Jehova Ungifundzise Kusukela Ngisesemusha

Kodvwa ngingakachubeki, ase nginicocela kusukela ekucaleni. Ngatalwa ngesikhatsi seMphi Yelive Yesibili eCalgary, eCanada. Ngasekupheleni kwabo-1940, lelinye lihlahlandlela leliselisha lokutsiwa nguDonald Fraser lanconcotsa emnyango wakitsi, futsi make wasemukela sifundvo seliBhayibheli. Walitsandza liciniso, kodvwa ngenca yekutsi bekagula kakhulu, bekangakhoni kuya njalo emihlanganweni. Nobe kunjalo, watfutfuka futsi wabhajatiswa nga-1950. Kodvwa lokubuhlungu kutsi washona kungakapheli nje iminyaka lemibili. Babe bekangasuye Fakazi ngaleso sikhatsi, kodvwa wavuma kutsi boFakazi bachube umngcwabo wamake.

Emalangeni lambalwa ngemuva kwemngcwabo, lomunye dzadze losakhulile futsi logcotjiwe lokutsiwa ngu-Alice, wangimemela emihlanganweni yelibandla. Bekangati ngobe bengihle ngiya namake emihlanganweni ngetimphelasontfo nangabe ancono. Ngacela kubabe. Wavuma futsi wancuma kuhamba nami kanye nje, ngekusho kwakhe, kuze ayobonga lomzalwane lobekabeke inkhulumo emngcwabeni wamake. Ngalobo busuku, bekuneSikolwa Semsebenti WemaKhristu. Loyo kwaba ngumhlangano lokahle kakhulu wekucala kubabe. Bekatsetse emaklasi ekukhuluma embikwelinyenti, futsi kwamjabulisa kakhulu loko lakuva kulomhlangano. Wabese uncuma kuba khona kulomhlangano njalo ngeliviki. Kancane kancane, wacala kuya nakuleminye imihlangano.

Kulawo malanga, umzalwane lobuke Sikolwa Semsebenti WemaKhristu bekacalisa lomhlangano ngekufundza emagama alabo lababhalisile, futsi ngamunye wabo bekaphendvula atsi: “Ngikhona.” Ngalelinye lilanga, ngacela kutsi nelami ligama lifundvwe emhlanganweni lolandzelako. Lomzalwane wangincoma ajabulile, kodvwa wangangibuti kutsi ngiyati yini kutsi kusho kutsini loko.

Bengingati kutsi ngibhalisela kubeka tinkhulumo esikolweni sebafundzi, bengifuna nje kutsi nelami ligama libitwe! Ngeliviki lelilandzelako, nelami ligama labitwa, futsi ngekujabula lokukhulu ngaphendvula ngatsi: “Ngikhona.” Ngemuva kwemihlangano, bazalwane nabodzadze bangibongela. Ngemuva kwemaviki lambalwa, nganikwa lesabelo lengikhulume ngaso ekucaleni.

Bengisenkingeni! Ngaleso sikhatsi, bafundzi bekulindzeleke kutsi balungiselele inkhulumo letsatsa imizuzu langu-6 kuya kulengu-8. Bekute sabelo sekufundza liBhayibheli nje kuphela. Babe wangisita kuze ngilungiselele lenkhulumo, futsi wangiphrakthizisa tikhatsi letingu-20 ngaphambi kwekutsi ngiyibeke. Ngemuva kwaloko, umzalwane lobuke sikolwa wanginiketa seluleko lesilusito kakhulu. Kuyo yonkhe leminyaka, Jehova ungiceceshile asebentisa babe, bazalwane nabodzadze labanelikhono, kanye nenhlangano yakhe.

