Di woto di Salumon bi konda, ta heepi u fuu fusutan andi sa pasa ku hiniwan u dee dinima u Jehovah. Wan dinima u Jehovah sa du wan gaan zöndu, nöö a ko ta fii bakaten kuma di soni pasa ku ën „wan pasi vou” sö. Nasö a sa taki taa: „Miseei an fusutan möön e.” Ma ee a kai pakisei a di soni di pasa, nöö a sa ko si taa a mbei wanlö pikipiki föutu, di mbei taa a go du wan gaan zöndu. Dee föutu dë sa dë taa a bi ta hulu sëmbë di an lobi Jehovah, a bi ta piizii a wan fasi di an fiti, nasö kandë a bi nango a website ku kamian di an bunu da Keesitu sëmbë. A kan tu taa an bi ta begi möön, an bi ta lesi Bëibel möön, an bi nango a dee komakandi möön, nasö an bi nango a di peleikiwooko möön. Hën da te i luku ën te i kaba, nöö i ta ko si taa di soni di bi miti di njönku kijoo hën wë miti ën. An bi du zöndu wan pasi vou sö, ma a bi mbei wanlö pikipiki föutu a fesi ufö. Andi u ta lei a di soni dë? U musu ta köni fu wa du zöndu. Ma u musu ta köni tu fu wa du dee soni dee sa mbei taa u go du zöndu. Di soni dë Salumon seei bi taki.​—Mat. 5:29, 30. w24.07 bld. 16 pal. 10-11

Ma andi da di gudu dë? Wë, di gudu dë da di bunu buka u di Könuköndë u Gadu di u ta paaja u tjubi sëmbë libi (2 Kol. 4:1). Ma nöö andi da di doti paabi? Di doti paabi dë da dee dinima u Gadu di ta paaja di bunu buka da woto sëmbë. A di ten u Paulosu dee seisonima bi ta tei doti paabi u tja gudu. Dee gudu aki da soni kuma njanjan soni, win, ku möni. Sö nöö Jehovah ta futoou u tjika fuu tja di bunu buka fëën go paaja da woto sëmbë, nöö a o da u di kaakiti di u abi fanöudu fuu sa ta paaja ën u nöömö. So juu u sa fëëë u di so sëmbë an ta kë haika di bunu buka, nasö u di de ta du ku u. Andi u sa du fu wa fëëë möön? Buta pakisei a di begi di dee apösutu bi begi, di de bi piki de taa de an bi musu peleiki möön. Wë de an bi mbei fëëë da libisëmbë tapa de u de peleiki go dou. De bi hakisi Jehovah faa heepi de u de konda di buka söndö fëëë. Wantewante Jehovah bi piki di begi u de (Tjab. 4:18, 29, 31). Ee fëëë da libisëmbë ta tapa i fii peleiki so juu, nöö i sa begi Jehovah hakisi ën faa heepi i be di lobi di i abi da sëmbë ko möön taanga, sö taa ja ta fëëë möön u konda di bunu buka fëën da de. w24.04 bld. 16 pal. 8-9

U di u lobi Jehovah mbei u ta du soni u tja gafa ko da di në fëën. Di soni aki kë taki taa woo ta piki sëmbë taa dee hogihati soni di Saatan ta taki u Jehovah da mindimindi soni (Ken. 3:1-5; Jöpu 2:4; Joh. 8:44). Te u ta peleiki, nöö u ta kë konda da hii dee sëmbë dee kë haika u unfa Jehovah dë tuutuu. U ta kë u de ko sabi taa lobi da di möön gaanwan u hii dee fasi dee a abi tuu, söseei taa a ta tii a wan leti fasi. U ta kë u de ko sabi tu taa abiti möön di Könuköndë fëën o puu hii dee soni dee ta fuka u, söseei taa a o mbei u ko ta libi bööböö (Ps. 37:10, 11, 29; 1 Joh. 4:8). Te u ta lei sëmbë soni u Jehovah, nöö u ta tja gafa ko da di në fëën. U ta dë waiwai tu, u di u sabi taa u du andi u bi musu du, u lei taa u da wan Kotoigi u Jehovah. w24.05 bld. 18 pal. 12