Emanethi Ekudweba Lebekasetjentiswa Ngetikhatsi Tekubhalwa KweliBhayibheli

Kungenteka labo labafundza liBhayibheli batawukhumbula kutsi labanye balandzeli baJesu bebabadwebi. (Mak. 1:16-20) Bebasebentisa emanethi nabadweba eLwandle LwaseGalile.

Emanethi ekudweba bekakhiwa ngekutsi kuhlanganiswe tintsambo tiboshwe kwentiwe emafindvo kuze kuphume intfo lengatsi sisefo. Bukhulu baletikhala talelinethi bebuya ngekutsi umdwebi ufuna kubamba tinhlanti letinkhulu kangakanani. Bekuboshelwa insimbi nobe litje emanethini lamancane kuze akhone kucwila, futsi bekuboshelwa intfo lesindzako ngephansi emanethini lamakhulu bese ngetulu kuboshelwa lokungatsi ngemabhola kuze kundande.

Emanethi ekudweba bekadulile. Bekangalinyatwa ngematje langephansi elwandle nobe adzatjulwe kusindza kwetinhlanti letinyenti letibanjiwe. (Luk. 5:6) LiBhayibheli litsi boJakobe naJohane ‘bebalungisa emanethi abo,’ futsi kungenteka bebasebentisa inyalitsi nemtiya welineni. (Mat. 4:21) Badwebi bebangalungisa emanethi abo njalo nabacedza kuwasebentisa. NaLukha wakhuluma ngebadwebi ‘lebebawasha emanethi abo’ kuze basuse kungcola. (Luk. 5:2) Ngemuva kwaloko, labadwebi bebaneka lamanethi abo kuze ome, mhlawumbe loko bebakwenta kuze angaboli.​—Hez. 47:10.

Jesu wabita lamanye emadvodza lebeketayele kusebentisa emanethi ekudweba kutsi abe “badwebi bebantfu.”