JEHOVA UYACHUBEKA NEKUNGICECESHA

Alice lengike ngakhuluma ngaye, wangicecesha nangicala kushumayela. Kulawo malanga, besikhutsatwa kutsi sifundzele umnikati welikhaya emavesi lamatsatfu bese simniketa incwadzi. Nasekusikhatsi sami sekutsi ngikhulume, Alice bekatisho kutsi ungubani, acalise incociswano bese ungicela kutsi ngifundze livesi lekucala. Ngemuva kwaloko, bengibese ngiyachubeka nalencociswano, ngifundze livesi lesibili nelesitsatfu, bese ngimniketa incwadzi. Ngekuhamba kwesikhatsi, ngafundza kucalisa incociswano. Ngemuva kwekutsi babe abhajatiswe ngasekupheleni kwa-1954, kwabese kuba nguye lohamba embili kakhulu ekungicecesheni emsebentini wekushumayela. Njengobe bekangikhulisa ayedvwa, wenta konkhe lokusemandleni akhe kuze angisite ngitsandze Jehova. Imihlangano yelibandla kanye nekushumayela bekubaluleke kakhulu kuye. Bengihlale ngati kutsi sitakuya kuyo yonkhe imihlangano futsi sishumayele ngetimphelasontfo.

Esikolweni, bengingumfundzi losemkhatsini; nobe kunjalo, lokunye kwalokuceceshwa lengakutfola khona iminyaka lengu-12 kungisite kuko konkhe kuphila kwami. Sibonelo nje, ngafundza lokunyenti esifundvweni setibalo nesesiNgisi. Liklasi lesiNgisi kanye nelekufundza kubhala tindzaba lingisite kakhulu esabelweni lengisentako nyalo eTikweni Lekubhala.

Bantfu bavame kungibuta kutsi yini leyenta ngitsandze umculo. Batali bami bebawutsandza umculo. Nangineminyaka lengu-7, ngafundza kudlala i-piano sikhashana, kodvwa thishela wami wabona ngatsi ngite kahle likhono. Watsi kubabe kungaba njani angiyekelise. Ngiyabona kutsi yini leyamenta washo njalo, bengite kahle sifiso sekufundza ngaleso sikhatsi.

Ngemuva kwetinyanga letimbalwa, babe wangitfolela lomunye thishela. Nyalo besengifundza kudlala i-piano kanye nekuhlabela, futsi bengikwenta kahle kakhulu. Njengobe bengihlabela i-soprano nangisemncane, benginelivi lelihle futsi ngawina kuleminye imincintiswano. Umgomo wami wekufundzela umculo kutsi bengifuna kutfola sitifiketi khona ngitawufundzisa umculo, futsi ngikhone kutisekela nangenta umsebenti wasikhatsi sonkhe. Kodvwa nasekusele kancane kutsi ngitfole lesitifiketi, ngabona kutsi bekutawudzingeka ngicitse sikhatsi lesinyenti ngidadisha umculo futsi ngilungiselela luhlolo. Ngako ngayekela kufundzela futsi ngaba lihlahlandlela lelivamile. Loko kwenteka nga-1963.

KUBA LIHLAHLANDLELA KULETSA INJABULO

Nase kuphele umnyaka ngilihlahlandlela, ngaba lihlahlandlela lelikhetsekile eKapuskasing, e-Ontario. Daniel Skinner lebengilihlahlandlela naye, bekamdzala kunami ngeminyaka lephindvwe kabili. Wangifundzisa lokunyenti ngendlela libandla lelisebenta ngayo. Nangineminyaka lengu-20, bengiseKomidini YeMsebenti Yelibandla, ngako kunyenti lebekusafanele ngikufundze. Ngijabula kakhulu ngekutsi inhlangano seyiphindze igcizelela kuceceshwa kwebazalwane labasebasha. Nangabe batimisela, bangaba lusito kuJehova ngisho basesebancane!

IKapuskasing beyinetinkinga tayo. Ebusika, lizinga lekubandza belehla lifike ku -44°C, nobe-ke nangabe lincono, belifika ku -33°C. Mine naDan besivame kuhamba cishe yonkhe indzawo. Nobe kunjalo, emkhatsini walokunye lokwangijabulisa kakhulu ngalesabelo kuhlangana naLinda Cole, lokwatsi ngekuhamba kwesikhatsi waba nguLinda Splane.

