Mt. 6:33) Huenda pia una majukumu katika familia na unafanya kazi. Isitoshe, unahitaji kutunza afya yako kwa kupumzika vya kutosha na kufanya mazoezi. (Mhu. 4:6; 1 Tim. 4:8) Mambo hayo yote yanahitaji uwezo mzuri wa kupanga jinsi ya kutumia wakati wako.

13. Unaweza kufanya nini ili utumie vizuri kabisa wakati wako?

¹³ Unachoweza kufanya kabla ya kuanza elimu ya ziada. Biblia inasema kwamba mipango huleta mafanikio. (Met. 21:5) Ukiwa na hilo akilini, jitahidi kuwa na ratiba yenye usawaziko kabla ya kuanza elimu ya ziada. Ili kukusaidia kufanya hivyo, kumbuka ulipokuwa shuleni zamani: Ulitumiaje wakati wako? Ikiwa unahisi kwamba ungeweza kutenda kwa njia nzuri zaidi wakati huo, unaweza kufanya marekebisho gani sasa? Azimia kudhibiti vizuri matumizi ya wakati wako, badala ya kuuruhusu ukudhibiti wewe.c

14. Ni maswali gani yanayoweza kukusaidia kujichunguza?

¹⁴ Unapoendelea kupata elimu ya ziada, jichunguze mara kwa mara. Jiulize hivi: ‘Je, ratiba yangu inaniruhusu nipumzike vya kutosha na kufanya mazoezi? Je, bado nina wakati wa kushirikiana na waabudu wenzangu? Je, ninaweza kukamilisha kazi za shule za kujisomea nyumbani kwa wakati? Ikiwa siwezi, je, ni kwa sababu nina mambo mengi sana ya kufanya au ni kwa sababu ninaahirisha mambo? Je, wengine, kutia ndani watu wa familia, wanakubaliana na maoni yangu kujihusu?’ Iwe unahitaji kurekebisha ratiba yako au tu kujitia nidhamu, chukua hatua haraka. Unaweza hata kuzungumza na wengine ambao wana uwezo mzuri wa kutumia wakati wao.—Met. 11:14.

ENDELEA ‘KUTEMBEA NA WENYE HEKIMA’

15. Unaweza kukabili changamoto gani unapoendelea kupata elimu ya ziada?

¹⁵ Changamoto. Unapoendelea kupata elimu ya ziada, huenda wanafunzi wenzako wakajaribu kukuhusisha katika maisha yao nje ya masomo. Huenda ukashawishika kujiunga nao. Kwa kuwa labda mna mapendezi mengi yanayofanana hasa ikiwa unatumia wakati mwingi pamoja nao darasani. Huenda hata ukahisi kwamba mna mapendezi sawa na wanafunzi wenzako kuliko hata waabudu wenzako. Hata hivyo, unahitaji kuchukua tahadhari. Ingawa mko darasa moja na wanafunzi wenzako, viwango vyenu ni tofauti. Kadiri unavyotumia muda mwingi pamoja nao, ndivyo mawazo yao yatakavyokuathiri zaidi. (1 Kor. 15:33) Michael, aliyemaliza mafunzo ya ufundi wa umeme yaliyochukua miaka minne, alijionea ukweli wa jambo hilo. Anasema hivi: “Kila juma nilitumia zaidi ya saa 40 pamoja na wafanyakazi wenzangu ambao maoni yao kuhusu wanawake, muziki, na kutumia lugha chafu yalianza kuathiri njia yangu ya kufikiri.”

16. ‘Kutembea na wenye hekima’ kunamaanisha nini? (Methali 13:20)

¹⁶ Soma Methali 13:20. Biblia inatuonya kuhusu hatari za kushirikiana na watu wanaoweza kutuathiri kwa njia mbaya. Kwa upande mwingine, “anayetembea na wenye hekima atakuwa na hekima.” Somo liko wazi: Tunaathiriwa na wale tunaochagua kutumia wakati pamoja nao, iwe kwa njia nzuri au kwa njia mbaya. Dumisha urafiki pamoja na wale wanaokutakia mema—wale ambao, kama wewe, wanamtumikia Yehova kwa moyo wote.—Zab. 101:​6, 7; 119:63.

