«Nuk janë pjesë e botës»
«Bota i ka urryer, sepse nuk janë pjesë e botës, ashtu si unë nuk jam pjesë e botës.»—GJONI 17:14.
Domethënia: Ngaqë nuk ishte pjesë e botës, Jezui mbajti qëndrim asnjanës në konfliktet shoqërore dhe politike të asaj kohe. Ai shpjegoi: «Po të ishte mbretëria ime pjesë e kësaj bote, shërbëtorët e mi do të luftonin që unë të mos u dorëzohesha judenjve. Por ja që mbretëria ime nuk është nga kjo botë.» (Gjoni 18:36) Gjithashtu i nxiti dishepujt të hiqnin dorë nga qëndrimet, të folurit dhe nga sjellja që Fjala e Perëndisë i dënon.—Mateu 20:25-27.
A e kishin të krishterët e hershëm këtë karakteristikë? Sipas një shkrimtari për çështjet e fesë, Xhonatan Dajmëndit, të krishterët e hershëm «nuk pranonin të shkonin në [luftë], cilatdo qofshin pasojat: sharjet, burgimi ose vdekja». Zgjodhën të vuanin në vend që të bënin kompromis me qëndrimin asnjanës. Ata ishin të ndryshëm edhe për sa u përket normave morale. Të krishterëve u ishte thënë: «Meqë nuk vazhdoni të vraponi me ta në këtë udhë, drejt të njëjtit batak shfrenimi, atyre u vjen çudi dhe vazhdojnë t’ju shajnë.» (1 Pjetrit 4:4) Historiani Uill Duranti shkroi për të krishterët se, «me përkushtimin dhe virtytin e tyre, e vinin në siklet botën pagane të marrosur pas kënaqësive».
Cilët e ndjekin modelin e tyre sot? Për asnjanësinë e krishterë, një enciklopedi katolike (New Catholic Encyclopedia) thotë: «Të kundërshtosh për shkak të ndërgjegjes është moralisht e pajustifikueshme.» Nga ana tjetër, një artikull i gazetës Reformierte Presse përmend një raport nga të Drejtat Afrikane, organizatë për të drejtat e njeriut. Sipas këtij raporti, në gjenocidin e vitit 1994 në Ruandë, morën pjesë të gjitha kishat, «me përjashtim të Dëshmitarëve të Jehovait».
Duke diskutuar për holokaustin nazist, një mësues i një shkolle të mesme tha me trishtim se «asnjë grup a organizatë me qytetarë të zakonshëm nuk e ngriti zërin ndaj morive të gënjeshtrave, mizorive dhe kasaphanave që erdhën si pasojë». Pasi u konsultua me Muzeun Përkujtimor të Holokaustit në SHBA, ai shkroi: «Tani e mora përgjigjen.» Ai mësoi se Dëshmitarët e Jehovait qëndruan të patundur në bindjet e tyre, edhe pse u trajtuan egërsisht.
Ç’të themi për moralin e të krishterëve? «Sot shumica e të rinjve katolikë nuk janë dakord me mësimet e kishës për çështje si bashkëjetesa [dhe] seksi para martesës»,—thotë revista U.S. Catholic. Ajo citon një dhjak kishtar i cili tha: «Shoh se një përqindje mjaft e madhe—ma merr mendja mbi 50 për qind—tashmë kanë jetuar bashkë para se të martohen.» Një enciklopedi vëren se Dëshmitarët e Jehovait «ngulmojnë për kod të lartë moral në lidhje me sjelljen».—The New Encyclopædia Britannica.