Linda bekangummemeteli loshisekako, futsi banyenti bantfu labakahle lebekabuyela kubo. Bekephana, anenhlitiyo lenhle futsi akutsandza kucitsa sikhatsi nebantfu. Make wakhe, lokunguGoldie, bekangudzadze lowetsembekile. Babe wakhe, lokungu-Allen, bekamelene neliciniso ekucaleni. Nanobe bekabaphikisa, Goldie bekavame kuya naLinda nabobhuti bakhe, lokunguJohn naGordon, eHholweni leMbuso, futsi wabacecesha emsebentini wekushumayela. Ngaletinye tikhatsi, boGoldie, Linda, John, naGordon bebaba ngemahlahlandlela. Ngemuva kweminyaka, Allen walemukela liciniso futsi besekasebenta ngekutimisela ebandleni.

Nga-1965, ngamenywa kutsi ngiyotfola lokunye kuceceshwa eSikolweni Semsebenti WeMbuso eBethel yaseCanada, lebekutsatsa inyanga. Kulesikolwa, ngakhutsatwa kutsi ngifake sicelo sekuya eGileyadi. Bengingakake ngakucabanga kuba sitfunywa selivangeli, ngetulu kwaloko, bengingacabangi kutsi ngitawukhona, kodvwa ngasifaka lesicelo. Ngamenywa eklasini lesi-42. EGileyadi, bothishela betfu bebavame kusitjela kutsi sichuba njani. Nabangitjela kwekucala kutsi ngichuba njani, bangikhutsata kutsi ngifundze konkhe lengingakufundza ngenhlangano kulesikolwa. Leso bekuseluleko lesihle kakhulu lebesinganikwa umuntfu loneminyaka lengu-21.

Lokunye lebekufundvwa eGileyadi yindlela yekusebentisana nebetindzaba: kungaba bemsakato, be-TV nebeliphephandzaba. Bengikutsandza kakhulu kufundza ngaloko. Bengingati kutsi lemfundvo beyitawuba lusito kangakanani esikhatsini lesitako, njengobe ngisetanicocela.

SIYA ESENEGAL

Ngemuva kwemalanga lambalwa siphotfulile, mine naMichael Höhle, lebengitawuba sitfunywa selivangeli naye, sahamba saya eSenegal, e-Africa. Ngaleso sikhatsi, bekunebamemeteli labangaba ngu-100 kulelive.

Ngemuva kwetinyanga letimbalwa ngenta lesabelo, ngacelwa kutsi ngisebente ehhovisini leligatja kanye ngeliviki. Lihhovisi leligatja belisekamelweni ekhaya letitfunywa telivangeli. Nanobe lelihhovisi leligatja belilincane kakhulu, Emmanuel Paterakis, lebekayinceku yeligatja, bekahlale angikhumbuta kutsi ngingacali ngikhohlwe kutsi leligatja limelele inhlangano yaJehova kulelive. Ngalelinye lilanga, uMzalwane Paterakis wancuma kutsi sibhalele titfunywa telivangeli incwadzi yekutikhutsata. Ngalawo malanga, bekute indlela lemelula nobe lengakaduli yekwenta emakhophi lamanyenti ususela encwadzini yinye, ngako bekudzingeka kutsi kubhalwe ngayinye ngayinye ngemshini weku-typer. Loyo bekungumsebenti lomnyenti, ikakhulukati njengobe bekungakafaneli wente ngisho nalelincane liphutsa!

Ngalelinye lilanga ntsambama nangilungiselela kubuyela ekhaya letitfunywa telivangeli, uMzalwane Paterakis wanginiketa imvilophu. Watsi: “David, iNhlangano ikubhalele nayi incwadzi.” Ngatsi nangiyivula, ngakhandza yinye yaletincwadzi lebengiyibhale ngisebentisa umshini weku-typer! Loko kwangifundzisa kutsi ngiyihloniphe inhlangano, ngingabuki kutsi isebentisa ligatja lelikhulu nobe lelincane.

Ngakha bungani nebamemeteli labanyenti ebandleni, futsi ngaboMgcibelo ntsambama bengivame kucitsa sikhatsi naleminye imindeni ebandleni. Leto bekutikhatsi letimnandzi! Nanyalo sisachumana. Ngetulu kwaloko, ngikhonile kusebentisa lwati lwami lwelulwimi lwesiFulentji nangivakashela lamanye emagatja.

