Imetamo Leyentiwako Kuze Kube Nekuthula Ingakuletsa Yini Vele Kuthula Emhlabeni?
Sekuhlale kunetimphi kanye netiphitsiphitsi letihambisana nebudlova emhlabeni. Ngenca yaloko, Mhlabuhlangene kanye naletinye tinhlangano benta imetamo yekuletsa kuthulaa ngekutsi babe khona kuletindzawo letinetiphitsiphitsi. Injongo yabo kuletsa kuthula kuleto tindzawo. Mabhalane Jikelele waMhlabuhlangene António Guterres utsi, “tinhlangano letisetjentiswa nguMhlabuhlangene kuze agcine kuthula, tingumgogodla walomgomo wetfu wekuletsa kuthula emhlabeni.”
Ike yaphumelela lemetamo yekuletsa kuthula leyentiwa nguletinhlangano. Sibonelo nje, tikhonile kuvikela bantfu labangenacala, tabuyisela babaleki emaveni abo, tasita ngetintfo letidzingwa bantfu, futsi takha kabusha takhiwo letibhidlikile. Nobe kunjalo, labo labetama kuletsa kuthula badibana netinkinga letenta kutsi lemetamo yabo ingaphumeleli. Siyoke sibe khona yini sisombululo lesihlala njalo lesiyokwenta kutsi kube nekuthula mbamba emhlabeni? LiBhayibheli linatiphi timphendvulo?
Tinkinga tekuletsa kuthula kanye nesisombululo lesiseBhayibhelini
Inkinga: kungabambisani. Akusimelula kutsi emabutfo emphi kanye netinhlangano tebantfu letivela emaveni lahlukahlukene kutsi tisebente ngekubambisana. Ngaletinye tikhatsi, kuba matima ngaletinhlangano kutsi tisebentisane ngenca yekungevani kanye nemibono lengafani.
Sisombululo lesiseBhayibhelini: “Nkulunkulu welizulu utawubeka umbuso. . . Utawupitjita yonkhe lemibuso [bohulumende bebantfu] uyicedze futsi ngiwo wodvwa lotawuma kuze kube phakadze.”—Danyela 2:44.
Madvutane, Nkulunkulu utawucedza timphi futsi aletse kuthula emhlabeni wonkhe. (Tihlabelelo 46:8, 9) Utawumisa hulumende lotawutsatsa sikhundla sabobonkhe bohulumende labakhona emhlabeni, lokunguMbuso waNkulunkulu. Nasekubusa hulumende wasezulwini emhlabeni, ngeke kusaba netiphitsiphitsi futsi ngeke kusaba nesidzingo setinhlangano tebantfu tekwakha kuthula.
Inkinga: kubabete imali leyenele kanye nekulinganiselwa kwaloko labangakwenta. Umsebenti wekwakha kuthula awukavami kusekelwa bantfu labanyenti, kuba nemali leyanele nobe letinye tintfo letidzingekako lokwenta kutsi ungaphumeleli. Ngaletinye tikhatsi letisebenti taletinhlangano kudzingeka tisebentele etindzaweni letiyingoti.
Sisombululo lesiseBhayibheli: ‘Nkulunkulu weNkhosi yetfu Jesu Khristu . . . wahlalisa [Jesu] ngesekudla sakhe ezulwini ngetulu kwabo bonkhe bohulumende, emagunya, emandla.’—Kubase-Efesu 1:17, 20, 21.
Nkulunkulu longuSomandla, Jehova,b unikete Jesu konkhe lakudzingako njengobe ayiNkhosi yeMbuso waNkulunkulu. (Danyela 7:13, 14c) Nkulunkulu unikete Jesu emandla lamakhulu, lwati, kuhlakanipha kanye nekucondza lokukwendlula khashane kwanobe ngumuphi hulumende webantfu nobe inhlangano. (Isaya 11:2) Jesu uphindze abe nelibutfo letingelosi letinemandla letimsekelako. (Sembulo 19:14) Kute simo lesingaba yingoti kuye nobe simehlule.
Jesu utawusebentisa loko Nkulunkulu lamnikete kona kuze asuse tiphitsiphitsi, aletse bunye lobutawuhlala phakadze, kulondzeka kanye nekuthula kubobonkhe labatawube babuswa nguMbuso waNkulunkulu.—Isaya 32:17, 18.
Inkinga: kuvinjelwa ngumtsetfo. Ngaletinye tikhatsi tisebenti tetinhlangano letetama kugcina kuthula atikhoni kwenta loko lokudzingeka tikwente ngenca yekungatfoli ticondziso leticacile taloko latingakwenta nalokungakafaneli tikwente nangenca yekuvinjelwa ngumtsetfo. Loko kwenta kutsi tingakhoni kuvikela labanye bantfu nobe kufeza imigomo yato.
Sisombululo lesiseBhayibhelini: ‘[Jesu] unikwe lonkhe ligunya ezulwini nasemhlabeni.’—Matewu 28:18.
Nkulunkulu unikete Jesu ligunya kanye neticondziso leticacile kuze aletse kuthula emhlabeni. (Johane 5:22) Jesu ngeke ente ngekungalungi nobe ente ngekukhohlakala. (Isaya 11:3-5) Kungako liBhayibheli libita Jesu ngekutsi “Sikhulu Sekuthula,” uMbuso waso losekelwe ekwenteni “ngekulunga nangebucotfo.”—Isaya 9:6, 7.
UMbuso waNkulunkulu utawuletsa kuthula sibili
Tinhlangano tebantfu letetama kuletsa kuthula tikhonile kukwenta loko ngelizinga lelitsite etindzaweni letitsite. Nobe kunjalo, atikhoni kucedza umsuka webudlova, lokuyinzondo lesetinhlitiyweni tebantfu labanyenti.
Dennis Jett, lobekamelele live laseMelika kulelinye live utsi, “kute kwakona lokuthula lokutawulondvolotwa.”
Ngalokwehlukile, uMbuso waNkulunkulu utawuletsa kuthula sibili ngobe utawusita bantfu kutsi basuse lenzondo lesetinhlitiyweni tabo. Sibonelo nje, naka kutsi ngesikhatsi Jesu alamhlabeni wafundzisa balandzeli bakhe ngemavi nangetento indlela yekwakha kuthula nalabanye kanye nekutsi bangabakhombisa njani kutsi bayabatsandza:
Jesu waphindze watsi labo lababuswa nguMbuso waNkulunkulu batawubonakala ngelutsandvo. LiBhayibheli likuveta ngalokucacile kutsi nasekubusa uMbuso waNkulunkulu angeke kube nebantfu labatondza labanye:
Jehova, Nkulunkulu lowadala bantfu uyayati indlela lengiyo nalekukuphela kwayo yekuletsa kuthula emhlabeni. UMbuso wakhe utawuphumelela lapho imetamo yebantfu yekuletsa kuthula yehluleke khona.
a Mhlabuhlangene kanye naletinye tinhlangano baphindze basebentise emagama latsi, “kwakha kuthula,” “kugcina kuthula,” “kusekela kuthula,” kanye “nemisebenti yekwakha kuthula.”
b Jehova ligama laNkulunkulu. (Tihlabelelo 83:18) Fundza sihloko lesitsi, “Ungubani Jehova?”
c KuDanyela 7:13, 14, ligama lelitsi ‘indvodzana yemuntfu’ libhekisela kuJesu Khristu.—Matewu 25:31; 26:63, 64.