Litsini LiBhayibheli Ngenkhululeko Yekutikhetsela? NguNkulunkulu Yini Lolawula Likusasa Lakho?
Lokushiwo liBhayibheli
Nkulunkulu usiphe inkhululeko yekutikhetsela, lokulilungelo lekutentela tincumo kunekutsi kube nguNkulunkulu nobe lokutsite lokusincumela kusengaphambili loko lotokwenteka. Naka loko liBhayibheli lelikufundzisako.
Nkulunkulu wadala bantfu ngemfanekiso wakhe. (Genesisi 1:26) Ngalokwehlukile etilwaneni tona letenta tintfo ngendlela letidalwe ngayo, tsine sifute uMdali wetfu endleleni lesikhombisa ngayo buntfu lobufana nelutsandvo kanye nekulunga. Ngetulu kwaloko, siphindze sibe nenkhululeko yekutikhetsela njengeMdali wetfu.
Ngekwelizinga lelitsite, singakhetsa kutsi likusasa letfu litobanjani. LiBhayibheli lisikhutsata kutsi, ‘sibokhetsa kuphila silalele livi lakhe,’ lokusho kukhetsa kulalela imitsetfo yaNkulunkulu. (Dutheronomi 30:19, 20) Lesikhutsato besingeke sisho lutfo futsi ngabe siveta lunya kube bantfu bebete inkhululeko yekutikhetsela. Kunekutsi asiphocelele kutsi sente loko lakushoko, Nkulunkulu usicela ngemusa utsi: “Kube mane bewungayilalela imiyalo yami! Kuthula kwakho bekutawufana nemfula.”—Isaya 48:18.
Kuphumelela nobe kungaphumeleli kwetfu akuyi ngekutsi sancunyelwa kusengaphambili loko lokutakwenteka ekuphileni kwetfu. Nangabe sifuna kuphumelela kunobe ngabe yini lesiyentako kufanele sisebente kamatima. LiBhayibheli litsi, “Nobe yini lokhona kuyenta, yente ngawo onkhe emandla akho.”(Umshumayeli 9:10) Liphindze litsi: “Tinhloso talabakhutsele tibenta baphumelele.”—Taga 21:5.
Inkhululeko yekutikhetsela isipho lesiligugu lesivela kuNkulunkulu ngoba isenta sitsandze Nkulunkulu ‘ngayo yonkhe inhlitiyo yetfu,’ futsi simtsandze ngobe siyafuna.—Matewu 22:37.
Akusuye yini Nkulunkulu lolawula tonkhe tintfo?
LiBhayibheli liveta kutsi Nkulunkulu unguSomandla, lokusho kutsi unemandla lamakhulu kakhulu langeke alawulwe ngumuntfu. (Jobe 37:23; Isaya 40:26) Nanobe kunjalo, akawasebentisi emandla akhe kuze alawule yonkhe intfo. Sibonelo nje, liBhayibheli litsi Nkulunkulu ‘watibamba’ ngalokumelene neBhabhulona yasendvulo lebeyisitsa sebantfu bakhe. (Isaya 42:14) Ngendlela lefanako, nalamuhla Nkulunkulu uyababeketelela labo labasebentisa kabi inkhululeko yabo yekutikhetsela ngekutsi balimate labanye. Nobe kunjalo, Nkulunkulu angeke ababeketelele kuze kube phakadze.—Tihlabelelo 37:10, 11.