KUCHAZWA KWEMAVESI LASEBHAYIBHELINI
Jeremiya 29:11—“Ngiyawati Emasu Lenginawo Ngani”
“Jehova,a utsi, ‘ngikwati kahle loko lengitanentela kona, ngitanenta nibe nekuthula, ningehlelwa yinhlekelele, kuze nibe nelikusasa lelihle kanye nelitsemba.’”—Jeremiya 29:11, Lihumusho Lemhlaba Lomusha.
“‘Ngobe ngiyawati emasu lenginawo ngani, yebo, emasu ekuniphumelelisa, hhayi ekunilimata, emasu ekuninika litsemba nelikusasa.’”—Jeremiya 29:11, LiBhayibheli LesiSwati Lelivamile.
Loko lokushiwo nguJeremiya 29:11
Jehova Nkulunkulu wetsembisa kuniketa tikhonti takhe likusasa lelinekuthula. Ngisho nobe lamavi bekabhalelwe bantfu basendvulo, kodvwa asasebenta nalamuhla. ‘UnguNkulunkulu lonikana litsemba.’ (KubaseRoma 15:13) Ecinisweni, wabhala letetsembiso eBhayibhelini kuze ‘sitawuba nelitsemba” ngelikusasa lelihle.—KubaseRoma 15:4.
Loko Jeremiya 29:11 lakhuluma ngako
Lamavi ayincenye yemavi lebewabhalelwe ema-Israyeli latfunjwa eJerusalema,b ayiswa eBhabhulona. (Jeremiya 29:1) Nkulunkulu watjela lama-Israyeli lebekatfunjiwe kutsi bekatawutfunjwa sikhatsi lesidze, ngako bekufanele akhe emakhaya, alime tingadze futsi abe nemindeni. (Jeremiya 29:4-9) Nobe kunjalo, Nkulunkulu waphindze watsi: “Itawutsi ingaphela iminyaka lengu-70 niseBhabhulona, ngitawubese ngiyanikhumbula, futsi ngitasifeza setsembiso sami nginibuyise kulendzawo [eJerusalema].” (Jeremiya 29:10) Ngako, Nkulunkulu wawacinisekisa kutsi angeke aze awakhohlwe futsi atawubuyela ekhaya, eJerusalema.—Jeremiya 31:16, 17.
Nkulunkulu wasifeza setsembiso sakhe lebekasente kuma-Israyeli. IBhabhulona yancotjwa nguKhuresi, iNkhosi yesePheresiya, njengobe bekuphrofethiwe. (Isaya 45:1, 2; Jeremiya 51:30-32) Ngemuva kwaloko, Khuresi wavumela emaJuda kutsi abuyele ekhaya. Ngemuva kweminyaka lengu-70 atfunjiwe, ema-Israyeli aphindze abuyela eJerusalema.—2 Tikhronike 36:20-23; Ezra 3:1.
Kugcwaliseka kwalesetsembiso lesikuJeremiya 29:11 kuyabacinisekisa labo lababuke phambili ekugcwalisekeni kwetetsembiso taNkulunkulu lamuhla. Letetsembiso tifaka ekhatsi kuthula lokutawubakhona emhlabeni wonkhe lokutawuletfwa nguMbuso waNkulunkulu, iNkhosi yawo lokunguJesu Khristu.—Tihlabelelo 37:10, 11, 29; Isaya 55:11; Matewu 6:10.
Lokungesilo Liciniso NgaJeremiya 29:11
Lokungesilo liciniso: Kunalokutsite Nkulunkulu lakuhlelele umuntfu ngamunye.
Lokuliciniso: Nkulunkulu uvumele bantfu kutsi batikhetsele indlela labatawuphila ngayo. Emavi akhe lakuJeremiya 29:11 bewabhalelwe licembu lema-Israyeli lebekaseBhabhulona, futsi Nkulunkulu bekafuna kutsi lelicembu libe nekuthula esikhatsini lesitako. (Jeremiya 29:4) Nobe kunjalo, Nkulunkulu wavumela umuntfu ngamunye kutsi atikhetsele kutsi uyafuna yini kuzuza kuletetsembiso takhe nobe cha. (Dutheronomi 30:19, 20; Jeremiya 29:32) Labo labakhetsa kufuna Nkulunkulu, benta loko ngekutsi bathantaze kuye ngalokusuka enhlitiyweni.—Jeremiya 29:12, 13.
Lokungesilo liciniso: Nkulunkulu utawubusisa tikhonti takhe ngebunjinga.
Lokuliciniso: Ligama lelitsi ‘kuphumelelisa’ lelikuJeremiya 29:11 kulamanye emaBhayibheli, litsatselwe egameni lesiHebheru lelisho “kuthula, kanye nemphilo lenhle.” Ngekwaloko lombhalo lokhuluma ngako, Nkulunkulu wetsembisa ema-Israyeli lebekatfunjiwe kuthula nenhlalakahle, hhayi bunjinga. Lesive besitawuchubeka sikhona kuze kube ngulapho sibuyela eJerusalema.—Jeremiya 29:4-10.
Fundza Jeremiya sehluko 29 kanye nema-explanatory footnotes nemavesi lahambisana nalelovesi (cross-references).
a Jehova ligama laNkulunkulu.—Tihlabelelo 83:18.
b Nayikhuluma ngaJeremiya 29:11, I-The Expositor’s Bible Commentary itsi: “Lesetsembiso lesikulelivesi ngulesihle kakhulu lesingasitfola emiBhalweni, lesiveta sihawu Yahweh [Jehova] lasikhombisa ema-Israyeli lebekatfunjiwe, futsi sawaniketa sizatfu sekuba nelitsemba.”—Volume 7, likhasi 360.