Usakhumbula Yini?

Utifundze ngekucophelela yini tihloko letiku-Sicongosekulindza salomnyaka? Buka kutsi ungakhona yini kuphendvula lemibuto lelandzelako:

Yini lesikhutsata kutsi sinikete Jehova ludvumo?

Loko sikwenta ngobe simhlonipha ngalokujulile Jehova futsi simtsandza kakhulu. Siphindze simdvumise ngobe sifuna labanye bantfu bamati.​—w25.01, likh. 3.

Nangabe lomunye asiphatsa kabi, yini lengasisita kutsi simcolele?

Asiveli nje singayinaki indlela lesitiva ngayo; nobe kunjalo, kuyekela kutfukutsela kungasisita kutsi singalinyatwa buhlungu.​—w25.02, emakh. 15-16.

Yini leyenta umfundzi Makho abe sibonelo lesihle kubazalwane labasebasha?

Makho wasemukela ngekutitsandzela sabelo sekusita labanye. Ngisho nobe kungenteka weva buhlungu futsi wadvumateka ngenca yesimo lesitsite, akazange aphonse lithawula. Wakha bungani naPawula nalamanye emaKhristu lavutsiwe.​—w25.04, likh. 27.

Bekasho kutsini Jesu nakathantaza atsi: “Ngibafundzisile ngelibito lakho”? (Joh. 17:26)

Bafundzi baJesu besebavele balati libito laNkulunkulu. Kodvwa Jesu wabenta bati loMuntfu lomelelwa ngulelibito, lokufaka ekhatsi tinjongo takhe, loko lakwentako kanye nebuntfu bakhe.​—w25.05, emakh. 20-21.

Nangabe sitfobekile, yini lesitayivuma?

Siyavuma kutsi kunetintfo lesingatati. Sibonelo nje, asati kutsi kuphela kutawufika nini nobe kutsi yini Jehova lokungenteka ayente ngaleso sikhatsi. Asati nekutsi yini letawenteka kusasa nobe kutsi Jehova usati kahle kanganani.​—w25.06, emakh. 15-18.

Yini lengasisita kutsi sizuze esihlokweni lesitsite nobe enkhulumeni yelinyenti?

Singatibuta: ‘Ngubuphi bufakazi lobusetjentisiwe lobusita tilaleli kutsi tikwetsembe loko lokukhulunywa ngako? Ukhona yini umfanekiso lotsintsa inhlitiyo lengingawusebentisa nangifundzisa? Ngubani longatsandza kufundza ngalesihloko?’​—w25.07, likh. 19.

Yini lesingayifundza ngekucolela kwaNkulunkulu nasibuka indlela laphatsa ngayo Davide?

Nanobe Davide enta tono letinkhulu, ngesikhatsi aphendvuka mbamba, Jehova wamcolela. (1 Khos. 9:4, 5) Nkulunkulu nasekacolele, akabambeleli ephutseni lowalenta nobe aphindze akukhumbute ngalo esikhatsini lesitako.​—w25.08, likh. 17.

Nangabe kulukhuni kutsi umfundzi acondze liphuzu, yini longayenta?

Nangabe kumatima kutsi atfole liphuzu ngisho nobe sewetamile kumfundzisa kahle usebentisa liBhayibheli, lendlule futsi uhlele kuphindze nibuye kulo ngemuva kwesikhatsi.​—w25.09, likh. 24.

LiBhayibheli litsi sono ‘siyayengana.’ (Heb. 3:13) Kanjani?

Sono singasibangela kutsi sente tintfo letimbi. Singaphindze sisente kutsi sihlale singabata, njengekutsi Nkulunkulu uyasitsandza yini vele.​—w25.10, likh. 16.

Ngutiphi tintfo letintsatfu lesingatenta kuze sithantaze ngendlela letawusenta sisondzelane naJehova?

(1) Singacabanga ngebuntfu baJehova. (2) Singacabanga ngesimo lesibhekene naso futsi sisithantazele, njengalapho kufanele sicolele lotsite. (3) Singatinika sikhatsi nasithantaza. Loko kungasisita kutsi sikhiphe lokusekujuleni kwetinhlitiyo tetfu.​—w25.10, emakh. 19-20.

Singabasita njani lasebakhulile?

Singabavakashela labo lasebakhulile nobe sibashayele lucingo. Singabaphekeletela esibhedlela. Nobe singashumayela nabo sisebentisa tindlela letehlukahlukene.​—w25.11, emakh. 6-7.

Ngutiphi tintfo letibalulekile lokufanele tinakwe emshadweni lohloniphekile wemaKhristu?

Hlonipha imitsetfo yahulumende lehambisana nemshado. Ciniseka kutsi titselo temoya waNkulunkulu tiyabonakala kuwo wonkhe lomshado, ngisho nasendzaweni yelidzili. Gcoka ngendlela lezitsile, futsi uciniseke kutsi awenti emasiko langahambisani nemiBhalo. Khulumisanani kahle nanisalungiselela lomshado.​—w25.12, emakh. 21-24.