Nga-1968, mine naLinda setsembisana umshado. Ngemuva kwetinyanga, ngetama kufuna umsebenti lengitawenta emalanga latsite ngeliviki kuze mine naLinda sitawuba ngemahlahlandlela eSenegal, kodvwa bacashi balapho bebalindzeleke kutsi bacashe kuphela bantfu bandzawo kunekucasha bantfu bekuhamba. Ngagcine ngibuyele eCanada, futsi sashada, sabelwa kutsi sibe ngemahlahlandlela lakhetsekile e-Edmundston, eNew Brunswick, lokulidolobha lelincane lelingaseQuebec.

KUBA NGEMAHLAHLANDLELA E-NEW BRUNSWICK NASEQUEBEC

Bekute bamemeteli kulelidolobha, futsi bebambalwa bantfu lebekudadishwa nabo liBhayibheli. Inkholo yebuKatolika beyilawula cishe konkhe kuphila kwebantfu. Cishe onkhe emakhaya bekaneluphawu lolutsi: Bangangeni BoFakazi BaJehova. Ngaleso sikhatsi, bekungagcizelelwa kangako kuhlonipha luphawu lolukanjalo, njengobe kwentiwa nyalo, ngako besiya kuwo onkhe emakhaya ngisho analoluphawu nobe ete. Njalo ngeliviki, inhlangano yemaKatolika beyifaka simemetelo ephephandzabeni lendzawo lesitsi: “Asitingeleni bonkhe BoFakazi BaJehova kube ngatsi sitingela batsakatsi.” Bebabane nje kuphela “batsakatsi” kulelidolobha, njengobe besibitwa kanjalo, lokunguVictor naVelda Norberg nami kanye naLinda, ngako bekusebaleni kutsi bekukhulunywa ngabobani!

Angiyukhohlwa ngesikhatsi umbonisi wesigodzi asivakashele kwekucala. Ngemuva kwekucitsa liviki natsi, watsi “Mhlawumbe lokunganisebentela kakhulu kwenta bantfu bashintje umbono wabo ngaBoFakazi BaJehova.” Kusukela lapho, loko sakwenta umgomo wetfu, futsi kwasebenta! Kancane kancane, bantfu bacala kuwubona umehluko emkhatsini waBoFakazi BaJehova labatfobekile kanye nebaholi belisontfo lemaKatolika labatigcabhako. Nyalo kunelibandla lelincane kulelidolobha.

Ngemuva kwekucitsa sikhatsi lesingangemnyaka sishumayela endzaweni lekhashane, sabese sabelwa ebandleni lelikhulu edolobheni laseQuebec. Sacitsa tinyanga letimnandzi letisitfupha kanye nebazalwane nabodzadze labanemoya wekungenisa tihambi kulelibandla ngaphambi kwekutsi sicelwe kutsi sente umsebenti wekujikeleta.

Iminyaka lengu-14 leyalandzela, sayicitsa sijikeleta esifundzeni saseQuebec. Leto bekutikhatsi letimnandzi kakhulu! Umsebenti wekushumayela eQuebec bewunemiphumela lemihle, futsi emabandleni lebesiwavakashela, bekuvamile kutsi emndenini umunye, kube nalabanyenti labatfutfukela ekubhajatisweni!

KUKHUMBULA LABO LABASEBENTE KAMATIMA

Kumelula kutsandza bazalwane nabodzadze baseCanada labakhuluma siFulentji. Abagegi guma, bahlala bajabulile futsi bahlala banemdlandla. Nobe kunjalo, bekungahlali kumelula kutsi balemukele liciniso, futsi kuphikiswa ngemalunga emndeni ngalesinye sikhatsi kuba matima kakhulu. Batali labangasibo boFakazi balabanye labasebasha bebavame kubakhetsisa batsi: “Yekela kufundza naBoFakazi BaJehova nobe uhambe lakhaya!” Bambalwa nangabe bakhona labenta loko lokufunwa ngulabatali. Kufutile kube Jehova utigcabha kakhulu ngabo!