17. Unaweza kufanya nini ili kuepuka kushirikiana na watu wanaoweza kukuathiri kwa njia mbaya?

¹⁷ Unachoweza kufanya kabla ya kuanza elimu ya ziada. Amua mipaka utakayoweka inapohusu watu utakaoshirikiana nao. Shahidi anayeitwa Trenton, anasema hivi: “Ninawatendea kwa fadhili wanafunzi wenzangu, lakini baada ya muda wa masomo situmii wakati pamoja nao. Ninawaona kuwa wanafunzi wenzangu, si marafiki wangu wa karibu.” Wewe utajiwekea mipaka gani? Ili kujibu swali hilo, kumbuka ulipokuwa shuleni zamani: Je, ulijiwekea mipaka gani? Ikiwa unahisi kwamba ungeweza kutenda kwa njia nzuri zaidi wakati huo, unaweza kufanya marekebisho gani sasa? Azimia kuendelea ‘kutembea na wenye hekima’ na kuepuka kushirikiana na watu wasiompenda Yehova.d

18. Unapaswa kujiuliza maswali gani? (Tazama pia picha.)

¹⁸ Pindi kwa pindi, jiulize hivi unapojichunguza: ‘Je, ninaanza kuwa na urafiki wa karibu sana na wanafunzi wenzangu? Je, mazoea yao, maneno yao, na mitazamo wao inaanza kuathiri mambo ninayosema na kufikiri? Je, Yehova atakubaliana na maoni yangu kujihusu?’ (Zab. 1:1) Ikiwa utatambua mabadiliko yasiyofaa ndani yako, chukua hatua haraka. Hakikisha kwamba marafiki wako wa karibu zaidi ni wale ambao wanampenda Yehova kama wewe. Pia, usisite kuwahubiria wanafunzi wenzako. Una nafasi ya pekee ya kuwasaidia wajifunze kuhusu kweli.

JITAYARISHE

19. Unawezaje kujitayarisha kukabiliana na changamoto za kiroho unapopata elimu ya ziada? Toa mfano.

¹⁹ Mpandaji mlima mwenye hekima hujitayarisha kabla ya kuanza safari yake. Ingawa hawezi kujua mapema kila changamoto atakayokabili, yuko imara, amevaa mavazi yanayofaa, na ana lengo—anajua mahali anapoelekea. Unaweza kutenda kwa njia hiyohiyo unapopata elimu ya ziada. Endelea kuimarisha imani yako, vaa “mavazi kamili ya silaha kutoka kwa Mungu,” na uwe na lengo—si kupata kile kinachoonwa na ulimwengu kuwa “mafanikio,” bali kumletea utukufu Yehova katika kila jambo unalofanya.—Efe. 6:​11-13; 1 Kor. 9:​26, 27; 10:31.

20. Unawezaje ‘kuendelea kujijaribu kama uko katika imani’?

²⁰ Biblia inatuhimiza hivi: “Endeleeni kujijaribu kama mko katika imani, endeleeni kuthibitisha jinsi ninyi wenyewe mlivyo.” (2 Kor. 13:5) Unaweza kufanya hivyo unapopata elimu ya ziada. Jichunguze kwa ukawaida inapohusu mambo yaliyozungumziwa katika makala hii. Je, unadumisha ratiba nzuri ya kiroho? Je, unalinda njia yako ya kufikiri inapohusu kile kinachoonwa kuwa hekima ya ulimwengu huu? Je, unatumia vizuri kabisa wakati wako? Je, unasitawisha urafiki pamoja na Wakristo wenzako huku ukiepuka kushirikiana na watu wanaoweza kukuathiri kwa njia mbaya? Haya ni maswali ambayo unahitaji kujiuliza iwe uko shuleni, kazini, au mahali popote pengine. Azimia kuendelea kuwa na imani yenye nguvu katika hali yoyote unayokabili. Unaweza kuwa na uhakika kwamba Yehova atabariki jitihada zako za kufanya hivyo.—Met. 3:​5, 6.