Imagination World/stock.adobe.com
Umlayeto Lovela EVini LaNkulunkulu—Litsemba Ngebakhoseli!
Njalo ngemnyaka tigidzi tebantfu tiphoceleleka kutsi tibaleke emakhaya ato kuze tiphephe. Nawe ubhekene nalesimo lesimatima yini? Nangabe kunjalo ciniseka kutsi awusiwedvwa, ukhona lofuna kukusita. Nkulunkulu usiniketa litsemba lemphilo lencono longafundza ngalo eBhayibhelini.
“Bakhoseli kanye nebantfu labaphoceleleke kutsi bashiye emakhaya abo abagcini nje ngekudzinga lusito loluphutfumako kuphela kodvwa baphindze. . . badzinge nelitsemba ngelikusasa,”a kusho Christos Stylianides, losiphatsimandla se-European Union.b Bantfu labanelitsemba bayakhona kuba nesimo sengcondvo lesihle ngelikusasa labo. Ngetulu kwekuba nelitsemba, bakhoseli baphindze badzinge indvudvuto kuze babhekane nendlela lebativa ngayo ngalesimo lesibavelele.
“Bengesaba, ngiva buhlungu lobukhulu futsi ngicindzetelekile ngesikhatsi kudzingeka kutsi ngibaleke eveni lakitsi futsi ngishiye nemndeni wami.”—Emmanuel, Haiti.
Nawe utiva njenga-Emmanuel yini? Nangabe ubalekile ekhaya, udzinga lokutsite lokungakunika indvudvuto kanye nelitsemba. Lingakusita njani liVi laNkulunkulu liBhayibheli?
Indvudvuto letfolakala eVini laNkulunkulu
LiBhayibheli litsi: ‘Jehovac . . . uyamtsandza umuntfu losihambi.’—Dutheronomi 10:17, 18.
Loku kusho kutsi awusiwedvwa. Jehova Nkulunkulu longuMbhali weliBhayibheli, uyasicondza simo lokuso, uyakutsandza futsi unendzaba ngalokwenteka kuwe kanye nendlela lotiva ngayo.
LiBhayibheli litsi: “Jehova usedvute nabo bonkhe labambitako.”—Tihlabelelo 145:18.
Loku kusho kutsi nawuthantaza Jehova uyakuva. Utakuniketa kuthula kwengcondvo. Aphindze akuphe kuhlakanipha lokuseBhayibhelini lokungakusita kutsi ubhekane nalesimo.
LiBhayibheli litsi: “Nkulunkulu weliciniso akakucabangi ngisho nekukucabanga kwenta lokubi . . . Somandla akehluleli ngendlela lengakalungi.”—Jobe 34:10, 12.
Loku kusho kutsi akusuye Nkulunkulu lokwenta uhlupheke. Akakujezisi nobe akuvivinye ngekutsi ente kuphila kwakho kube lukhuni.
Litsemba lelitfolakala eVini laNkulunkulu
LiBhayibheli lisitjela ngaloko Nkulunkulu latasentela kona esikhatsini lesitako. Cabanga kutsi lelitsemba libasita njani labo labaphoceleleke kutsi bashiye emakhaya abo.
LiBhayibheli litsi: “[Nkulunkulu] uyakwesula tonkhe tinyembeti emehlweni abo, kufa ngeke kusaba khona, futsi kulila, nekukhala kanye nebuhlungu ngeke kusaba.”—Sembulo 21:4.
Loku kusho kutsi angeke sisahlupheka. Nkulunkulu wetsembisa kuticedza tonkhe tinkinga letisenta sitive siphelelwe litsemba.
“Madvutane Nkulunkulu utakucedza konkhe kungalungi kanye netintfo letimbi letentekako ekuphileni kwetfu. Lelitsemba lingisita kutsi ngihlale ngicabanga ngalelilanga lapho konkhe kuhlupheka kutawuphela khona.”—Karla, El Salvador.
LiBhayibheli litsi: “Tintfo lesetendlulile angeke tisakhunjulwa, futsi angeke tisanivisa buhlungu.”—Isaya 65:17.
Loku kusho kutsi angeke sisatikhumbula tintfo letibuhlungu letenteke kitsi. Nkulunkulu utawucinisekisa kutsi awuhlali ukhumbula tintfo letibuhlungu letenteke kuwe.
“LiBhayibheli letsembisa kutsi angeke sikukhumbule konkhe lokusilahlekele kanye nebuhlungu lesike sabhekana nabo. Lelitsemba lingisita ngibhekane netimo letilukhuni ngoba ngiyati kutsi madvutane konkhe kutawuba ncono.”—Natalia, Ukraine.
LiBhayibheli litsi: ‘Nkulunkulu welizulu utawubeka umbuso. . . lotawupitjita yonkhe lemibuso uyicedze.’—Danyela 2:44.
Loku kusho kutsi hulumende lokahle wasezulwini utawubusa umhlaba. Madvutane Nkulunkulu utawubeka hulumende wakhe wasezulwini lotawungena esikhundleni sabo bonkhe bohulumende bebantfu. Lohulumende utawuletsa kuthula kanye nekulondzeka lokutawuhlala njalo futsi uletse kulunga kanye nemphumelelo kubo bonkhe bantfu.—Mikha 4:3, 4.
