Kukhatsateka Kwebantfu Emhlabeni Wonkhe Ngendlela Bantfu Labasha Labasebentisa Ngayo Tinkhundla Tekuchumana

Kulomnyaka wa-2025 emhlabeni wonkhe bohulumende bavete kukhatsateka kwabo ngendlela bantfu labasha labasebentisa ngayo tinkhundla tekuchumana. Lelinye live selikhiphe umtsetfo wekutsi bantfwana labangephansi kweminyaka lengu-16 bangatisebentisi tinkhundla tekuchumana futsi nalamanye emave acabanga kwenta intfo lefanako.

Lokumangalisako kutsi labanye bantfu labasha bayatibona tingoti tekungena etinkhundleni tekuchumana. Lucwaningo lolukhishwe nga April 2025 lolwentiwe yi-Pew Research Center, eMelika lwaveta kutsi, “cishe emaphesenti langu-48 ebantfu labasha, batsi kusebentisa [letinkhundla tekuchumana] kuba nemiphumela lemibi kubantfu labangangabo.”

Tati tetemphilo tecwayise ngendlela tinkhundla tekuchumana letilimata ngayo ingcondvo yebantfu labasha. Emnyakeni lophelile, Dr. Vivek Murthy, lebekangu-surgeon general waseMelika, watsi: “Kulimala kwengcondvo yebantfu labasha kuyindzaba lokumele isukunyelwe etulu futsi tinkhundla tekuchumana tiyimbangela lehamba embili.”

Batali bangabavikela njani bantfwana babo etingotini letibangwa tinkhundla tekuchumana? LiBhayibheli liniketa seluleko labangasisebentisa.

Lokungentiwa batali

Cabanga nganaku lokushiwo liBhayibheli.

“Lohlakaniphile uyacabangisisa ngako konkhe lakwentako.”—Taga 14:15.

Ngenca yekutsi tekuchumana tingamlimata umntfwana wakho, awukaphoceleleki kutsi umvumele atisebentise. Ngaphambi kwekuvumela umntfwana wakho kutsi asebentise tekuchumana, ciniseka kutsi ukhule ngalokwenele kutsi angakhona kulandzela sikhatsi lomkalele sona. Ciniseka nekutsi uyakwati kukhetsa bangani labakahle futsi uyakugwema kubukela tintfo letingcolile.

• Kuze utfole lokunyenti fundza sihloko lesitsi “Kufanele Yini Kutsi Umntfwana Wami Asebentise Tinhlelo Tekuchumana?” nalesitsi “Kufundzisa Bantfwana Labaseminyakeni Yekutfomba Kusebentisa Tekuchumana Ngekuphepha.”

“[Sisebentise] kahle sikhatsi sakho.”—Kubase-Efesu 5:16.

Nangabe umvumela umntfwana wakho kutsi asebentise tekuchumana, mbekele imitsetfo umtjele kutsi angatisebentisa njani futsi nini, uphindze umchazele kutsi lemitsetfo itamsita njani kutsi ahlale aphephile. Nangabe indlela umntfwana wakho latiphatsa ngayo ishintja, kungenteka loko kukhombisa kutsi sekufanele uyinake indlela lasebentisa ngayo tekuchumana futsi umbekele imitsetfo.

• Sebentisa i-video yemidvwebo yabopopayi lenesihloko lesitsi Hlakanipha Nawusebentisa Tekuchumana kuze usite umntfwana wakho abone kutsi lemitsetfo lombekele yona ibaluleke ngani.

Kuze utfole lokwengetiwe lokuseBhayibhelini lokungasita batali, fundza sihloko lesitsi, “Secwayiso Ngebungoti Bekusebentisa Tekuchumana Kubantfu Labasha—Litsini LiBhayibheli?”

Lokunye longakufundza

LiBhayibheli litsi siphila etikhatsini “letibucayi lokumatima kubhekana nato.” (2 KuThimothi 3:1-5) Nome kunjalo, liphindze lisinikete teluleko lesingatisebentisa kuze sibhekane nalobumatima. Kuneluhla lwetintfo letingetulu kwa-20 letisekelwe eBhayibhelini letingasita batali kanye nebantfwana babo letikulesihloko lesitsi “Kwenyuka Kwetinkinga Tekucindzeteleka Kubantfu Labasha Labaseminyakeni Yekutfomba—Litsini LiBhayibheli?”