BANTFU LABASHA BAYABUTA
Ngingasisebentisa Njani Kahle Sikhatsi Sami?
Kungani kufanele uhlele indlela longasebentisa ngayo sikhatsi sakho?
Sikhatsi sifana nemali. Nawusisebentisa kabi angeke ube naso nase usidzinga. Nawuhlela indlela losisebentisa ngayo sikhatsi, utawuba naso lotasisebentisela kwenta tintfo letikujabulisako!
Simiso seliBhayibheli: “Livila linetifiso letinyenti, kodvwa lihlale lingenalutfo, kepha umuntfu lokhutsele utawuba netintfo letinyenti.”—Taga 13:4.
Lesikufundzako: Kuhlela sikhatsi sakho kutakuniketa inkhululeko leyengetiwe.
Kukwati kusebentisa kahle sikhatsi kulikhono lelibalulekile lelitakusita ngisho sewumdzala. Kungakusita kutsi ungacoshwa emsebentini. Liciniso likutsi, kube bewunelibhizinisi, bewungasicosha sisebenti lesingefiki ngesikhatsi emsebentini.
Simiso seliBhayibheli: “Umuntfu lowetsembekile kulokuncane wetsembekile nakulokukhulu.”—Lukha 16:10.
Lesikufundzako: Kukwati kusebentisa kahle sikhatsi kuveta kutsi uluhlobo luni lwemuntfu.
Kuyavunywa, kukwati kusebentisa kahle sikhatsi kumatima. Cabanga nganati tintfo letimbalwa letingakwenta ungasisebentisi kahle sikhatsi.
Sitsiyo #1: Bangani
“Bangani bami nabangicela kutsi sihambe siyoshaywa ngumoya, ngiyaya ngisho nobe ngite sikhatsi. Ngiyaye ngitsi, ‘Ngitakwenta masinyane loko lekufanele ngikwente nangifika ekhaya.’ Akungisebenteli ngasosonkhe sikhatsi, ngalesinye sikhatsi tintfo tiyamosheka.”—Cynthia.
Sitsiyo #2: Tiphazamiso
“I-TV ifana ne-vacuum cleaner. Inetinhlelo nema-movie lakudvonsako utikhandze ungasakhoni kwenta lutfo.”—Ivy.
“Ngicitsa sikhatsi lesinyenti ngisebentisa i-tablet. Ngitiva nginelicali nangitawuyekeliswa kutsi sekuphele i-battery.”—Marie.
Sitsiyo #3: Kuhlehlisa sikhatsi
“Ngiyasihlehlisa sikhatsi sekwenta umsebenti wami wesikolwa kanye naletinye tintfo lokufanele ngitente. Ngimosha sikhatsi sami ngenta tintfo letingenamsebenti kuze kube ngulapho lomsebenti wesikolwa sewufuneka—Leyo akusiyo indlela lekahle yekusebentisa sikhatsi.”—Beth.
Kuhlela sikhatsi sakho kutakuniketa inkhululeko leyengetiwe
Loko longakwenta
Bhala phansi tintfo lokufanele utente. Kungaba yimisebenti yasekhaya nobe umsebenti wesikolwa. Bhala phansi kutsi udzinga sikhatsi lesinganani kuze ucedze umsebenti ngamunye ngeliviki.
Simiso seliBhayibheli: “Khona nitociniseka ngetintfo letibaluleke kakhulu.”—KubaseFiliphi 1:10.
Bhala phansi tintfo lotsandza kutenta ngesikhatsi sakho. Loku kungafaka ekhatsi kuphuma nebangani kanye nekubukela i-TV. Nalana, bhala phansi ema-awa lotawacitsa entfweni ngayinye ngeliviki.
Simiso seliBhayibheli: “Chubekani nihamba ngekuhlakanipha . . . , nisisebentise kahle nesikhatsi senu.”—KubaseKholose 4:5.
Yakha luhlelo. Buyela kuloluhla lolwentile. Utinike sikhatsi lesenele yini sekwenta tintfo letibalulekile? Udzinga kunciphisa sikhatsi sekwenta tintfo tekutijabulisa yini?
Longakwenta: Yenta luhla lwetintfo lokufanele utente ngelilanga bese ucima loko lesewukwentile.
Simiso seliBhayibheli: “Tinhloso talabakhutsele tibenta baphumelele.”—Taga 21:5.
Kwente loko lokubhalile. Kuliciniso kutsi kungahle kudzingeke ungayi lapho umenywe khona kuze nje wente tintfo letibalulekile. Nawenta njalo utawuba nesikhatsi lesinyenti sekwenta tintfo lotitsandzako futsi utasijabulela kakhulu.
Simiso seliBhayibheli: “Khutsalani, ningahudvuli tinyawo emsebentini wenu.”—KubaseRoma 12:11, umbhalo longentasi.
Tinike umvuzo—kodvwa ungasheshi. Wesifazane losemusha lokutsiwa ngu-Tara utsi, “Ngalesinye sikhatsi, ngenta tintfo letimbili letikuloluhla lwetintfo lokufanele ngitente. Ngibese ngiyacabanga ngitsi, ‘OK, ngingabukela i-TV imizuzu lengu-15 ngitawubese ngiyachubeka nemsebenti wami.’ Imizuzu lengu-15 igcine ingulengu-30, futsi lengu-30 ibe li-awa, kutsi ngingakagadzi ngitikhandze sengibukele i-TV ema-awa lamabili!”
Liyini likhambi? Yenta kutijabulisa kube ngumvuzo lotinika wona wekucedza imisebenti yakho hhayi njengentfo lokufanele yenteke onkhe malanga.
Simiso seliBhayibheli: “Kute lokuncono lokwendlula kutsi umuntfu adle . . . ajabule ngalakusebentele kamatima.”—Umshumayeli 2:24.