IMIBUTO LEVELA KUBAFUNDZI

Njengobe kubhalwe embhalweni waKubaseGalathiya 4:24, ngutiphi letivumelwane letimbili umphostoli Pawula lebekakhuluma ngato?

Ngemuva kwekutsi umphostoli Pawula akhulume ngebudlelwane lobusemkhatsini wa-Abrahama, naSara naHagari, watsi: “Letintfo tingatsatfwa njengendzaba lengumfanekiso; ngobe labafati bamelela tivumelwane letimbili.” (Gal. 4:22-24) Esikhatsini lesendlulile, satsi letivumelwane letimbili sivumelwane seMtsetfo nesivumelwane lesisha. Kodvwa ngemuva kwekucwaningisisa ngalendzaba, sibese siyaciniseka kutsi kudzingeka kwentiwe lushintjo. Kubonakala ngatsi Pawula bekakhuluma ngesivumelwane sa-Abrahama, hhayi sivumelwane lesisha. Nati letinye tizatfu letenta sisho njalo.a

Pawula wahlobanisa sigcilakati lesinguHagari neNtsaba iSinayi. (Gal. 4:25) Hagari bekasho sivumelwane seMtsetfo lesentiwa eNtsabeni iSinayi nga-1513 B.C.E. (Eks. 19:5, 6) Kute umuntfu lonesono lebekangawugcina ncamashi loMtsetfo, ngako bewukhumbuta emaJuda kutsi atigcili tesono. LoMtsetfo bewungasita sive sema-Israyeli sikhone kubona Mesiya, lokunguye kuphela umuntfu lebekatawukhona kuwugcina ncamashi loMtsetfo. Ngesikhatsi Mesiya anikela ngekuphila kwakhe lokute sono, wavulela bantfu labanesono litfuba lekutsi bakhululwe esonweni nasekufeni. (Gal. 3:19, 24, 25) Ngemuva kwekutsi Jesu sekayifezile injongo yaNkulunkulu, kwabese kuba bete sidzingo saloMtsetfo.—Rom. 10:4.

Pawula waveta kungafani lokukhona emkhatsini waHagari naSara ‘lebakungumfati lokhululekile’ lowatala umntfwana “ngesetsembiso.” (Gal. 4:23) Lesetsembiso bekusivumelwane sa-Abrahama. (Gal. 3:29; 4:28, 30) Sichazwa kahle embhalweni waGenesisi 22:18 lotsi: “Tonkhe tive temhlaba titawubusiswa ngentalelwane yakho [Abrahama], ngobe wena ulilalele livi lami.”

Lesivumelwane lesentiwa na-Abrahama sengeta kuloko Jehova bekakwetsembise e-Edeni. (Gen. 3:15) Saveta kutsi ‘lentalelwane’ lebekukhulunywe ngayo beyitawuvela esitukulwaneni sa-Abrahama. Pawula wachaza kutsi ngalokuyinhloko ‘lentalelwane’ imelela Jesu Khristu. Kodvwa labo ‘lababaKhristu,’ lokutindlalifa letingu-144 000, letitawubusa naJesu eMbusweni wakhe, nato tiyincenye yalentalelwane lengumfanekiso. (Gal. 3:16, 29; Semb. 14:1-3) Kufezeka kwalesetsembiso Nkulunkulu lasenta ku-Abrahama kutawubaletsela tibusiso letinyenti labo labemukela Jesu futsi bamlalele.

Yini leyenta Pawula washo ‘lendzaba lengumfanekiso’? Bekakhombisa kutsi nangabe emaJuda angesikhatsi sakhe achubeka atsi kufanele kugcinwe uMtsetfo, nawo bekatawuchubeka atigcili njengaHagari. Kodvwa nangabe emukela ‘lentalelwane’ leyinhloko ya-Abrahama, lokunguJesu Khristu, bekatawukhululeka njengaSara. Bekatawukhululeka mbamba esonweni nasekufeni. (Joh. 8:32-34) Nangabe angamemukeli Jesu, bekatawulahlekelwa sizatfu lesiyinhloko sekutsi kube nesivumelwane seMtsetfo, lokukuwacondzisa kuKhristu.

Linyenti lalabantfu baseGalathiya lebekababhalela Pawula bebangasiwo emaJuda futsi abazange babe ngephansi kweMtsetfo. Lamanye emaJuda bekaphikelela atsi emaKhristu akuletinye tive kufanele agcine uMtsetfo, lokufaka ekhatsi kusoka. Pawula watsi bekutawuba bulima kutsi labantfu babambelele ‘kulobugcili’ baloMtsetfo ngobe besebayitfolile ‘inkhululeko’ yaKhristu.​—Gal. 5:1, 10-14.