Bangakhi BoFakazi BaJehova Labakhona Emhlabeni Wonkhe?

Libalwa njani linani laBoFakazi BaJehova?

Labo lababalwa njengaBoFakazi BaJehova ngulabo labashumayela tindzaba letimnandzi teMbuso waNkulunkulu njalo ngenyanga. (Matewu 24:14) Bafaka ekhatsi boFakazi lababhajatisiwe kanye nalabo labashumayela njalo kodvwa labasengakabhajatiswa.

Umuntfu kufanele anikele ngemali yini kuze abe nguFakazi?

Cha. Kuba nguFakazi nobe kwenta imisebenti letsite enhlanganweni yetfu akuyi ngemnikelo umuntfu lawentako. (Imisebenti 8:18-20) Ecinisweni, iminikelo leminyenti akwatiwa kutsi ivela kubani. Fakazi ngamunye usebentisa sikhatsi sakhe, emandla akhe kanye netintfo lanato kuze anikelele umsebenti lesiwenta emhlabeni wonkhe, kuye ngesifiso kanye netimo takhe.​—2 KubaseKhorinte 9:7.

Nati njani kutsi bangakhi boFakazi labashumayela njalo?

Njalo ngenyanga, boFakazi babika ebandleni labakulo sikhatsi labasicitse bashumayela. Lombiko bawenta ngekutitsandzela.

Emabandla abhala phansi lemibiko bese kutsi tingcikitsi tayo titfunyelwe ehhovisini leligatja lakuleyondzawo. Ligatja libese litfumela letingcikitsi telive ngalinye endlunkhulu yetfu yemhlabawonkhe.

Linani laboFakazi eveni ngalinye livela njalo ekupheleni kwemnyaka wemsebenti ngamunyea. Lamanani ayahlanganiswa kuze kutfolakale linani laboFakazi labakhona emhlabeni wonkhe. Imibiko lenemininingwane leyengetiwe yelive ngalinye itfolakala encenyeni letsi “Emhlabeni Wonkhe” leku-website yetfu. Lemibiko iyasikhutsata njengobe, imibiko lefana nalena yawakhutsata nemaKhristu ekucala.​—Imisebenti 2:41; 4:4; 15:3.

Niyababala yini labo labatihlanganisa nenhlangano yenu kodvwa labangashumayeli?

Ngisho nobe labo labangashumayeli singababali njengaboFakazi, siyabemukela emihlanganweni yetfu. Labanyenti babo baba khona eSikhumbutweni sekufa kwaKhristu lesiba khona njalo ngemnyaka. Ngako linani lalabangasibo boFakazi kodvwa labatihlanganisa nenhlangano yetfu litfolakala ngekutsi sikhiphe linani laboFakazi enanini lalabo lababakhona eSikhumbutweni saminyaka yonkhe. Nga-2025, lebebakhona eSikhumbutweni bebangu-20 635 015.

Bantfu labanyenti labangeti emihlanganweni yetfu bayazuza ngekudadisha liBhayibheli natsi mahhala. Nga-2025, sadadisha liBhayibheli nebantfu labangabangu-7 603 182 njalo ngenyanga, labanye besidadisha nabo njengelicembu.

Kwentiwa yini kutsi linani laboFakazi lelikhishwa nguhulumende lehluke kulelikhishwa ngini?

Emanani lakhishwa nguhulumende atfolakala ngekutsi babute bantfu kutsi bakuyiphi inkholo. Sibonelo nje, i-U.S. Census Bureau itsi eluhlolweni lwayo “beyifuna kutfola linani lebantfu labatsi bayakholwa.” Ichubeka itsi imiphumela yaloluhlolo “ayikuveti ngalokucondzile kutsi labantfu bakuleyonkholo ngalokuphelele yini.” Ngalokwehlukile, tsine sibala labo labashumayela labanye futsi babike sikhatsi labasicitse bashumayela, njengaboFakazi, hhayi labo labamane nje batibite ngekutsi baboFakazi.