Ngifuna kunicocela nangemahlahlandlela lavamile nalakhetsekile lebekashumayela eQuebec ngaleyo minyaka. Linyenti lawo belibuya kuletinye tindzawo taseCanada. Ngetulu nje kwekufundza lulwimi lwesiFulentji, bekufanele afundze lisiko lendzawo kanye nendlela bantfu labacabanga ngayo, ngalokuvamile lebeyilawulwa yinkholo yebuKatolika.

Emahlahlandlela lakhetsekile bekavame kwabelwa etindzaweni letikhashane letite bamemeteli. Ngenca yekutsi bantfu bendzawo ababatsandzi boFakazi, bekumatima kutfola indzawo yekuhlala futsi bekumatima kakhulu kutfola umsebenti longawenta emalanga latsite evikini. Ngisho nalabo labasandza kushada bebahlala babe ngu-4, babe ngu-6 nobe babe ngu-8 kuze basitane ekubhadaleni i-rent. Bebangeke bakhone kuhlala bodvwa ngenca yekutsi bekudulile. Lamahlahlandlela latinikele bekasebenta kamatima. Nakatfola lotsite lofuna kudadisha liBhayibheli, bekamsita ngenhlitiyo yawo yonkhe. Njengobe nyalo sekute sidzingo sekutsi bamemeteli labavela kuletinye tindzawo bayosita eQuebec, linyenti lalamahlahlandlela liye kuletinye tindzawo letinesidzingo lesikhulu.

Nasivakashela emabandla nasisenta umsebenti wekujikeleta, besivame kusebenta nebamemeteli labaseminyakeni yekutfomba ngaboMgcibelo ekuseni. Loku bekusisita sitati tinkinga lababhekana nato. Labanye babo nyalo batitfunywa telivangeli kulamanye emave nobe benta leminye imisebenti enhlanganweni.

Kulawo malanga, lamanye emabandla bekangakhoni kunakekela tidzingo tetfu, ngako ngaletinye tikhatsi bekutsi nakuyophela inyanga ibe seyiphelile imali. Etimeni letinjalo, besetsembela ngalokuphelele kuJehova, njengobe kunguye yedvwa lebekati timo tetfu. Akazange asidvumate ngisho nangalinye lilanga. Ngandlelatsite, besihlale sikhona kusuka kulelinye libandla siye kulelinye.

LENGAKUFUNDZA KUBAZALWANE LABETSEMBEKILE

Ngike ngasho ekucaleni kutsi yangisita kangakanani imfundvo lengayitfola eGileyadi lemayelana nebetindzaba. Ngalawo malanga eQuebec, besinematfuba lamanyenti ekushumayela emsakatweni, ku-TV nobe ephephandzabeni. Bengivame kwabelwa kutsi ngisebente naLéonce Crépeault, naye lebekangumbonisi lojikeletako lebekanelikhono lekusebenta nebantfu betindzaba. Nakakhuluma nemuntfu lobalulekile losebenta etindzabeni, kunekutsi atente abonakela ngatsi ungumuntfu lowatiko, bekavame kutsi: “Mnumzane, mine nemngani wami siyashumayela. Kute lokunganani lesikwatiko ngekukhuluma ku-TV nasemsakatweni. Kodvwa sicelwe kutsi sitjele bantfu mayelana nemhlangano lomkhulu waBoFakazi BaJehova lotawuba khona. Singajabula nganobe nguluphi lusito longasinika lona.” Lendlela lekhombisa kutfobeka beyisivulela ematfuba lamanyenti lebekangeke asivulekele kube besingayisebentisi.

Ngekuhamba kwesikhatsi, ligatja langicela kutsi ngisebente neMzalwane Glen How lebekangummeli, etindzabeni letimatima lebetingakhanga betindzaba. Kwangisita kakhulu loko lengakufundza eGileyadi kanye nelwati lengalutfola kuLéonce. Kwaba sibusiso nekusebenta neMzalwane How. Bekangesabi nakasebenta tindzaba letiphatselene nemtsetfo, kodvwa lokubaluleke kakhulu kutsi bekayindvodza leyesaba Nkulunkulu. Bekamtsandza ngalokujulile Jehova.