“Kuyangikhutsata kwati kutsi uMbuso waJehova utaticedza tonkhe tinkinga letifaka ekhatsi kucindzetelwa, kubukelwa phansi, kungetsenjwa, kanye nekubandlululwa.”—Mustafa, Middle East.
Awukudvudvute umlayeto loseBhayibhelini lomayelana nelitsemba
Kuhlakanipha lokutfolakala eVini laNkulunkulu
Kuhlakanipha lokuseBhayibhelini kungakusita njengobe kancane kancane uzama kubhekana nesimo lokuso. Kungaphindze kukusite ukhone kubhekana nekushintja kwetimo takho, lokufaka ekhatsi kulahlekelwa tintfo lebewunato. Naka kutsi letimiso letilandzelako tibasita njani bakhoseli:
LiBhayibheli litsi: “Ngisho nalapho umuntfu anjingile kuphila kwakhe akuveli etintfweni lanato.”—Lukha 12:15.
Indlela lamavi lahlakaniphile langakusita ngayo kuze ubeketelele lesimo: Kungenteka wetfuke kakhulu futsi uva buhlungu ngaloko lokukulahlekele. Nobe kunjalo, nawungema kancane, ucabange ngekubaluleka kwekuphila kwakho ungabona kutsi imphilo ibaluleke kakhulu kwendlula nobe yini lekulahlekele.
“Kuphila kubaluleke kakhulu kunetintfo lesinato. Kuletinye timo, tintfo lesinato nobe imali angeke kusisite ngalutfo.”—Natalia, Ukraine.
LiBhayibheli litsi: “Ungacali utsi: ‘Kungani emalanga akadzeni bekancono kunalawa?’”—Umshumayeli 7:10.
Indlela lamavi lahlakaniphile langakusita ngayo kuze ubeketelele lesimo: Simo lobhekene naso nyalo kungenteka simatima kakhulu, kodvwa yetama kungasicatsanisi nendlela lebewuphila ngayo ngaphambili, lokungakusita kutsi ungahlali ukwatile.
“Kwemukela simo lengikuso njengobe sinjalo, kungenta ngihlale nginesimo sengcondvo lesihle.”—Eli, Rwanda.
LiBhayibheli litsi: “Kufanele seneliswe kuba nekudla nekwekwembatsa.”—1 KuThimothi 6:8.
Indlela lamavi lahlakaniphile langakusita ngayo kuze ubeketelele lesimo: Yetama kwenetiseka ngaloko lonako ekuphileni. Nawenetiseka ngaloko lonako angeke uhlale ukhatsatekile.
“LiBhayibheli lingisita ngingacabangi kakhulu ngaloko lokusilahlekele. Mine nemfati wami siyajabula ngekutsi siyaphila futsi sisendzaweni lephephile.”—Ivan, Ukraine.
LiBhayibheli litsi: “Tonkhe tintfo lenifuna bantfu batente kini, nani tenteni kubo.”—Matewu 7:12.
Indlela lamavi lahlakaniphile langakusita ngayo kuze ubeketelele lesimo: Utawukhona kuphila kahle nalabanye bantfu nawungababeketelela futsi ubakhombise umusa. Nawenta njalo kutakuba melula ngebantfu kutsi bakwemukele futsi bangakubandlululi.
“Bantfu labanyenti bayajabula nawubaphatsa ngenhlonipho, ngemusa nangelutsandvo. Lobuntfu lobuhle bungakusita kutsi ube nebudlelwane lobuhle nebantfu bakulendzawo lensha losewuhlala kuyo.”—Angelo, Sri Lanka.
LiBhayibheli litsi: “Ticelo tenu atatiwe nguNkulunkulu . . . futsi kuthula kwaNkulunkulu . . . kutawulondvolota tinhlitiyo netingcondvo tenu.”—KubaseFiliphi 4:6, 7.
Indlela lamavi lahlakaniphile langakusita ngayo kuze ubeketelele lesimo: Thantaza kuNkulunkulu umtjele ngendlela lotiva ngayo, ngalokudzingako nangaloko lokukukhatsatako. Kuthantaza ngalendlela kutakusita ungakhatsateki kakhulu ngesimo lokuso.
“Ngithantaza kuNkulunkulu njalo nanginetinkinga futsi uyayiphendvula imithantazo yami. Lengikufundze eBhayibhelini kunginikete kuthula kwengcondvo.”—Yol, South Sudan.
“Lengikufundza eBhayibhelini kunginika kuthula lokungisita ngikhone kubeketelela lesimo lengikuso.”—Valentina, Ukraine.
“Kuyangikhutsata kwati kutsi Jehova Nkulunkulu usetsembisa imphilo lencono.”—Emmanuel, Haiti
Ungatsandza yini kufundza lokunyenti ngalokwetsenjiswa liBhayibheli mayelana nendvudvuto nelitsemba kanye netizatfu letingakwenta ukwetsembe? Faka sicelo sekutsi BoFakazi BaJehova bakuvakashele. Bangakujabulela kukusita.
a I-UN Refugee Agency itsi, bakhoseli bantfu labaphoceleleke kutsi bashiye emakhaya abo baye kulenye indzawo nobe bashiye emave abo baye kulamanye emave futsi bahlale kulawo mave ngalokungekho emtsetfweni.
b I-European Union Commissioner for Humanitarian Aid and Crisis Management.
c Jehova ligama laNkulunkulu. (Tihlabelelo 83:18) Buka sihloko lesitsi “Ungubani Jehova?”