Nga-1985, sabelwa kutsi siyojikeleta esigodzini lesiseceleni kwalapho babe bekahlala khona enshonalanga yeCanada, lokwasenta sakhona kumnakekela. Washona ngemuva kwetinyanga letintsatfu. Sachubeka sijikeleta etigodzini letisenshonalanga yeCanada kwaze kwaba ngu-1989, futsi samangala nasicelwa kutsi siyoba ngemalunga emndeni waseBethel eMelika. Loko bekusho kuyekela umsebenti wekujikeleta lebesesiwente iminyaka lengaba ngu-19. Kuyo yonkhe leyo minyaka, sihleti emakhaya ebazalwane nabodzadze labanyenti futsi sadla nebazalwane betfu nabodzadze labanyenti. Sibonga kakhulu kubo bonkhe labavule emakhaya abo nakubo bonkhe labasimemile kuze sidle nabo!

SITFUTSELA EMELIKA

Nasifika eBrooklyn, ngabelwa kutsi ngisebente eKomidini Yemsebenti. Ngitawuhlale ngibonga ngekuceceshwa lengakutfola lapho. Lesinye setifundvo lengasifundza kutsi akukafaneli ngicabange kutsi ngiyayati indzaba letsite ngibe ngingakawatfoli onkhe emaciniso ayo. Nga-1998, ngabelwa kutsi ngisebente eKomidini Yekubhala, lapho ngisasebenta khona nanyalo, futsi solo ngisafundza kubhala. Kwaphela iminyaka letsite ngisita uMzalwane John Barr, lebekangumchumanisi weKomidi Yekubhala. Kutawuhlale kubalulekile kimi kuceceshwa lengakutfola kuye kanye nesikhatsi lengasicitsa naye. Bekanebuntfu lobuhle bebuKhristu.

Kungijabulise kakhulu kusebenta nebazalwane nabodzadze labasebenta eKomidini Yekubhala. Bahlala bathantaza kuJehova bamcele abasite nabenta umsebenti wabo, futsi bati kahle kutsi nobe yini lenhle labayifezako kungenca yemoya waJehova, hhayi ngenca yemakhono abo langekwemvelo.

Kuphindze kwangijabulisa kakhulu mine naLinda kuvakashela bazalwane nabodzadze labetsembekile emaveni langu-110. Sitibonele ngewetfu lutsandvo letinalo titfunywa telivangeli, emalunga emaKomidi Emagatja kanye nalabo labenta umsebenti wasikhatsi sonkhe. Kube sibusiso kubona umdlandla kanye nekwetsembeka kwalabamemeteli labakulamave labakhonta Jehova ngisho nobe kunetimphi, tinkinga temnotfo futsi baphatfwa kabi. Kufutile kube Jehova ubatsandza kakhulu!

Kuyo yonkhe leminyaka, Linda ungisite kakhulu nangisetama kwenta imisebenti yami. Uyabatsandza bantfu, futsi uhlale afuna tindlela langabasita ngato. Uphindze abe nelikhono lekucalisa tincociswano. Ukhonile nekusita bantfu kutsi balitsandze liciniso, lokufaka ekhatsi labanye balabo lebesebaphelelwe ngumdlandla ekukhonteni Nkulunkulu. Usipho mbamba lesivela kuJehova! Njengobe sesikhulile, mine naLinda sijabula kakhulu ngendlela bazalwane nabodzadze labasebasha labasisita ngayo ngetindlela letehlukahlukene.​—Mak. 10:29, 30.

Nangibuka emuva kuleminyaka lengu-80, ngibonga kakhulu. Ngiyavumelana nemavi emhlabeleli lowabhala watsi: “Awu Nkulunkulu, wena ungifundzise kusukela ngisesemusha, futsi nanyalo ngisayimemetela imisebenti yakho lemihle.” (Hla. 71:17) Nguloko kanye lengifuna kuchubeka ngikwenta yingci nje nangisaphila.